އިންތިޚާބުތަކުގައި ރިޝްވަތުކަމަށް ބަލާނީ ކޮން ކަންތައްތަކެއްކަން ބަޔާންކުރާ މަޖިލީހަށް ހުށަހަޅައިފިއެވެ.

މި އިސްލާހު ހުށަހަޅާފައިވަނީ ސަރުކާރުގެ ފަރާތުން ސަރުކާރުގެ ފަރާތުން ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒު އެވެ. 

މުއިއްޒު ހުށަހެޅުއްވި މި އިސްލާހުގައި ވާގޮތުން، އިންތިޚާބާ ގުޅިގެން އާންމު ތަސައްވުރެއް ނުވަތަ ސިޔާސަތެއް ހަމާކުރުން ފިޔަަވައި އެއިން ސިޔާސަތެއް ނުވަތަ ތަސައްވުރަކާ ގުޅޭ ގޮތުން ކެނޑިޑޭޓަކު އާންމުކޮށް ވައުދުވާވުން ފިޔަވައި، ކެނޑިޑޭޓަށް ތާއީދު ހޯދުމަށްޓަކައި ނުވަތަ އެހެން ކެނޑިޑޭޓެއްގެ އިންތިޚާބީ ހައްގަކަށް ނުރަނގަޅު އަސަރު ފޯރުވުމަށް ވަކި ފަރުދަކަށް ނުވަތަ ޖަމާޢަތަކަށް ނުވަތަ އާންމު ފައިދާއަށް ސީދާ ގޮތުން ނުވަތަ ނުސީދާ ގޮތުން ވިޔަސް އެއްވެސް ފައިސާއެއް ނުވަތަ މަންފާއެއް ނުވަތަ އެނޫންވެސް އެއްޗެއް ދިނުމާއި، އެއްވެސް ބާވަތެއްގެ ޚިދުމަތެއް ފޯރުކޮށްދިނުން ނުވަތަ އެއިން ކަމެއް ކޮށްދޭން ވައުދުވުމަކީ ރިޝްވަތު ދިނުމެވެ.

Advertisement

އަދި މީގެ އިތުރުން ވޯޓާ ގުޅޭ ލިޔެކިޔުން ނައްތައިލުމާއި ރައްކާތެރިކުރުމާ ގުޅޭ މާއްދާތަކެއް  މުޢިއްޒު ހުށަހެޅި އިސްލާހުގައި ހިމަނާފައިވާއިރު އޭގައި ވާގޮތުން އިންތިޚާބުގެ ރަސްމީ ނަތީޖާ އިއުލާނުކުރާ ފަހުން 30 ދުވަހުގެ މުހުލަތެއް ފާއިތުވަންދެން އެ އިންތިޚާބެއްގައި ވޯޓުލުމުގައި ބޭނުންކޮށްފައިވާ ބައެއް ލިޔުންތައް ރައްކާތެރިކަމާއެކު އިލެކްޝަންސް ކޮމިޝަނުން ބަލަހައްޓަންޖެހޭނެއެވެ.

އެ ލިޔެކިޔުންތަކުގެ ތެރޭގައި ހިމެނެނީ ވޯޓާބެހޭ މައި މަރުކޒަށް ފޮނުވާފައިވާ ހުރިހާ ލިޔެކިޔުމާއި ތަކެތީގެ އިތުރަށް ވޯޓު ކަރުދާސް ދޫކުރެވުނު މީހުން ފާހަގަކޮށްފައިވާ ލިސްޓު ހިމެނޭހެން ވޯޓުލާ މަރުކަޒުތަކުގައި ބޭނުންކޮށްފައިވާ ވޯޓުލުމުގެ ހައްގު ލިބިފައިވާ މީހުންގެ ލިސްޓެވެ.

އަދި ހަމަ އެހެންމެ، ބާކީ ހުރި ވޯޓު ކަރުދާހާއި ކަރުދާހުގެ ކައުންޓާ ފޮއިލާއި ވޯޓުލުމަށް ބޭނުންކުރި ވޯޓުކަރުދާހާއި އެ ވޯޓު ކަރުދާހުގެ ކައުންޓާ ފޮއިލް، ހަލާކުވެފައި ހުރި ވޯޓު ކަރުދާހާއި، ވޯޓު ގުނާފައިވާ ވޯޓް ކަރުދާސް ފަދަ ލިޔުންތައް، އިންތިޚާބާ ގުޅޭ މައްސަލައެއް ކޯޓަކަށް ހުށަހެޅިފައި ނުވާކަން ކަށަވަރުކުރުމަށްފަހު ކަނޑައެޅިފައިވާ އުސޫލުގެ މަތިން ނައްތާލެވޭނެ ކަމަށްވެސް ބުނެފައިވެއެވެ. 

މީގެ އިތުރުން، ވޯޓުލާ މަރުކަޒުތަކަށް ރަޖިސްޓަރީވެފައިވާ މީހުންގެ އަދަދުގެ 1 އިންސައްތައަށްވުރެ އިތުރުނުވާ އަދަދަކަށް އިތުރު ވޯޓު ކަރުދާސް ފޮނުވަންވާނެކަމަށާއި، ވޯޓު ލާ މީހުންގެ އަދަދު 100 މީހުންނަށްވުރެ މަދު މަރުކަޒުތަކަށް ގިނަވެގެން އިތުރަށް އެއް ވޯޓު ކަރުދާސް ފޮނުވަންވާނެކަމަށް އެ އިސްލާހުގައި ބުނެފައިވެއެވެ.