އަދުގެ ސަރުކާރުގެ ކޯލިޝަންގެ ބައިވެރިއެއްގެ ގޮތުގައި ޖުމްހޫރީ ޕާޓީ އޮތް އިރު، ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު ޢަލީ ހުސައިން ދައްކަވަނީ ހެއްވާ ވާހަކައެއް ކަމަށް މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ ޝަރީފް) ވިދާޅުވެއްޖެ އެވެ.
މި ސަރުކާރާ ޖޭޕީން ކޯލިޝަން ހަދަންޖެހޭ ސަބަބެއް ނެތް ކަމަށް ޖުމްހޫރީ ޕާޓީގެ އަލީ ހުސައިން ވިދާޅުވުމާއި ގުޅިގެން އެކަމަށް ރައްދު ދެއްވައި ޝަރީފް ކުރެއްވި ޓްވީޓެއްގައި ވަނީ، ސަރުކާރުގެ ކޯލިޝަން ބައިވެރިއެއްގެ ގޮތުގައި އޮތްހާ ހިނދަކު އެފަދަ "ފިތުނަވެރި" ވާހަކަ ދެއްކެވުން އެކަށީގެން ނުވާ ކަމަށެވެ.
އަދި އަލީ ހުސައިން ގެ އެވާހަކަ ޝަރީފް ސިފަކުރެއްވީ ވަރަށް ހެއްވާ ވާހަކައެއްގެ ގޮތުގައެވެ.
ވީޓީވީގެ ޕްރޮގްރާމެއްގައި ވާހަކަ ދައްކަވަމުން އަލީ ހުސައިން ވަނީ މި ސަރުކާރުގެ ކަންކަން ދަނީ ބޭނުންވާ ގޮތަކަށް ނޫން ކަމަށާއި އަންނަ ރިޔާސީ އިންތިހާބުގައި މި ސަރުކާރާއެކު ޖޭޕީން ކޯލިޝަން ހަދަންޖެހޭ އެއްވެސް ސަބަބެއް ނެތް ކަމަށް ވިދާޅުވެފައެވެ. އަދި މިއީ ޖޭޕީން ރިޔާސީ ރޭހަށް ނިކުންނަންވީ ވަގުތު ކަމަށްވެސް އޭނާ ވިދާޅުވި އެވެ.
"ޖުމްހޫރީ ޕާޓީން އަޅުގަނޑަށް ހީވަނީ މިއީ އެވަގުތު ހެން. 2023 ގެ ރިޔާސީ އިންތިހާބުގައި ޖުމްހޫރީ ޕާޓީ ވާދަކުރަންޖެހޭ 100 ސަބަބު ވެސް ކިޔައިދީފާނަން. ކޯލިޝަން ހަދަންޖެހޭ ސަބަބެއް ހަގީގަތުގައި ނެތް. މިހާރު މިއޮތް ސަރުކާރާއެކީ ޖުމްހޫރީ ޕާޓީން ކޯލިޝަން ހަދަންޖެހޭ އެއްވެސް ސަބަބެއް އޮތް ކަމަކަށް ގަބޫލެއް ނުކުރަން." އަލީ ހުސައިން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
