ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދައުލަތުގެ އެއްވެސް ވަޞީލަތެއްގެ ބޭނުން ނަހަމަގޮތުގައި ނުކުރައްވާކަން މަޖިލީހުގެ މާލިއްޔަތު ކޮމެޓީގެ މެމްބަރެއްގެ ހައިސިއްޔަތުން އެނގިވަޑައިގަންނަވާކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެ އެވެ.
ޝަރީފު މިފަދައިން ވިދާޅުވެފައިވަނީ ރާއްޖޭގައި ބާއްވާ އިންތިހާބުތަކަށް ސަރުކާރުން ނުފޫޒު ފޯރުވަމުންދާތީ އިންތިހާބުތައް އިންސާފުވެރި ކުރުމަށާއި މިނިވަން ކުރުމަށް ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒުކޮށް މަގުފަހި ކުރަން ގޮވާލައި ރައްޔިތުންގެ މަޖިލީހަށް ޤަރާރެއް ހުށައެޅުއްވުމާއި ގުޅިގެން ކުރެއްވި ޓްވީޓެއްގަ އެވެ.
ޝަރީފުު ވިދާޅުވިގޮތުގައި ރައްޔިތުންގެ ލާބަޔާއި މަންފާއަށްޓަކައި ރާއްޖޭގެ އެކި ކަންކޮޅުތަކުގައި ހިންގޭ މަޝްރޫޢުތައް މޮނިޓާކުރެއްވުމާއި ރައްޔިތުންނާއި ބައްދަލުކުރެއްވުމަށް ރައީސުލްޖުމްހޫރިއްޔާގެ ހައިސިއްޔަތުން އިބްރާހިމް މުހައްމަދު ޞާލިހު ކުރައްވާ ދަތުރުފުޅުތަކުގެ އޮފްކަން ކަނޑުވާލުމަށް އިދިކޮޅުން ދައްކަމުންދާ ވާހަކަތަކަކީ ރައްޔިތުންގެ މެދުގައި ބައިބައިވުން އުފައްދާ ފިތުނަވެރިކުރުމަށް ދައްކާ ވާހަކަތަކެކެވެ.
ދައުލަތުގެ އެއްވެސް ވަސީލަތެއްގެ ބޭނުން ނަހަމަގޮތުގައި ރައީސް ޞާލިހު ނުކުރައްވާކަމަށް ހެކިވެވަޑައިގަންނަވާކަން ފާހަގަކުރައްވާ ޝަރީފު ވިދާޅުވީ އެކަން އިދިކޮޅު ފަރާތްތަކަށްވެސް ރަނގަޅަށް އެނގިވަޑައިގަންނަވާނެ ކަމަށެވެ. އަދި ރައީސް ޞާލިހުގެ ދަތުރުފުޅުތަކާއި ގުޅިގެން އިދިކޮޅުން ދައްކާ ވާހަކަތަކަކީ ސިޔާސީ އުކުޅެއްގެ ގޮތުގައި ޝަރީފު ސިފަކުރެއްވި އެވެ.
އެއާއެކު އޭނާ ވިދާޅުވީ ރައީސް ޞާލިހުގެ ދަތުރުފުޅުތަކާއި ގުޅިގެން އިދިކޮޅު ފަރާތްތަކުން ދައުލަތުގެ ވަސީލަތް ނަހަމަގޮތުގައި ބޭނުންކުރާކަމަށް ވާހަކަދައްކަވަނީ ސިޔާސީ ހަސަދަވެރިކަން އޮތުމުން ކަމަށެވެ.
ވަކިން ޚާއްސަކޮށް މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ރައީސް ޞާލިހާއި ގުޅޭގޮތުން ދައްކަވަމުން ގެންދަވާ ވާހަކަތަކީ ހަގީގަތާއި ޚިލާފު ހަސަދަވެރި ވާހަކަތަކެއްކަމަށް ޝަރީފު ވިދާޅުވި އެވެ.
ޝަރީފު މިފަދައިން ވިދާޅުވެފައިވާއިރު، އިންތިޚާބުތަކުގައި ރައީސް ޞާލިހު ކުރައްވާ ރަސްމީ ނުރަސްމީ ދަތުރުތައް ޤާނޫނެއްގެ ތެރެއިން ވަކިކުރަން ޖެހޭކަމަށް މަޖިލީހުގައި ނަޝީދަށް ތާއީދުކުރައްވާ ބައެއް މެމްބަރުން ވަނީ ވިދާޅުވެފަ އެވެ. އަދި އިންތިޚާބުތަކާއި ދިމާކޮށް ދައުލަތުގެ މުދާ ނަހަމަ ގޮތުގައި ބޭނުންކުރުން ހުއްޓުވުމަށް މަޖިލީހުން މަސައްކަތްކުރުމަށް ވެސް ބައެއް މެމްބަރުން ގޮވާލެއްވި އެވެ.
Advertisement
This content is created and paid for by advertisers and does not involve Voice Journalists
