ކޯލިޝަނަކީ ރިޔާސީ ނިޒާމުގައި ހަދާ އެއްޗެއް ނޫން ކަމަށް ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަބްދުالله ޝަހީމް އަބްދުލް ހަކީމް ވިދާޅުވެއްޖެއެވެ.
ޝަހީމް މިފަދައިން ވިދާޅުވެފައި ވަނީ މިއަދު ކުރިއަށްދިޔަ ރައްޔިތުންގެ މަޖިލީހުގެ ޖަލްސާގައި ލޯކަލް ކައުންސިލް އިންތިޚާބުގެ ގާނޫނަށް ހުށަހަޅާފައިވާ އިސްލާހާއި ގުޅޭގޮތުން ވާހަކަ ދައްކަވަމުންނެވެ.
ޝަހީމް ވިދާޅުވީ ގާނޫނު އިސްލާހުކުރުމަށް ހުށަހަޅާއިރު ހަމައެކަނި 5 ދުވަސް ނޫނީ 40 ދުވަސް ނަމަވެސް، ދުވަހުގެ އަދަދު އިސްލާހު ކުރަން މަޖިލީހަށް ފޮނުވުމަކީ ގަބޫލު ކުރެވޭ ކަމެއް ނޫން ކަމަށެވެ.
ގާނޫނު އިސްލާހުކުރަނީ ރައްޔިތުންގެ ލާބައާއި މަންފާއަށްޓަކައި ކަމަށްވާއިރު، ދިވެހިރާއްޖޭގެ ރައްޔިތުންނަށް، ޚާއްސަކޮށް ސަރުކާރު ހިއްސާވާ ކުންފުނިތަކުގައި މަސައްކަތް ކުރާ އެމްޑީޕީ މުވައްޒަފުންނަށް ވަޒީފާގެ މިނިވަންކަންވެސް ލިބިފައިނުވާ ކަމަށް ޝަހީމް ވިދާޅުވި އެވެ. އެގޮތުން ކަނޑިތީމު ދާއިރާގެ ރަށެގައި މަސައްކަތް ކުރަމުންދާ އެމްޑީޕީގެ 13 މެންބަރުންނަށް ވަޒީފާއިން ކަނޑާލާނެ ކަމުގެ ނޯޓިސް ދީފައިވާ ކަމަށްވެސް ޝަހީމް ވިދާޅުވިއެވެ.
ޝަހީމް ވިދާޅުވީ އެފަދަ ކަންކަމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށާ، އެފަދަ މައްސަލަތައް ދިމާވަނީ ރިޔާސީ ނިޒާމެއްގައި ކޯލިޝަން ސަރުކާރެއް އެކުލަވައިލެއްވުމުން ކަމަށެވެ.
މި މައްސަލަތައް މިހެން މި ދިމާވަނީ ރިޔާސީ ނިޒާމެއްގައި ކޯލިޝަން ސަރުކާރު ހަދައިގެން، ކޯލިޝަން ޕާޓްނަރުންގެ ގޮތުގައި އައުމުގެ ނަތީޖާ މި ފެނިގެންދަނީ. އިއްޒަތްތެރި ރައީސް. ކޯލިޝަން ހަދާނީ ބަރުލަމާނީ ނިޒާމުގައި. މަޖިލިސް ތެރެއިން އިއްޒަތްތެރި ރައީސް. އެއީ އެކަން ކުރާ ގޮތަކީ. އަޅުގަނޑުމެން ރިޔާސީ ނިޒާމުގައި ކޯލިޝަން ހަދައިގެން މަތިފަޑިން ކަންކަން ނިންމީމާ، އެބޭފުޅުންގެ ޕާޓީގެ ދަށުގައި ތިބި މީހުން އަނެއް ޕާޓީ އަކަށް އިހްތިރާމެއް ނުކުރޭ. ބޭނުން ގޮތަކަށް ކަން ކުރުމުގެ ނަތީޖާ ފެނިގެން މިދަނީ. މައި ޕާޓީގެ މެންބަރުން ނިކަމެތި ކުރަމުންދާތަން މިއަދު މި ފެންނަނީ. މިއީ ގަބޫލު ކުރެވޭނެ ކަމެއް ނޫން.
މެންބަރު އަބްދުالله ޝަހީމް
މިއާއެކު ޝަހީމް ވަނީ، އެފަދައިން ކަންކަން ވަނީ ރިޔާސީ ނިޒާމުގައި ކޯލިޝަން ސަރުކާރެއް އެކުލަވައި ލުމުން ކަން ތަކުރާރު ކުރައްވާފައެވެ.
Advertisement
This content is created and paid for by advertisers and does not involve Voice Journalists
