މިއަހަރުގެ ރިޔާސީ އިންތިހާބަށް ކުރިމަތިލައްވާނެކަމަށް އަޑު އަރާފައިވާ ބޭފުޅުންގެ ތެރޭގައި ރައީސް އިބްރާހިމް މުހައްމަދު ސާލިހު ބަލިކޮށްލެވޭނެ ފަދަ ބޭފުޅެއް ފެނިވަޑައިނުގަންނަވާ ކަމަށް މަރަދޫ ދާއިރާގެ މަޖިލިސް މެންބަރު އިބްރާހީމް ޝަރީފް ވިދާޅުވެއްޖެއެވެ.

ޝަރީފް އަކީ ސިލްސިލާ ކޮށް ކޮންމެ ދުވަހަކު ރައީސް ޞާލިހަށް ތައުރީފް ކުރައްވައި، އެމަނިކުފާނާއި ދެކޮޅު ފަރާތްތަކަށް ފާޑުވިދާޅުވެ ޓުވީޓް ކުރައްވާ ބޭފުޅެކެވެ. 

އެގޮތުގެ މަތިން އޭނާ މިއަދު ކުރައްވާފައިވާ ޓުވީޓުތަކެއްގަައި ވިދާޅުވީ، ރައީސް ސާލިހަކީ ކޮވިޑްގެ ދަތި އުނދަގޫކަމުން ރާއްޖެ ސަލާމަތުގެ އައްސޭރިއަށް ގެނެސްދެއްވި މަޑުމައިތިރި ހިކުމަތްތެރި ލީޑަރެއްކަމަށެވެ. 

"މިއަހަރުގެ ރިޔާސީ އިންތިހާބަށް ކުރިމަތިލައްވާނެކަމަށް އަޑު އަރާފައިވާ ބޭފުޅުންގެ ތެރޭގައި ރައީސް ސާލިހު ބަލިކޮށްލެވޭނެ ފަދަ ބޭފުޅެއް އަދި ފެންނާކަށްނެތް." ޝަރީފް ވިދާޅުވި އެވެ. 

ޝަރީފް އިތުރަށް ވިދާޅުވީ, ކޮވިޑުގެ ހާލަތުން އެހެން ގައުމުތައް އަރައިގަންނަން ފެށީ އަދިކިރިޔާ ކަމަށެވެ. އަދި ރަޝިއާ ޔޫކްރެއިން ހަނގުރާމައިގެ ސަބަބުން ދުނިޔޭގެ އިގްތިސާދަށް ބޮޑެތި ނޭދެވޭ އަސަރުތަކެއް ކުރަމުންދާއިރު، ރާއްޖޭގެ އިގްތިސާދު ކުރިއަށް ދަނީ ވިސްނުންތެރިކަމާއެކު ކުރިއަށް ގެންދާ ސިޔާސަަތުތަކެއް އޮވެގެން ކަމަށްވެސް ވިދާޅުވި އެވެ. 

މިއާއެކު ޝަރީފް ވިދާޅުވީ ރާއްޖެއަކީ އެންމެ ބާރަށް ކުރިއަރަމުންދާ ގައުމުތަކުގެ ތެރޭގައި ހިމެނިގެންދިޔައީ ހަރުދަނާ ސިޔާސަތުތަކެއް ތަންފީޒު ކުރެވެމުންދާތީކަމަށެވެ. އަދި އެ ސިޔާސަތުތަކާއި ދެކޮޅު، ގައުމު ބަނގުރޫޓުވަމުންދާކަމަށް ވިދާޅުވާ ބޭފުޅުންގެ އަތް މައްޗަށް ވެރިކަމުގެ ބާރު ގޮސްފި ހާލަތެއްގައި ރާއްޖޭގެ އިގްތިސާދު ފުނޑުފުނޑުވެގެންދާނެކަމަށްވެސް އޭނާ ވިދާޅުވި އެވެ.