ދިފާއީ ވަޒީރުގެ މަޤާމުގައި ހުންނަވާ، އަވައްޓެރި އިންޑިއާ ބޭނުންވެއްޖެ ނަމަ ދިވެހިރާއްޖެ ހިފިދާނެކަމަށް މާރިޔާ ދީދީ ވިދާޅުވި ހިސާބުން އެކަމަނާ ޑިފެންސް މިނިސްޓަރުގެ މަޤާމުން ޑިސްކޮލިފައިވާނެ ކަމަށް ރިޔާސީ އިންތިޚާބުގައި ވާދަކުރައްވާނެކަން އިއުލާނުކުރައްވާފައިވާ ކުރީގެ ބަންޑާރަނައިބު ޑރ މުހައްމަދު މުނައްވަރު ވިދާޅުވެއްޖެ އެވެ.
ޑރ މުނައްވަރު މިފަދައިން ވިދާޅުވެފައިވަނީ ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެކަން އިއުލާނުކުރައްވާ، އެކަމާއި ގުޅޭ ތަފްސީލުތައް ހާމަކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.
ޑރ މުނައްވަރު ވިދާޅުވީ އެމްޑީޕީގެ ބޭބޭފުޅުންނާއި ގާތް ގުޅުމެއް އޮތް ނަމަވެސް، ގައުމާއި ދޭތެރޭ ދެކިވަޑައިގަންނަވާ ގޮތާއި ގެންގުޅުއްވާ ތަސައްވުރުގައި ބޮޑެތި ތަފާތުތަކެއް ހުރި ކަމަށެވެ. އެގޮތުން ދެއްކިދާނެ ވާހަކަތަކާއި ނުދެއްކޭނެ ވާހަކަތަކުގެ އިންތައް ހުންނަން ވާނެކަމަށް ޑރ މުނައްވަރު ވިދާޅުވި އެވެ.
ޑިފެންސް މިނިސްޓަރު މާރިޔާ ދައްކަވާފައިވާ ބައެއް ވާހަކަތަކަށް އިޝާރާތްކުރައްވާ ޑރ މުނައްވަރު ވިދާޅުވީ ގައުމުގެ ދިފާއު ނުބެހެލެއްޓޭނެކަމަށް، ނުވަތަ މިނިވަންކަން ދިފާއުނުކުރެވޭނެ ކަމަށް ޤަބޫލުފުޅު ކުރައްވާ ބޭފުޅަކު ޑިފެންސް މިނިސްޓަރުކަމުގެ މަޤާމުގައި ހުރެވިގެން ނުވާނެ ކަމަށެވެ.
ޑިފެންސް މިނިސްޓަރު މާރިޔާ ވަނީ އިންޑިއާއިން ބޭނުންވެއްޖެނަމަ ރާއްޖެ ހިފިދާނެކަމަށް ވިދާޅުވެފައި ކަމަށާއި، އެކަމަނާ އެހެން ވިދާޅުވި ހިސާބުން ހަގީގަތުގައި އެ މަޤާމުން ޑިސްކޮލިފައި ވާނެކަމަށް ޑރ މުނައްވަރު ވިދާޅުވިއެވެ.
"އެނގިވަޑައިގަންނަވާނެ މާރިޔާ އަހުމަދު ދީދީ ޑިފެންސް މިނިސްޓަރަކަށް ހުންނަވައިގެން އެބަ ވިދާޅުވޭ އިންޑިއާ ބޭނުންއިރަކު މި ގައުމު ހިފިދާނެއޭ. އެހިސާބުން އެކަމަނާ ޑިސްކޮލިފައިވީ ރާއްޖޭގެ ދިފާއީ ކަންތަކާއި ހަވާލުވެ ހުންނަވަން. މޯރަލީ ދެން ޖެހޭނީ ވަކިވެވަޑައިގަންނަވަން. އެއީ ގައުމުގެ ދިފާއު ނުބެލެހެއްޓޭނެކަމަށް ގައުމު މިނިވަން ދައުލަތެއްގެ ގޮތުގައި ނުދެމެހެއްޓޭނެކަމަށް ގަބޫލުފުޅުކުރައްވާ ބޭފުޅަކު ބަހައްޓަވައިގެން ނުވާނެ. ހުންނަވައިގެން ނުވާނެ"
ޑރ މުހައްމަދު މުނައްވަރު
ޑރ މުނައްވަރު ވިދާޅުވީ އިންޑިއާއިން ބޭނުންވިޔަސް ރާއްޖެ ނުހިފޭނެ ކަމަށެވެ. ބޮޑު ގައުމަކުން ކުޑަ ޤައުމަކަށް އަރައި، އެ ގައުމު އެމީހުންގެ ބާރުގެ ދަށަށް ގެންދިއުމަކީ ބައިނަލްއަގްވާމީ އެއްވެސް ގާނޫނެއް ތަންދޭ ކަމެއް ނޫންކަން މިހާރު ހިނގަމުންދާ ރަޝިޔާ-ޔޫކުރެއިން ހަނގުރާމައިން ވެސް އެނގިގެންދާނެކަމަށް ޑރ މުނައްވަރު ވިދާޅުވި އެވެ.
އެހެންކަމުން، ޒިންމާދާރު މަގާމެއްގައި ހުންނަވާއިރު ޒިންމާދާރުކަން ކުޑަކޮށް ވާހަކަފުޅު ދެއްކެވުމަކީ އެކަމަނާ އެ މަގާމަށް ކުފޫ ހަމަނުވާކަން އަންގައިދޭ ކަމެއްކަމަށް އިޝާރާތް ކުރައްވާ ޑރ މުނައްވަރު ވިދާޅުވީ އަމިއްލަފުޅަށް ޑިފެންސް މިނިސްޓަރުގެ މަގާމުން މާރިޔާ އިސްތިއުފާދެއްވަން ޖެހޭ ކަމަށެވެ.
Advertisement
This content is created and paid for by advertisers and does not involve Voice Journalists
