ފޯޅަވަހި މައްސަލައިގައި ރައީސުލްޖުމްހުރިއްޔާ އިބްރާހީމް މުހައްމަދު ސޯލިހް މޮރިޝަސްގެ ވެރިންނަށް ފޮނުވި ސިޓީ ފެނިވަޑައި ނުގަންނަވާކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ. 

އަމީރު އެފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު އެއްސެވި ސުވާލަށް ޖަވާބުދެއްވަމުން ނެވެ. 

ފޯޅަވަހި މައްސަލައިގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މޮރިޝަސްގެ ބޮޑުވަޒީރަށް ސިޓީފުޅެއް ފޮނުވާފައިވެއެވެ. އެފަހުން 2022 ވަނަ އަހަރު ސަރުކާރުން ވަނީ ފޯޅަވަހި މައްސަލައިގައި ސަރުކާރުގެ ސްޓޭންޑް ބަދަލުކޮށްފަ އެވެ. އަދި ފޯޅަވަހީގެ ބާރުވެރިކަން މޮރިޝަސްއަށް ދޫކޮށްލަން ނިންމާފަ އެވެ. 

މިއަދުގެ މަޖިލީސް ޖަލްސާއަށް މިނިސްޓަރު އަމީރު ހާޒިރުކުރައްވާފައިވާއިރު، ސައީދު ވަނީ މިނިސްޓަރަށް އެ ސިޓީފުޅު އެއްވެސް ސިފައެއްގައި ފެނިވަޑައިގެންފައި ވޭތޯ އައްސަވާ ސުވާލު ކުރައްވާފަ އެވެ. 

މާވަށު ދާއިރާގެ މެމްބަރު މުހައްމަދު ސައީދު 

 ސައީދުގެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ އެ ސިޓީފުޅު އެމަނިކުފާނަށްވެސް ފެނިވަޑައިގެންފައި ނުވާކަމަށެވެ. 

ފިނޭންސް މިނިސްޓަރު އަމީރު 

ފޯޅަވަހި މައްސަލައިގައި ސަރުކާރުން ކުއްލި ގޮތަކަށް ސްޓޭންޑް ބަދަލު ކުރުމާއި ގުޅޭގޮތުން ގިނަ ސުވާލުތަކެއް އުފެދިގެން ދިޔައެވެ.

އެގޮތުން ކުރީގެ ބަންޑާރަ ނައިބު ޑރ މުހައްމަދު މުނައްވަރު ދެއްވި ޕްރެސް ކޮންފަރެންސްއެއްގައި ވަނީ ސަރުކާރުން ސްޓޭންޑް ބަދަލުކުރީ މޮރިޝަސް ސަރުކާރާއެކު ޑީލު ހަދައިގެންކަމަށް ތުހުމަތު ކުރައްވާފަ އެވެ. އަދި އެ ޑީލުގެ ފަހަތުގައި އިންޑިއާ އޮތްކަމަށް އެމަނިކުފާނު ތުހުމަތު ކުރެއްވި އެވެ. 

އޭގެ އިތުރުން ރައީސް ޞާލިހު މޮރިޝަސްގެ ވެރިންނަށް ފޮނުވި ސިޓީ ހާމަކުރަން ޖެހޭކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމުވެސް ވަނީ ގޮވާލައްވާފަ އެވެ. އަދި އެސިޓީ ހޯދުމަށް މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގުވެސް ހުށައެޅުއްވި އެވެ. 

އެހެން ނަމަވެސް މިހާތަނަށް އެ ސިޓީފުޅު އޮތީ ސިއްރު ސިޓީފުޅެއްގެ ގޮތުގައެވެ. އަދި އޭގައި ލިޔެފައި އޮތް އެއްޗެއްވެސް ސަރުކާރުން ހާމަކޮށްފައެއް ނުވެއެވެ.