Advertisement
50000 އާއިލާއަށް ބޯހިޔާވަހިކަން ދެވެން އޮތްވާ އެންމެ 4000 ގޯތި ދޫކުރަންވީ ސަބަބެއް ނެތް: މޭޔަރު
ފަސޭހަކަމާއެކު ބޯހިޔާވަހިކަމަށް ބޭނުންޖެހިފައި ތިބި 50000 އާއިލާއަށް ބޯހިޔާވަހިކަން ފޯރުކޮށްދެވެން އޮއްވާ އެންމެ 4000 ގޯތި ދޫކުރަން ޖެހޭ ސަބަބެއް ނެތްކަމަށް މާލޭ ސިޓީގެ މޭޔަރު ޑރ މުހައްމަދު މުއިއްޒު ވިދާޅުވެއްޖެ އެވެ.
މޭޔަރު މިފަދައިން ވިދާޅުވެފައިވަނީ މާލޭ ސިޓީ ކައުންސިލުން ބޭއްވި މިއަހަރުގެ ފުރަތަމަ ރައްޔިތުންގެ ބައްދަލުވުމުގައި ވާހަކަ ދައްކަވަމުން ނެވެ.
މޭޔަރު ވިދާޅުވީ ބީހިޔާވަހިކަމުގެ ދަތިކަމަކީ މާލޭ ރައްޔިތުންނަށް ވަރަށް ބޮޑު ތަކުލީފަކަށް ވެފައިވާ މައްސަލައެއް ކަމަށެވެ. އެހެން ރަށްރަށުގެ ރައްޔިތުންނެކޭ އެއްގޮތަށް މާލޭ ރައްޔިތުންނަށް ވެސް ގެވަޅު ލިބެން ޖެހޭކަމަށާއި، އެކަން ފަސޭހަކަމާއެކު ކުރެވެން އޮތްކަން ފާހަގަކުރެއްވި އެވެ.
Advertisement
އެގޮތުން މާލޭ ސަރަހައްދުން ފަސޭހަކަމާއެކު 50000 އާއިލާއަށް ބޯހިޔާވަހިކަން ފޯރުކޮށްދެވިދާނެކަމަށް މޭޔަރު ވިދާޅުވި އެވެ. އަދި އެކަން ކުރައްވާނެ ގޮތުގެ ޕްލޭނަށްވެސް އެމަނިކުފާނު އަލިއަޅުވާލެއްވި އެވެ.
"މި އަދު ވެސް އެ ހައްލު އަޅުގަނޑުމެން އަތުގައި މި އޮތީ. އެއީ ގުޅިފަޅުން 280 ހެކްޓަރުގެ ބިން ހިއްކުން. ފުށިދިއްގަރު ފަޅުން 900 ހެކްޓަރުގެ ބިން ހިއްކުން. އަދި ގިރާވަރު ފަޅުން 200 ހެކްޓަރުގެ ބިން ހިއްކުން. އޭރުން ޖުމުލަ އެވީ 1380 ހެކްޓަރުގެ ބިން. މި ބިންތައް ހިއްކައި ގެދޮރުގެ ދަތިކަން އެންމެ ބޮޑަށް ޖެހިފައިވާ ފަރާތްތަކަށް ދޭންވީ، ގޯތި ބޭނުންވާ މީހުންނަށް ގޯތި ފްލެޓު ބޭނުންވާ މީހުންނަށް ފްލެޓު ދޭންވީ. މާލެ ސިޓީގައި ގެދޮރުގެ ދަތިކަން ފޯރާފައިވާ 50000 އާއިލާއަށް މި ނިސްބަތުގެ ބިމުން ގޯއްޗާއި ފުލެޓުދީ ދިގު މުއްދަތަކަށް މައްސަލައަށް ހައްލު ހޯދައިދެވޭނެ"
މާލޭ ސިޓީގެ މޭޔަރު ޑރ މުހައްމަދު މުއިއްޒު
މޭޔަރު ވިދާޅުވީ އެ ތަންތަނުން ގޯތި ބޭނުންވާ ފަރާތްތަކަށް ގޯތި، އަދި ފްލެޓު ބޭނުންވާ ފަރާތްތަކަށް ފްލެޓުތައް ފޯރުކޮށްދިނުމަށްފަހު، ރައްޔިތުންނަށް ބުރަކަމެއް ނާންނާނެ ލުއި އަގުގައި ހައުސިން ލޯނު ސްކީމުތައް ަރުކަޒީ ބޭންކުން ރެގިޔުލޭޓް ކޮށްގެން ބޭންކްތަކުން ލިބޭނޭ ގޮތް ހަމަޖައްސައި، ހައުސިންގ ސަބްސިޑީ ސްކީމެއް ތަޢާރަފް ކުރުމުން އެ ކޮށާ ދެވެނީ ރައްޔިތުންނަށް އުފާވެރި ކަމާއެކު ދިރިއުޅެވޭނެ މަގެއް ކަމަށެވެ.
މޭޔަރު ވިދާޅުވިގޮތުގައި، މާލެ ރައްޔިތުންނަށް ހައްގުވަނީ އެންމެ 4000 ގޯއްޗެއް ނޫނެވެ. މި ސަރަހައްދުގައި ބޯހިޔާވަހިކަމުގެ މައްސަލަ އޮތް މިންވަރާއި އަޅާ ބަލާއިރު 4000 ގޯއްޗަކީ ފުދޭ މިންވަރެއް ނޫންކަމަށް މޭޔަރު އިޝާރާތް ކުރެއްވި އެވެ. އަދި ވިދާޅުވީ 50000 އާއިލާއަށް ބޯހިޔާވަހިކަން ފޯރުކޮށްދެވެން އޮތް ކަމެއްގައި އެންމެ 4000 ގޯތި ދޫކުރަން ޖެހޭ ސަބަބެއްވެސް ނެތް ކަމަށެވެ.
"މިހާ ފަސޭހައިން މިކަންކަން ކޮށްދެވެން އޮއްވައި މާލޭ ސަރަހައްދުން އެތައް ހާސް އަކަފޫޓުގެ ބިން ދިވެހީން ނޫން ބަޔަކަށް ދެވޭ ނަމަ އެއީ ވިސްނާލަން ޖެހޭކަމެއް. އޭގެ ނިކަމެތިކަން ދިވެހި ރައްޔިތުން އުފުލަން ޖެހޭނެ. މާލެ ސިޓީގެ ރައްޔިތުންގެ 50000 އާއިލާއަށް ގެދޮރުވެރިކަން ދެވެން އޮއްވައި އެންމެ 4000 ގޯތި ދޭން ނިންމަން ޖެހޭ ސަބަބެއް ނެތް"
މާލޭ ސިޓީގެ މޭޔަރު ޑރ މުހައްމަދު މުއިއްޒު
މޭޔަރު އިތުރަށް ވިދާޅުވީ ބޯހިޔާވަހިކަމުގެ މައްސަލައަށް ފަސޭހަކަމާއެކު ހައްލު ގެނެވިދާނެ ކަމަށެވެ. އެހެން ނަމަވެސް މާލެ ސިޓީގެ ރައްޔިތުންނަށް އެފަދަ ތަނަވަސް ދިރިއުޅުމެއް ހޯދައިދޭން ކައުންސިލުން މިހާތަނަށް ކުރި އެއްވެސް މަސައްކަތަކަށް ސަރުކާރުން އިޖާބަދީފައި ނުވާކަން މޭޔަރު ފާހަގަކުރެއްވި އެވެ.
އެއާއެކު މޭޔަރު ވަނީ މާލޭގެ ރައްޔިތުންނަށް ބޯހިޔާވަހިކަން ފޯރުކޮށްދޭން ހުރި ބިންތަން ބޭރު ފަރާތްތަކަށް ދޫކުރުމަށް ސަރުކާރުން ނިންމި ނިންމުމާއި ގުޅިގެންވެސް ނުރުހުން ފާޅުކޮށްފަ އެވެ. އަދި އެފަދަ ނިންމުންތައް ނިންމާއިރު، މާލޭ ސިޓީ ކައުންސިލާއި އެއްވެސް މަޝްވަރާއެއް ނުކުރުމަކީ އިންތިހާއަށް ކަންބޮޑުވުން އޮތް ކަމެއްކަމަށް މޭޔަރު ތަކުރާރުކޮށް ވިދާޅުވެފައި ވެއެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
Advertisement
