ވޭތުވެދިޔަ ޖެނުއަރީ މަހު 47 މަޝްރޫއަކަށް 74.8 މިލިއަން ރުފިޔާ ޚަރަދުކޮށްފައިވާ ކަމަށް ފިނޭންސް މިނސްޓްރީގެ ތަފާސް ހިސާބުތަކުން ދައްކާފިއެވެ.

އެގޮތުން މި ތަފާސްހިސާބުތަކުން ވޭތުވެދިޔަ ޖެނުއަރީމަހު ގްރީން ފަންޑްގެ ގޮތުގައި 100.8 މިލިއަން ލިބިފައިވާ ކަމަށް ދައްކާފައިވެއެވެ.

މީގެ ތެރޭގައި ރިސޯޓް، ހޮޓެލް އަދި ގެސްޓްހައުސްތަކުން 98.9 މިލިއަން ރުފިޔާއާއި، ސަފާރީތަކުން ލިބިފައިވާ 1.8 މިލިއަން ރުފިޔާގެ އިތުރުން ހޯމްސްޓޭ ފެސިލިޓީތަކުން ލިިބިފައިވާ 2113.62 ރުފިޔާ ހިމެނެއެވެ.

Advertisement

ރިސޯޓް، ހޮޓެލް އަދި ގެސްޓްހައުސްގެ ގްރީން ފަނޑްގެ ތެރެއިން އެންމެ ގިނަ އަދަދެއްގެ ފައިސާ ލިބިފައިވަނީ ކ.އަތޮޅުން 37 މިލިއަން ރުފިޔާއެވެ. ދެން އެންމެ ގިނައިން ލިބިފައިވަނީ ދ. އަތޮޅުން 11.9 މިލިއަން ރުފިޔާއެވެ.

ގްރީން ފަންޑުގެ ގޮތުގައި ލިބިފައިވާ ފައިސާގެ ތެރެއިން ޖެނުއަރީމަހު ޚަރަދު ކޮށްފައިވަނީ 47 މަޝްރޫއަކަށް 74.8 މިލިއަން ރުފިިޔާއެވެ. މީގެ ތެރޭގައި ފެނާއި ނަރުދަމާގެ މަޝްރޫއުތަކާއި ގޮނޑުދޮށް ހިމާޔަތް ކުރުމުގެ މަޝްރޫއުތައް ހިމެނެއެވެ.

އެގޮތުން އެންމެ ބޮޑު ޚަރަދެއް ކޮށްފައިވަނީ 5 ރަށަކަށް ސާފު ބޯފެން ފޯރުކޮށްދިނުމުގެ މަޝްރޫއަށް 10.2 މިލިއަން ރުފިޔާއެވެ.

ދެެން އެންމެ ގިނައިން ޚަރަދު ކުރެވިފައިވަނީ ތ. ވޭމަންޑޫއަށް ފެނުގެ ނިޒާމް ގާއިމްކުރުމުގެ މަޝްރޫއަށް 9 މިލިއަން ރުފިޔާއެވެ.

މީގެ އިތުރުން ގޮނޑުދޮށް ހިމާޔަތް ކުރުމުގެ މަޝްރޫއުގެ ތެރެއިން އެންމެ ބޮޑު ޚަރަދެއް ކޮށްފައިވަނީ ބ. ކުޑަރިކިލުއަށް 8.7 މިލިއަން ރުފިޔާ އަދި ހދ. ނެއްލައިދޫއަށް 7.2 މިލިއަން ރުފިޔާއެވެ.

ގްރީން ފަންޑަކީ ރާއްޖެއަށް އަންނަ ފަތުރުވެރިންގެ އަތުން ރާއްޖޭގެ ތިމާވެއްޓާއި ގުޅުންހުރި މަސައްކަްތައް ކުރުމަށް މާލީ އެހީ ހޯދުމަށް ނަގަމުން އަންނަ ޓެކްސްއެކެވެ.