މި ސަރުކާރު ކޯލިޝަންގައި ހިމެނޭ ކުރީގެ ރައީސް މައުމޫނު އަބްދުލްގައްޔޫމުގެ މޯލްޑިވްސް ރިފޯމް މޫވްމެންޓު(އެމްއާރުއެމް) ވެސް ދިޔުޅި ދިގުނުކޮށް ކޯލިޝަނުން ވަކިވުމަށް މަޖިލީހުގެ މަރަދޫ ދާއިރާގެ އެމްޑީޕީ މެމްބަރު އިބްރާހިމް ޝަރީފު ގޮވާލައްވައިފި އެވެ. 

ޝަރީފު މިފަދައިން ވިދާޅުވެފައިވަނީ ކުރިއަށް އޮތް ރިޔާސީ އިންތިޚާބުގައި ރައީސް ޞާލިހާއެކު ކޯލިޝަން ހެދުމާއި މެދު އެމްއާރުއެމުން ގޮތެއް ނުނިންމާ ގިނަ ދުވަސްތަކެއް ވަމުންދާތީ ނުރުހުން ފާޅުކުރައްވާ ކުރެއްވި ޓްވީޓެއްގަ އެވެ. 

ޝަރީފު ވިދާޅުވީ އެމްއާރުއެމުން ބޭނުން ނަމަ މިހާރުވެސް ސަރުކާރު ކޯލިޝަނުން ނިކުންނަނީ ކަމަށެވެ. އަދި ކޯލިޝަނުން ބޭރުވުމަށް ގޮތެއް ނުނިންމާ ދިޔުޅި ދިގު ކުރުމުގެ ބޭނުމެއް ނެތްކަމަށް އޭނާ ވިދާޅުވި އެވެ. 

Advertisement

އެއާއެކު ޝަރީފު ވިދާޅުވީ ކޯލިޝަން ހެދުމާއި މެދު ގޮތެއް ނުނިންމާ އެމްއާރުއެމުން ކިތަންމެ ވަރަކަށް ދިގު ދަންމާލި ނަމަވެސް އެމްޑީޕީއިން ކުރީގެ ރައީސް މައުމޫނުގެ ދަރިކަލުން އަދި އެމްއާރުއެމްގެ ރައީސް ފާރިޝް މައުމޫނަށް އެ ޕާޓީގެ ރަނިން މޭޓުކަން ނުދޭނެ ކަމަށެވެ. 

އެހެންކަމުން، އެ އުންމީދުގައި ކޯލިޝަންގައި ތިބުމުގެ ނުވަތަ ކޯލިޝަނުން ބޭރުނުވެ އަންނަ ރިޔާސީ އިންތިޚާބަށް ގޮތެއް ނުނިންމާ ތިބުމުގެ ބޭނުމެއް ނެތްކަމަށް ޝަރީފު ވިދާޅުވި އެވެ. 

ސަރުކާރުގެ ކޯލިޝަނުގައި މިވަގުތު އޮތް އެންމެ ބޮޑު ހިއްސާދާރުކަމަށްވާ ޖުމްހޫރީ ޕާޓީންވެސް ވަނީ އަންނަ ރިޔާސީ އިންތިޚާބުގައި އެޕާޓީގެ ކެންޑިޑޭޓެއް ނެރެގެން، އެ ޕާޓީ އިސްވެ އޮވެ ހިންގާ ކޯލިޝަނަކާއެކު ރިޔާސީ ރޭހުގައި ވާދަކުރުމަށް ނިންމާ އެކަން އިއުލާނުކޮށްފަ އެވެ. 

އެމްއާރުއެމުން އަދި ރިޔާސީ އިންތިޚާބަށް ގޮތެއް ނިންމާފައި ނުވާއިރު ކޯލިޝަންގައި ހިމެނޭ އަދާލަތުން ވަނީ އަންނަ ރިޔާސީ އިންތިޚާބުގައި ރައީސް އިބްރާހިމް މުޙައްމަދު ޞާލިހަށް ތާއީދުކުރުމަށް ނިންމާފަ އެވެ. އަދާލަތުގެ އިތުރުން އެމްޑީއޭއިން ވެސް ރައީސް ޞާލިހާއެކު ކޯލިޝަން ހަދަން އޮތީ ނިންމާފައެވެ. 

އެހެންކަމުން، އަދާލަތާއި އެމްޑީއޭގެ ކޯލިޝަންގެ ތެރެއިން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ރިޔާސީ އިންތިޚާބު ފަސޭހަކަމާއެކު ކާމިޔާބުކުރައްވާނެކަމަށް އެމަނިކުފާނަށް ތާއީދުކުރައްވާ އެމްޑީޕީގެ އިސް ބޭފުޅުންދަނީ ޔަގީންކަމާއެކު ވިދާޅުވަމުން ނެވެ.