ސަރުކާރުން އޮތީ ސަރުކާރު ހިއްސާވާ ކުންފުނިތަކަށް ކޮރަޕްޝަން ހިންގުމުގެ އެންމެހާ ކަންކަން ކުރުމަށް މަތިކޮށްފައި ކަމަށް މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެ އެވެ.
އާޒިމް މިފަދައިން ވިދާޅުވެފައިވަނީ ކޮރަޕްޝަނާއި ދެކޮޅަށް މަސައްކަތް ކުރާ ގްލޯބަލް އޯގަނައިޒޭޝަން އޮފް ޕާލިމަންޓޭރިއަންސް އެގެއިންސްޓް ކޮރަޕްޝަން (ގޯޕެކް) ގައި ރައްޔިތުންގެ މަޖިލީހުން ބައިވެރިވުމާއި ގުޅިގެން މަޖިލީހުގެ ރިޔާސަތުން ހުށައަޅާފައިވާ މައްސަލައަށް ބަހުސްކުރައްވަމުން ނެވެ.
އާޒިމް ވިދާޅުވީ ރާއްޖެ ދުވަހަކުވެސް ނުދެކޭފަދަ މިންވަރަކަށް ކޮރަޕްޝަނުގެ ކަންކަން މިހާރު ފުޅާވެފައިވާ ކަމަށެވެ.
ވަކިން ޚާއްސަކޮށް މިއަދު ސަރުކާރުން ސަރުކާރު ކުންފުނިތައް ބޭނުން ކުރަމުންދަނީ ކޮރަޕްޝަން ހިންގުމަށްކަމަށް އޭނާ ވިދާޅުވި އެވެ. އަދި އެއީ ފާޅުކަން ބޮޑުގޮތެއްގައި ކުރަމުންދާ ކަމެއްކަންވެސް ފާހަގަކުރެއްވި އެވެ.
"ސަރުކާރު ހިއްސާވާ ކުންފުނިތަކަކީ މިއަދު ކަރަޕްޝަންގެ އަމަލުތައް ހިންގުމަށް ސަރުކާރުން ސީދާ މަތިކޮށްފައިވާ ފަރާތްތައް. އެމީހުން ކަރަޕްޝަންގެ އަމަލުތައް ހިންގުމަށް ސަރުކާރުގެ ވަޒީރުން އެދަނީ މަޖުބޫރު ކުރަމުން. އެ ކުންފުނިތައް ހިންގުމަށް ތަފާތު އެކި އެކި ފަރާތްތައް ލުމަށްފަހު އެ ފަރާތްތަކާއި ގުޅާފަ މިވެނި މީހަކަށް ވަޒީފާ ދީ.. މިވެނި މީހަކަށް ޕްރޮޖެކްޓު ދީ، މި މަޖިލީހުގެ އެތައް މެމްބަރުންނަށް އެދަނީ އެ ކަންކަން ކުރަމުން"
މެދުހެންވޭރު ދާއިރާގެ މެމްބަރު އަލީ އާޒިމް
އާޒިމް ވިދާޅުވީ އެފަދަ ކަންކަން ހުއްޓުވުމަށްޓަކައި މަޖިލީހުން ގޯޕެކްގައި ބައިވެރިވުމަކީ މުހިންމު ކަމެއްކަމަށް ދެކެވަޑައިގަންނަވާ ކަމަށެވެ.
އާޒިމް އިތުރަށް ވިދާޅުވީ މަޖިލީހުގެ ކޮންޓްރޯލު ރައީސުލްޖުމްހޫރިއްޔާގެ އަތްޕުޅުގައި އޮތްކަމަށް އިއުލާނުކުރެއްވުމުން މަޖިލީހުގައި ކޮރަޕްޝަން އޮތް މިންވަރު ވަޒަންކޮށްލެވޭނެ ކަމަށެވެ.
އެހެން ނަމަވެސް ކުރިއަށް އޮތް ތަނުގައި ވަރަށް އަވަހަށް އެކަން ބަދަލުކުރެވި ސަރުކާރު ޖަވާބުދާރީ ކުރުވުމުގެ ކަންކަން މަޖިލީސްތެރެއިން ކުރަން ފެށޭނެކަމަށް އާޒިމް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
