ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ފަށާފައިވާ އެންމެ ބިޔަ މަޝްރޫޢު، މާލެ އާއި ވިލިމާލެ އަދި ތިލަފުއްޓާއި ގުޅީފަޅު ގުޅާލާ، ތިލަމާލޭ ބްރިޖު މަޝްރޫއުގެ މަސައްކަތުގެ ޝެޑިއުލް ހާމަކޮށްދެވެން ނެތް ކަމަށް ޕްލޭނިންގ މިނިސްޓްރީން ބުނެފިއެވެ. 

"މައުލޫމާތު ހޯދައި ލިބިގަތުމުގެ ގާނޫނު" ގެ ދަށުން އަމިއްލަ ފަރާތަކުން ތިލަމާލޭ ބްރިޖު މަޝްރޫއުގެ ޝެޑިއުލް ހާމަކޮށްދެއްވުމަށް އެދި ޕްލޭނިންގ މިނިސްޓްރީ އަށް ފޮނުވާފައިވާ ސިޓީއެއްގެ ޖަވާބުގައި އެމިނިސްޓްރީން ވަނީ އެކަން ކޮށްދެވެން ނެތް ކަމަށް ބުނެފައެވެ. 

އޭގެ ސަބަބެއް ކަމުގައި ޕްލޭނިންގ މިނިސްޓްރީން ބުނީ، އެ މަޝްރޫއު ކުރިއަށް ގެންދިއުމަށް ކޮންޓްރެކްޓަރާ އެއްބަސްވުމުގައި ހިމެނޭ ބައިތަކުގެ ކޮންފިޑެންޝަލިޓީ ހިފަހައްޓަން ޖެހޭތީ ކަމަށެވެ. އަދި އެ މަޝްރޫއުގެ ޝެޑިއުލް އަކީވެސް އެއްބަސްވުމުގެ ބައެއް ކަމަށްވާ ކަން އެ މިނިސްޓްރީން ވަނީ ފާހަގަކޮށްފަ އެވެ. 

Advertisement

މީގެ އިތުރުން އެ މިނިސްޓްރީން ބުނީ، ބުރިޖުގެ މަސައްކަތް ނިންމުމަށް ހަމަޖެހިފައިވަނީ ދެ މައިލްސްޓޯންއަކަށް ބަހާލައިގެން ކަމަށެވެ. އެގޮތުން، ފުރަތަަމަ މައިލްސްޓޯންގައި މާލެއިން ފެށިގެން ގުޅިފަޅަށް ބްރިޖުގެ މަސައްކަތް ކުރިއަށް ގެންދެވޭނެ ކަމަށާ، އެކަން މި އަހަރުގެ ޑިސެމްބަރު މަހުގައި ނިމޭނެ ކަމަށް ބުނެފައިވެއެވެ. އަދި ދެވަނަ މައިލްސްޓޯންއަކީ 2024 ވަނަ އަހަރުގެ މެއި މަހަށް ގުޅިފަޅުން ތިލަފުށްޓާއި ހަމައަށް ބްރިޖުގެ މަސައްކަތް ނިންމުން ކަމަށްވެސް މިނިސްޓްރީން ބުނެފައިވެއެވެ.

ބްރިޖުގެ މަސައްކަތް އެކަށީގެންވާ ސްޕީޑުގައި ކުރިއަށްނުދާކަމަށާ، ސަރުކާރުން އެކަމުގައި އެކި ފަހަރު އެކި ތާރީޚް ބުނަމުންދާތީ ގިނަ ބައެއްގެ ފާޑުކިޔުންތައް ވަނީ އެކަމަށް އަމާޒުވެފައެވެ. 

އިންޑިއާގެ އެފްކޮންސް އިންފްރާސްޓްރަކްޗާ ލިމިޓެޑާއި ދިވެހި ސަރުކާރާއެކު ތިލަމާލެ ބްރިޖުގެ މަޝްރޫއުގެ އެއްބަސްވުމުގައި ސޮއިކުރީ 2021 ވަނަ އަހަރު އެވެ. އެ މަޝްރޫއު ކުރިއަށްގެންދަނީ އިންޑިއާއިން ދޭ 100 މިލިއަން ޑޮލަރުގެ ހިލޭ އެހީ އާއި އެ ގައުމުގެ އެގްޒިމް ބޭންކުން ދޫކުރާ 400 މިލިއަން ޑޮލަރުގެ ލައިން އޮފް ކްރެޑިޓްގެ އެހީގަ އެވެ.