އެމްޑީޕީގެ ރައީސް މުޙައްމަދު ނަޝީދު އިސްކޮށް ހުންނަވާ އެމްޑީޕީގެ ތެރެއިން އުފައްދާފައިވާ "ފިކުރެއްގެ ދިރުން" ގޮފި މަޖިލީހުގައި ހިންގަން ޖާގައެއް ނުދެވޭނެކަމަށް މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ރޮޒެއިނާ ވަނީ ނަޝީދު އިސްވެ ހުންނަވާ އުފައްދަވާފައިވާ ގޮތްޕަކީ "ފަކުރެއްގެ ދިރުން" ކަމަށް ސިފަކުރައްވާފަ އެވެ.
އެ ގޮފިން ވަކި ޕީޖީއެއް ހަދައިގެން ކުރަން އުޅޭ މަސައްކަތަކީ ސިޔާސީ ޕާޓީތަކުގެ ގަވައިދާއި ރައްޔިތުންގެ މަޖިލީހުގެ އުސޫލުތައް ތަންދޭ ކަމެއް ނޫންކަމަށް އޭނާ ވިދާޅުވި އެވެ. އަދި ވިދާޅުވީ ނަޝީދުގެ ގޮފި ހިންގަން މަޖިލީހުގައި ޖާގައެއް ނުދެއްވާނެ ކަމަށެވެ.
"ފަކުރެއްގެ ދިރުން... މާފުކުރައްވާ! ފިކުރެއްގެ ދިރުން މިތާ ތެރޭގައި ހިންގާކަށް، މިއީ އެ ޖާގަ އޮތް ތަނެއް ނޫން. މިތާގައި ހިނގަނީ ސިޔާސީ ޕާޓީތައް. ސިޔާސީ ޕާޓީތައް ހިނގާ އުސޫލުވެސް ބައެއް ބޭފުޅުން މިހާރު ހަނދާން ނެތިގެން އުޅޭތީ އަޅުގަނޑުމެން މިއަދު ހިތާމަކުރަން ޖެހޭ"
މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް
ރޮޒެއިނާ ވިދާޅުވީ ރައީސް ނަޝީދަށް ތާއީދު ކުރައްވާ ބައެއް މެމްބަރުން ހުށައަޅުއްވާ ގަރާރަށް ވޯޓު ނުދެއްވަނީ ވެސް އުސޫލުން ބޭރުން ކަންކަން ކުރައްވަމުން ގެންދަވާތީ ކަމަށެވެ.
ޕާޓީގެ ޕާލަމެންޓްރީ ގުރޫޕަށް ހުށައަޅައިގެން އެ އޮންނަ އުސޫލުގެ ތެރެއިން ކަންކަން ކުރުމުގެ ބަދަލުގައި ތިމާމެން ހިތަށް އެރިހާ ގޮތަކަށް ކަންކަން ކުރާނަމަ އުސޫލުތައް ނެގެހެއްޓުމަށް ގަރާރުވެސް ބޭރުކުރަން ޖެހޭ ކަމަށާއި، އެއާ ގުޅޭ އިތުރު ފިޔަވަޅުތައްވެސް އަޅަން ޖެހޭކަމަށް އޭނާ ވިދާޅުވި އެވެ.
"މިއަދު އެމްޑީޕީގެ ބައެއް މެމްބަރުން މިތަނަށްލާ ޤަރާރުތަކަށް އަޅުގަނޑުމެން ނޫނެކޭ ބުނަން މަޖިބޫރުވެގެން މި ދަނީ އުސޫލުން ނެއްޓިގެން އުޅޭތީ. މިއަދުވެސް މިތަނުގައި ވާހަކަދެކެވުނު އެއް ގަރާރަށް އަޅުގަނޑުމެން ނޫނެކޭ ބުނަން ޕާޓީގެ ޕާލަމެންޓްރީ ގުރޫޕުން މިހާރު ވަނީ ނިންމާފަ. ޤަރާރު ގޯސްވެގެނެއް ނޫން. ހަމަތަކާއި އުސޫލުތައް އަޅުގަނޑުމެންގެ ޕާޓީގެ ތެރޭގައި ހިފެހެއްޓުމުގެ މުހިންމު ކަމާހުރެ"
މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް
އެމްޑީީޕީ އަކީ ދިވެހިރާއްޖޭގައި އޮތް އެންމެ ގިނަ ދުވަސްވީ ޑިމޮކްރެޓިކް ޕާޓީއަށް ވީ ނަމަވެސް، ނިމިދިޔަ އެމްޑީޕީގެ ރިޔާސީ ޕްރައިމީއިން ނާކާމިޔާބުވުމާއި ގުޅިގެން ބަލި ގަބޫލު ނުކުރެއްވިގެން ޕާޓީގެ ރައީސް މުހައްމަދު ނަޝީދު މުޅި ސިޔާސީ ނިޒާމު ގަޑުބަޑުކުރުމަށް މަސައްކަތް ކުރަމުންދާކަމަށް ރޮޒެއިނާ ވިދާޅުވި އެވެ.
އެއާއެކު ރޮޒެއިނާ ވަނީ އެމްޑީޕީއިން 17 އަހަރު ވަންދެން ޑިމޮކްރަސީއަށްޓަކައި ކުރި މަސައްކަތުން ރައްޔިތުންނަށް ނަގައިދޭން ބޭނުންވާ ފިލާވަޅަކީ އެއީ ތޯ އައްސަވާ ސުވާލު ކުރައްވާފަ އެވެ.
"ހިތާމަކުރަން ޖެހެނީ މިއަދު ޕްރައިމަރީއަކުން ބަލިވީމާ އެކަން ގަބޫލު ނުކުރެވިގެން ފަކުރެއްގެ ދިރުން.. މާފުކުރައްވާ އިއްޒަތްތެރި ރައީސް އަޅުގަނޑަށް ހަމަ އެހެން ކިޔެނީ.. ފިކުރެއްގެ ދިރުން ހައްދަވައިގެން މި ކުރައްވާ މަސައްކަތަކީ މުޅި ސިޔާސީ ނިޒާމު ގަޑުބަޑުކުރުން. މުޅި ސިޔާސީ ޕާޓީތައް އުފެދިފަ އޮތް މައިގަނޑު މަޤްޞަދު ގަޑުބަޑުކުރުން"
މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް
ރޮޒެއިނާ އިތުރަށް ވިދާޅުވީ އިދިކޮޅު ފަރާތްތަކާއި ގުޅިގެން ރައީސް ނަޝީދުގެ "ފަކުރެއްގެ ދިރުން" ގެ މެމްބަރުން އެމްޑީޕީގެ މެމްބަރުންނަށް މަޖިލީހުގައި ޖެއްސުން ކުރަމުންދާ ކަމަށެވެ. އަދި ސަރުކާރު ކުޑައިމީސް ކުރުމުގެ މަސައްކަތްތައް ވެސް ކުރަމުންދާ ކަމަށެވެ.
އެހެން ނަމަވެސް މަޖިލީހުގައި މެމްބަރުން މަސައްކަތް ކުރަމުންދަނީ އިންތިޒާމުވެގެން މަޖިލީހުގެ ޤަވައިދާއި އެއްގޮތްވާ ގޮތުގެ މަތިން ކަމަށާއި، އެހެން ނަމަވެސް މަޖިލީހުގެ ރިޔާސަތުގައި ރައީސް މުހައްމަދު ނަޝީދު އިންނަވާ އެ ގަވައިދުތައްވެސް ނުހިފަހައްޓަވާ މަޖިލީސް ހިންގަވަމުން ގެންދާކަމަށް ރޮޒެއިނާ ވިދާޅުވި އެވެ.
އެއީ ރައްޔިތުންގެ މަޖިލީހުގައި އަމަލުކުރައްވަން ޖެހިވަޑައިގަންނަވާ ގޮތެއް ނޫން ކަމަށާއި، ނަޝީދާއި އޭނާގެ ވަފާތެރިން އަމަލުކުރައްވަމުން ގެންދާގޮތުގެ ސަބަބުން މަޖިލީހުގައި މަސައްކަތް ކުރުމަށް ވަރަށް ބޮޑެތި ހުރަސްތައް ކުރިމަތިވަމުން އަންނަކަމަށް ރޮޒެއިނާ ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
