ވ އާރަށުގެ ޚިޔާނާތް ސާބިތުވާކަމަށް ކަނޑައަޅާ ވާދަވެރި ސިޔާސީ ލީޑަރު އަދި ކުރިއަށް އޮތް ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ޖަލު ހުކުން ކުރުމަށް އެ މައްސަލަ ބެއްލެވި ފަނޑިޔާރު އަހުމަދު ޝަކީލާއެކު ހެދި ޑީލު ސަރުކާރުން ތަންފީޒުކޮށް ނިންމައިފިކަމަށް މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެ އެވެ. 

ރައްޔިތުންގެ މިއަދުގެ ޖަލްސާގައި ބަހުސް ކުރައްވަމުން ސައީދު ވަނީ ފުލުފުލުގައި ސަރުކާރުން އިސްލާހުތައް ހުށައަޅަމުންދާއިރު ޖުޑިޝަލް ސާވިސް ކޮމިޝަނަށް އޮތް ސިޔާސީ ނުފޫޒު ނައްތާލުމަށް ހުށައަޅާނެކަމަށް ބުނި ޖޭއެސްސީގެ ކޮމްޕޮސިޝަން ބަދަލުކުރާ އިސްލާހު ދައުރު ނިމެންދާއިރު ވެސް ހުށައަޅާފައި ނުވާތީ ފާޑުވިދާޅުވެފަ އެވެ. 

ޝަރުއީ ދާއިރާއަށް އޮތް ނުފޫޒު ސިފަކޮށްދެއްވާ މަޒާޖީ ގޮތަކަށް ސައީދު ވިދާޅުވީ ޝަރުއީ ދާއިރާއަށް އައި އެންމެ ބޮޑު އިސްލާހަކީ ދަށު ކޯޓުން ހުކުން ކުރާ ފަނޑިޔާރު، އެ މައްސަލަ ހައިކޯޓުގައި އިސްތިއުނާފު ކުރާ ހިސާބުން އެ ކޯޓަށް އޮޓޯއިން ޕްރޮމޯޓުވާ އިސްލާހު ކަމަށެވެ. 

Advertisement

ސައީދުގެ އެ މިސާލުގައި އިޝާރާތް ކުރެއްވީ ވ. އާރަށުގެ މައްސަލައިގައި ރައީސް ޔާމީންގެ މައްޗަށް ދަށު ކޯޓުން ހުކުން ކުރި ފަނޑިޔާރު އަހުމަދު ޝަކީލު، އެ މައްސަލަ ހައިކޯޓުގައި އިސްތިއުނާފު ކުރި ފަހުން ހައިކޯޓުގެ ފަނޑިޔާރެއްގެ ގޮތުގައި އައްޔަންކޮށް އޭނާއަށް ހުވާލައިދިން މައްސަލައަށެވެ. 

ސައީދު ވިދާޅުވީ ރައީސް ޔާމީންގެ މައްޗަށް ވ އާރަށުގެ މައްސަލައިގައި ހުކުމް ކުރީ ފަނޑިޔާއާއެކު ޑީލު ހަދައިގެންކަމަށް އޭރުވެސް އިދިކޮޅުން ތުހުމަތު ކުރަމުން ދިޔަކަމަށެވެ. އަދި ހައިކޯޓަށް ޝަކީލު ޕްރޮމޯޓުކޮށް އޭނާއަށް ހުވާލައިދީ މިހާރު ސަރުކާރުން އެ ޑީލު ތަންފީޒުކޮށް ނިންމާފައިވާކަމަށް ސައީދު ވިދާޅުވި އެވެ. 

ވ އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް ދައުލަތުން ވަނީ ދެ ދައުވާއެއް އުފުލާފަ އެވެ. އެއީ ރިޝްވަތު ގަބޫލުކުރި ކަމުގެ ކުށުގެ ދައުވާއާއި މަނީ ލޯންޑާ ކުރިކަމުގެ ކުށުގެ ދައުވާއެވެ.

އެ މައްސަލަ ބެއްލެވި ފަނޑިޔާރު ވަނީ އެ ދެ ދައުވާ ވެސް ރައީސް ޔާމީންގެ މައްޗަށް ސާބިތުވާކަމަށް ކަނޑައަޅާފަ އެވެ. 

އެހެން ނަމަވެސް އެމަނިކުފާނުގެ ފަރާތްޕުޅުން މިހާރު އެ މައްސަލަ ވަނީ ހައިކޯޓުގައި އިސްތިއުނާފު ކޮށްފައެވެ.

ރައީސް ޔާމީންގެ ގާނޫނީ ވަކީލުން ވިދާޅުވާ ގޮތުގައި، އެމަނިކުފާނުގެ މައްޗަށް ދައުވާ ސާބިތުވާކަމަށް ކަނޑައެޅި އެއްވެސް ހުއްޖަތެއް ފަނޑިޔާރަށް ދެއްކިފައެއް ނުވެއެވެ. އަދި މައްސަލައިގެ ހުކުމް ކޮށްފައިވަނީ "ސަބަބުވެރި އިންސާނެއްގެ ވިސްނުމުން" ކަމަށް ގާޒީ ވިދާޅުވުމަކީ ބޮޑު ގޯހެއްކަން އެ ބޭފުޅުން ފާހަގަކުރައްވަ އެވެ. 

އޭގެ އިތުރުން މައްސަލަ ނިންމި ގޮތުގެ ޚުލާސާ ރިޕޯޓާއި، ޝަރީއަތް ހިނގައިދިޔަ ގޮތުގެ ރިޕޯޓުގައި ބޮޑެތި ފުށުއެރުންތަކެއް ހުރިކަންވެސް ގާނޫނީ ވަކީލުން ފާހަގަކުރައްވައެވެ.

އޭގެ ތެރޭގައި ހެކިންގެ ހެކިބަހަށް އުނިއިތުރު ގެނެސްފައި ހުރުމާއި، ދައުލަތުން އެއް މައްސަލައެއްގައި ހުށައެޅި ލިޔެކިޔުންތައް ބަދަލުވެފައި ހުރުން ފަދަ މައްސަލަތައް ގާނޫނީ ޓީމުން ފާހަގަކުރައްވަ އެވެ. 

އެއާއެކު ރައީސް ޔާމީންގެ ގާނޫނީ ޓީމުން ވަނީ ހައިކޯޓުން އެ މަނިކުފާނު މިނިވަންވާނެ ކަމުގެ ޔަގީންކަންވެސް ދެއްވާފަ އެވެ. އަދި ދަށު ކޯޓުން ހަދާފައިވާ ބޮޑެތި ގޯސްތައް ހައިކޯޓުގެ ފަނޑިޔާރުން ތަކުރާރު ނުކުރައްވާނެކަމަށް އުންމީދުކުރައްވާކަމަށް ވެސް ރައީސް ޔާމީންގެ ގާނޫނީ ވަކީލުން ވިދާޅުވެ އެވެ.