ކުރީގެ ބަންޑާރަނައިބު އަދި އެމްޑީޕީގެ ކުރީގެ ރައީސް ޑރ. މުހައްމަދު މުނައްވަރު އަންނަ ސެޕްޓެމްބަރު މަހު ބޭއްވޭ ރިޔާސީ އިންތިޚާބުގައި ވާދަކުރެއްވުމަށް ނިންމާފިއެވެ.

އެގޮތުން މިކަން މިއަދު އިއުލާންކޮށް ޑރ. މުނައްވަރު ވަނީ ކެންޕެއިން މަރުކަޒެއް މާލޭގައި ހުޅުވާފައެވެ.

ޑރ. މުނައްވަރު ވަނީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި 10 އަހަރުގެ މުއްދަކަށް ބަންޑާރަނައިބުގެ މަގާމް އަދާ ކުރައްވާފައެވެ.

Advertisement

2008 ވަނަ އަހަރު ޑރ. މުނައްވަރު ވަނީ އެމްޑީޕީގެ ރިޔާސީ ޕްރައިމަރީގައި އެ ޕާޓީގެ ރައީސްގެ މަގާމަށް ކުރިމަތިލައްވާފައެވެ. ނަމަވެސް ޕްރައިމަރީއިން ނާކާމިޔާބުވެ، ދުވަސްކޮޅެއްފަހުން އެޕާޓީއަށް ފާޑުކިޔާ ޕާޓީއިން ވަނީ ވަކި ވެފައެވެ.

މިއަށްފަހު ޑރ. މުނައްވަރު ވަނީ ޖުމްހޫރީ ޕާޓީއާއި ގުޅިވަޑައިގަންފައެވެ. ނަމަވެސް މި ޕާޓީވެސް ދޫކުރައްވާ މޯލްޑިވްސް ރިފޯމް މޫވްމެޓްގެ ނަމުގައި ޑރ.މުނައްވަރު ވަނީ އަމިއްލަ ސިޔާސީ ޕާޓީއެއް އުފައްދާފައެވެ. އެހެންނަމަވެސް ގާނޫނުގައި ބުނާ ޝަރުތުތައް ހަމަނުވުމުގެ ސަބަބުން އިލެކްޝަންސް ކޮމިޝަނުން އެ ޕާޓީ ވަނީ އުވާލާފައެވެ.

މީގެ ފަހުން މިދިޔަ އަހަރުގެ ފަހު ކޮޅާ ހަމައަށް ސިޔާސީ އެއްވެސް ކަމެއްގައި ބައިވެރި ވަޑައިނުގެން ނަމަވެސް އެއަށްފަހު ވަނީ ސަރުކާރުގެ ސިޔާސަތުތަކަށް ފާޑުކިޔަން ފައްޓަވާފައެވެ.

އަދި ދާދި ފަހުން އޮތް އެމްޑީޕީގެ ރިޔާސީ ޕްރައިމަރީގައި އެޕާޓީގެ ރައީސް މުހައްމަދު ނަޝީދާއި އެކު އެމަނިކުފާނަށް ކެންޕެއިން ކޮށްދެއްވުމުގައިވެސް މުނައްވަރު ބައިވެރިވެ ވަޑައިގެންނެވި އެވެ.