ބެންކް އޮފް މޯލްޑިވްސް (ބީއެމްއެލް) ގެ ކޮމިޔުނިޓީ ފަންޑުގެ ދަށުން ތިން ރަށެއްގައި ހިންގި ޕްރޮޖެކްޓްތައް ނިންމާލައިފިއެވެ.
މި ފަންޑުގެ ދަށުން ޕްރޮޖެކްޓްތައް ކުރިއަށް ގެންގޮސްފައިވަނީ ދ. ހުޅުދެލި، ލ. މުންޑޫ އަދި ލ. ފޮނަދޫގައެވެ.
އެގޮތުން ދ. ހުޅުުދެލީގައި، ހުޅުދެލި އައިލެންޑް ސޮސައިޓީ އެންޑް ސްޕޯޓްސް އެސޯސިއޭޝަން އިސްނަގައިގެން މަސްކެނޑުމަށް ހާއްސަ ތަނެއް ވަނީ ގާއިމުކޮށްފައެވެ. މިތަން ހަދާފައިވަނީ މަސް ކެނޑޭނެ 8 ވޯކް ސްޓޭޝަނާއިއެކު،ކަރަންޓާއި ރީތި ފެން ލިބޭގޮތަށް، ފެންހިއްކާ ނިޒާމަކާއެކު އާންމު ރައްޔިތުންނަށްވެސް ބޭނުން ކުރެވޭނެ ގޮތަށެވެ.
މިއާއިއެކު ލ. ފޮނަދޫގައި މި ފަންޑް ބޭނުންކޮށްގެން ލާމު އަތޮޅު ތައުލީމީ މަރުކަޒުގެ 4 ކްލާސްރޫމެއް ޑިޖިޓައިޒް ކުރުމުގެ ގޮތުން ވަނީ ޓީވީ ބަހައްޓާފައެވެ. މި ޕްރޮޖެކްޓް ހިންގާފައިވަނީ މިނިވަން މުއައްސަސާއެއް ކަމުގައިވާ ވިމެން އެންހޭންސްމެންޓްގެ ފަރާތުން ދަރިވަރުންގެ އުނގެނުމުގެ ތަޖުރިބާ ރަނގަޅުކުރުމުގެ ގޮތުންނެވެ.
މީގެ އިތުރުން ލ.މުންޑޫގައި އެ ރަށުގެ ޒުވާނުންގެ ޖަމްއިއްޔާއިން ވަނީ ހިޔާ ވާނެހެން ބަނދަރު ސަރަހައްދުގައި ދަތުރުވެރިން މަޑުކުރާނެ ތަނެއް ތައްޔާރުކޮށް ލަނކުޑި ބެންޗްތަކަކާއިއެކު ހަޓްއެއް ހަދާފައެވެ. އަދި ޕާކް ކުރާނެ ސަރަހައްދަކާއި ކުޑަކުދިން މަޖާކޮށްލުމަށްޓަކައި ކުޑަ ލައިބްރަރީ އެއްވެސް ގާއިމުކޮށްފައެވެ.
ބީއެމްއެލްގެ ކޮމިއުނިޓީ ފަންޑަކީ ހިލޭ ސާބަހަށް މަސައްކަތްކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ ޕްރޮޖެކްޓްތަކަށް މާލީ އެހީތެރިކަން ފޯރުކޮށްދިނުމަށް ހުޅުވާލެވިފައިވާ ފަންޑެކެވެ. މިހާތަނަށް ކޮމިއުނިޓީ ފަންޑުގެ ދަށުން 80 ޕްރޮޖެކްޓް ހިންގުމަށް ފައިސާގެ އެހީ ވަނީ ފޯރުކޮށްދެވިފައެވެ.
Advertisement
This content is created and paid for by advertisers and does not involve Voice Journalists
