ގޭންގުތަކާއި ޑްރަގް ޓްރެފިކް ކުރުންފަދަ ބޮޑެތި ކުށްތަކަށް އަރައިގަންނަ މީހުންނަށް ކުޑަވެސް ދުލެއް ނުދެއްވާނެކަމަށް ހޯމް މިނިސްޓަރު އިމްރާނު އަބްދުالله ވިދާޅުވެއްޖެ އެވެ.
އިމްރާނު މިފަދައިން ވިދާޅުވެފައިވަނީ މަޖިލީހުގެ މިއަދުގެ ޖަލްސާގައި ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު އަބްދުالله ރިޔާޒު ކުރެއްވި ސުވާލަށް ޖަވާބުދެއްވަމުން ނެވެ.
މިއަދުގެ ޖަލްސާގައި ރިޔާޒު ވަނީ ޑްރަގް ޓްރެފިކް ކުރުމުގެ ކުށުގައި ހައްޔަރުކޮށް ހުކުން ކޮށްފައި ތިބޭ މީހުން މުއްދަތަށްވުރެ ކުރިން އެކި ސަބަބުތަކާހުރެ ދޫކޮށްލާކަން ފާހަގަކުރައްވާފަ އެވެ. އަދި އެފަދައިން އެމީހުން މިނިވަން ކުރުމުގައި މިނިސްޓަރު އިމްރާނުގެ ބައިވެރިވުންވެސް ހިމެނޭކަމަށް ތުހުމަތުތައް ކުރެވޭއިރު، އެކަމަށް ޖަވާބެއް ދެއްވުމަށް ރިޔާޒު މިނިސްޓަރު އިމްރާނު އަރިހުން އެދިލެއްވި އެވެ.
ތިމަރަފުށީ ދާއިރާގެ މެމްބަރު އަބްދުالله ރިޔާޒު
"ޑްރަގް ޓްރެފިކް ކުރުމުގެ ކުށުގައި ދިގު މުއްދަތަށް ޖަލަށް ހުކުމްކޮށްފަ ތިބި މީހުން، ގިނަ ބައެއް މިހާރު ވަނީ މުއްދަތަށްވުރެ މާ ލުއިކޮށް ޖަލުން މިނިވަންކޮށްފައިކަމަށް. މިކަން ހިނގާފައިވަނީ މިނިސްޓަރުގެ ބައިވެރިވުމާއި އެނގުމުގެ ތެރެއިންކަމަށް މައުލޫމާތު ލިބިފައިވޭ. އެހެންވީމަ މިއަށް މިނިސްޓަރުގެ ޖަވާބަކަށް އެދެން"
ތިމަރަފުށީ ދާއިރާގެ މެމްބަރު އަބްދުالله ރިޔާޒު
އެ ސުވާލާއި ގުޅިގެން މިނިސްޓަރު ވިދާޅުވީ ޑްރަގް ޓްރެފިކް ކުރާ މީހުންނާއި ގޭންގު ކުށްތަކަށް އަރައި ގަންނަ މީހުންގެ ކުރިމަތީ ތިރިވާނެ ބޭފުޅަކަށް ނުވާނެ ކަމަށެވެ. އަދި އެ ޔަގީންކަންވެސް ދެއްވާ ކަމަށެވެ.
"ރާއްޖޭގައި ޚާއްސަކޮށް މަސްތުވާތަކެއްޗާއި ގޭންގުތަށް ހިންގުމުގެ ކުށުގައި ބައިވެރިވާ ފަރާތްތަކުން، އެ ފަރާތްތަކަށް ލިބެން ޖެހޭ އަދަބަށް އަޅުގަނޑުގެ ފަރާތުން އެއްވެސް ލުޔެއް ލިބޭނެ ގޮތެއް އިރާދަކުރެއްވިއްޔާ މެދުވެރިއެއް ނުވާނެ. ގޭންގުތަކާއި ޑްރަގް ޓެރެފިކިންގެ މައްސަލަތަކަކީ އަޅުގަނޑު އެކަމަށް އަޅާނުލާ ދޫކޮށްލާނެ ކަމެއް ނޫން. އޭގެ ތެރޭގައި ޝާމިލުވާ އެއްވެސް ފަރާތެއްގެ ކުރިމަތީ އަޅުގަނޑު އިރާދަކުރެއްވިއްޔާ ތިރިއެއް ނުވާނެ"
ހޯމް މިނިސްޓަރު އިމްރާނު އަބްދުالله
މިނިސްޓަރު އިތުރަށް ވިދާޅުވީ މިފަހުން މާލޭގައި ހިނގައިދިޔަ މާރާމާރީތަކަށްފަހު ގޭންގުތައް ހިންގާ ފަރާތްތައްވެސް ވަރަށް ގާތުން ބަލަމުންދާ ކަމަށެވެ. އަދި އެކަންކަން ހުއްޓުވުމަށް އެކަށީގެންވާ މަސައްކަތްތަކެއް ކުރަމުންދާ ކަމަށެވެ.
އޭގެ އިތުރުން، ގޭންގުތަކާއި މަސްތުވާތަކެތި ހުއްޓުވުމަށް ކުރެވޭ މަސައްކަތްތަކުން މިއަަހަރުތެރޭ ކާމިޔާބު ނަތީޖާތަކެއް ނެރެވޭނެކަމަށް މިނިސްޓަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
