ހދ. ކުޅުދުއްފުށީގައި ނުރައްކާތެރި އެކްސިޑެންޓެއް ހިނގައި ހަތަރު މީހުނަށް އަނިޔާވެއްޖެއެވެ.
މިއަދު މެންދުރު ކުރިން އެރަށުގައި ހިނގި މި އެކްސިޑެންޓްގައި ވަނީ ތިން ސައިކަލުޖެހި، ހަތަރު މީހަކަށް އަނިޔާ ވެފައެވެ. އެ ހާދިސާގެ ރިޕޯޓު ފުލުހުންނަށް ލިބިފައި ވަނީ މިއަދު 11:15 ހާއިރު ކަމަށް ފުލުހުން ބުނެފައިވެއެވެ.
"މި އެކްސިޑެންޓުގައި ހަތަރު މީހަކަށް އަނިޔާވެގެން ކުޅުދުއްފުށި ރީޖަނަލް ހޮސްޕިޓަލުގައި އަންނަނީ ފަރުވާދެމުން،" ފުލުހުން ބުންޏެވެ.
މައުލޫމާތު ލިބިފައިވާ ގޮތުގައި، ހާދިސާގައި އަނިޔާވި ހަތަރު މީހުންގެ އިތުރުން، ހާދިސާ ހިނގި ވަގުތު އެތަނުގައި ހުރި މީހެއްގެ މެޔަށް ތަދެއް އަރައިގެން އެމީހާވެސް ވަނީ ކުޅުދުއްފުށި ރީޖަނަލް ހޮސްޕިޓަލަށް ގެންގޮސްފައެވެ.
މި ހާދިސާގައި އަނިޔާވި މީހުންނަށް ބޭރު ފުށުން މާ ބޮޑު އަނިޔާވެފައި ހުރި ކަމަށް ނުފެންނާތީ އެތެރެހަށީގެ އެއްވެސް އަނިޔާއެއް ވެފައި ހުރިތޯ ހޮސްޕިޓަލުން ދަނީ ބަލަމުންނެވެ.
މައުލޫމާތު ލިބިފައިވާ ގޮތުގައި މި އެކްސިޑެންޓް ހިނގާފައި ވަނީ އެ ރަށުގައި އެންމެ ކާރުބާރުބޮޑު މަގުގައެވެ. އަދި މި އެކްސިޑެންޓުގައި ސައިކަލުތައް ވަރަށް ބޮޑަށް ހަލާކުވެފައި ވާކަމަށް މަންޒަރު ދުއް ފަރާތްތަކުން ބުނެއެވެ.
Advertisement
This content is created and paid for by advertisers and does not involve Voice Journalists
