މާލޭ ސިޓީ ކައުންސިލުގެ އަތުން އަތުލުމަށްފަހު ތިން ގުނަ އަގު ބޮޑުކޮށް ރޯޑް ޑިވެލޮޕްމަންޓު ކޯޕަރޭޝަން (އާރު.ޑީ.ސީ) އާއި ހަވާލުކޮށްގެން އަމީނީ މަގުގައި ތާރުއެޅުމުގެ މަސައްކަތް ކުރަމުންދާ ގޮތަށް މާލޭ ސިޓީގެ މޭޔަރު ޑރ މުހައްމަދު މުއިއްޒު ފާޑުވިދާޅުވެއްޖެ އެވެ. 

މާލޭ ސިޓީ ކައުންސިލުން ބޭއްވި މިއަހަރުގެ ފުރަތަމަ ރައްޔިތުންގެ ބައްދަލުވުމުގައި ވާހަކަދައްކަވަމުން ޑރ މުއިއްޒު ވިދާޅުވީ މާލޭގެ މަގުތަކުގެ މައްސަލަތައް ހައްލުކުރާނެ ގޮތުގެ ދިރާސާއެއް މާލޭ ސިޓީ ކައުންސިލުން ހަދާފައިވާ ކަމަށެވެ. 

އެ ގޮތުން އަމީނީ މަގުގެ ތާރު އަޅައި ޒަމާނީ ދިއްލުންތަކުން މަގު ދިއްލައި މާމެލާ މެއްޔާއި ގަސްގަހާގެހިން މަގުގެ ދެ ފަރާތް ޒީނަތްތެރިކުރުން 39 މިލިޔަނަށް ހަމަޖައްސާފައި އޮއްވާ އެ މަސައްކަތް ކުރިޔަ ނުދީ 9 މަސް ދުވަސް ސަރުކާރުން ހިފަހައްޓުވާލިކަމަށް މޭޔަރު ވިދާޅުވި އެވެ.

އެފަހުން އެ މަގު ހެދުން 84 މިލިއަން ރުފިޔާއަށް އާރުޑީސީއަށް ހަވާލުކޮށްފައިވާ ކަމަށާއި، އެ މަސައްކަތް އެމީހުންނާއި ހަވާލު ކުރީ 7 މަހުން ނިންމުމަށްކަން މޭޔަރު ފާހަގަކުރެއްވި އެވެ. 

މިހާރު އެ މަސައްކަތް ގޮސްފައިވާ ހިސާބަށް ބަލާއިރު، 6 މަސް ތެރޭ އާރުޑީސީއަށް ނިންމާލެވުނީ ކުޑަ ތަންކޮޅެއްކަމަށް މޭޔަރު ވިދާޅުވި އެވެ. 

މޭޔަރު ވިދާޅުވީ އާރުޑީސީއާއި ހަވާލުކޮށްފައިވާ ގޮތުން، އަމީނީ މަގުގައި ބާކީ 10 ޕަސެންޓުގައި ތާރު އެޅުމުން އެ މަސައްކަތް ނިމޭނެ ކަމަށެވެ. 

އެހެން ނަމަވެސް، މާލޭ ސިޓީ ކައުންސިލުން އޭރު ޕްލޭން ކޮށްފައި އޮތީ އަމީނީ މަގު ހިމެނޭ ގޮތަށް މާލޭގެ ބޮޑު 16 މަގެއްގައި ތާރު އަޅައި 90 މަގުގައި އަލުން ގާ އަތުރައި ޒަމާނީ ފެންވަރަށް ޒީނަތްތެރި ކުރުމަށް ކަމަށް މޭޔަރު ވިދާޅުވި އެވެ. އަދި އެ މަސައްކަތް ނުހުއްޓުވި ނަމަ، ސިނަމާލެ ބްރިޖުގެ މަސައްކަތް ނިންމާލެވުނު ގޮތަށް އެ މަސައްކަތްވެސް އޮންނާނީ ނިމިފައިކަން ފާހަގަކުރެއްވި އެވެ.

މޭޔަރު ވިދާޅުވީ އަމީނީ މަގުގައި ތާރު އަޅާ ގޮތަށް ކުރީމާ ފަހުން އެކަން ވާނީ ބޮޑު މުސީބާތަކަށްކަމަށެވެ. އެގޮތަށް ކަންކަން ކުރުމުން ރައްޔިތުންގެ ފައިސާއިން އިސްރާފުވެ، މަސްލަޙަތުވެސް ގެއްލިގެންދާކަން މޭޔަރުގެ ވާހަކައިގައި ވަނީ ވިދާޅުވެފަ އެވެ.