މިދިޔަ ބުރާސްފަތި ދުވަހު އިދިކޮޅުގެ ފަރާތުން ކުރިއަށް ގެންދިޔަ މުޒާހަރާގައި ނޫސްވެރިޔަކު ހައްޔަރު ކޮށްފައިވަނީ ފުލުހުންގެ މަސައްކަތަށް ހުރަސް އަޅައި ފުލުހެއްގެ ގައިގައި ޖަހާފައިވާ މައްސަލައާއި ގުޅިގެން ކަމަށް ފުލުހުން ބުނެފިއެވެ.

ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް މިނިވަން ކުރުމަށް ގޮވާލައި އިދިކޮޅު ޕީޕީއެމް/ޕީއެންސީ ކޯލިޝަނުން ސިލްސިލާކޮށް މާލޭގެ މަގުމަތީގައި ކުރިއަށް ގެންދާ މުޒާހަރާ ކަވަރު ކުރަމުންދިޔަ "އަވަސް" ނޫހުގެ ނޫސްވެރިއެއް ކަމަށްވާ ހުސައިން ޖުމާން، ބުރާސްފަތި ދުވަހުގެ ރޭ ފުލުހުން ވަނީ ހައްޔަރުކޮށްފަ އެވެ. ނޫސްވެރިއެއް ކަން އަންގައިދޭ ކާޑުވެސް އަޅައިގެން ހުރި އެ ނޫސްވެރިޔާ ހައްޔަރު ކުރުމުގެ ތެރޭގައި ފުލުހުން އޭނާގެ މޭމަތީގައި އަތް އަޅައި ކޮށްޕާވެސް ލާފައިވާ ކަމަށް އޭނާ އާއި ހަވާލާދީ އިދިކޮޅުން ވަނީ ބުނެފައެވެ.

މިކަމާއި ގުޅިގެން ދިވެހި ފުލުހުންގެ ޚިދުމަތުން މިއަދު ކޮށްފައިވާ ޓްވީޓެއްގައި ބުނެފައިވަނީ މާރިޗް 16 ވަނަ ދުވަހުގެ ރޭ މާލޭގައި ކުރިއަށް ގެންދިޔަ އެއްވުމެއްގައި ނޫސްވެރިއަކު ފުލުހުންގެ ބެލުމުގެ ދަށަށް ގެނެސްފައި ވަނީ، މީހަކު ފުލުހުންގެ ބެލުމުގެ ދަށަށް ގެންނަން މަސައްކަތްކުރި ވަގުތު ނޫސްވެރިޔާ އެކަމަށް ހުރަސް އަޅައި ފުލުހެއްގެ ގައިގައި ޖަހާފައިވާ މައްސަލައާ ގުޅިގެން ކަމަށެވެ.

Advertisement

މިއާއިއެކު އޭނާގެ ބަންދާމެދު ގޮތެއް ނިންމުމަށް އިއްޔެ ކޯޓަށް ހާޒިރު ކުރުމުން ކޯޓުން ވަނީ އޭނާ ދޫކޮށްލާފައި ކަމަށާއި މި މައްސަލަ ފުލުހުން ދަނީ ތަހުގީގު ކުރަމުން ކަމަށް އެ ޓްވީޓްގައިވެއެވެ.

ނޫސްވެރިކަމުގެ މިނިވަންކަމަކީ މި ސަރުކާރު ވެރިކަމަށް އައުމުގެ ކުރިން އެންމެ ގަދައަށް ވަކާލާތުކުރި ކަމަށް ވާއިރު، ވެރިކަމަށް އައުމަށްފަހު ނޫސްވެރިންނަށް އެ މިނިވަންކަން ހޯދައި ނުދީ، ނޫސްވެރިންގެ ހައްގުތައް ހަނި ކުރުމަށް ސަރުކާރުން މަސައްކަތް ކުރާ ކަމަށް ބުނެ ނޫސްވެރިންގެ ހައްގުގައި ވަކާލާތުކުރާ ޖަމިއްޔާ ތަކުންނާއި ނޫސްވެރިން އަންނަނީ ކަންބޮޑުވުން ފާޅުކުރަމުންނެވެ. 

ޚާއްސަކޮށް، ދާދިފަހުން ޗެނަލް 13 ގެ ނޫސްވެރިއަކަށް މުޒާހަރާ ތެރެއިން ސީރިއަސް އަނިޔާތަކެއްވެ، އެމެންޖެންސީ ގައި މާލޭގައި ފަރުވާ ދިނުމަށްފަހު ލަންކާއިންވެސް ފަރުވާ ހޯދަން ޖެހިފައިވާއިރު، އެނޫންވެސް ޗެނަލް 13 ގެ ނޫސްވެރިން ވަނީ ހައްޔަރު ކުރުމަށްފަހު ބަންދުގައި ބަހައްޓާފައެވެ. އެފަދަ މައްސަލަތަކާއި ގުޅިގެން ގިނަ ބައެއްގެ ނުރުހުން ވަނީ ސަރުކާރަށް އަމާޒުވެފައެވެ.