މި އަހަރުގެ ކުޑަ ޢީދަށް މާލޭގެ ބޮޑެތި މަގުތައް ޒީނަތްތެރި ކުރުމުގެ ޕްލޭނު މާލޭ ސިޓީ ކައުންސިލުން އެކުލަވާލާފައިވާކަމަށް މާލޭ ސިޓީގެ މޭޔަރު ޑރ މުޙައްމަދު މުއިއްޒު ހާމަކުރައްވައިފި އެވެ.
ދުނިޔޭގެ ބައެއް ޤައުމުތަކުގައި ރޯދަމަސް ފާހަގަކުރުމަށް މަގުތައް ޒީނަތްތެރިކޮށްފައި ހުންނަ ތަން ފެނިގެންދާ ފޮޓޯއެއް ހިއްސާކުރުމަށްފަހު އާންމު ރައްޔިތަކު ވަނީ ޕީޕީއެމްގެ ވެރިކަމެއްގައި އެފަދައިން މާލޭގެ މަގުތައްވެސް ޒީނަތްތެރި ކުރާނެކަމަށް އުންމީދުކުރާކަމަށް ބުނެ ޓްވީޓެއް ކޮށްފައެވެ.
މުސްލިމު ޤައުމަތުން ފާހަގަކުރާ ރޯދައާއި ޢީދުގެ މުނާސަބާ ފާހަގަކުރުމަށް ރާއްޖޭގެ ވެރިކަން ކުރާރަށުގެ މަގުތައް ރީނަތްތެރި ކުރުމަކީ "ސަޅި" ކަމަކަށް ވާނެ ކަމަށާއި، އެކަމުގެ ސަބަބުން މުސްތަގުބަލުގައި ފަތުރުވެރިކަމަށްވެސް ހެޔޮ އަސަރު ކުރާނެކަމަށް އެމީހާގެ ޓްވީޓުގައި ލިޔެފައިވެއެވެ.
އެމީހާގެ އެ ޓްވީޓަށް ޖަވާބުދެއްވަމުން ޕީޕީއެމްގެ ނައިބުރައީސް ޑރ މުޢިއްޒު ވިދާޅުވީ މާލޭ ސިޓީ ކައުންސިލުން ވަނީ އެފަދައިން އެކަން ކުރުމަށް ނިންމާފައި ކަމަށެވެ.
އެގޮތުން މާލޭގެ ވަށައިގެން އޮންނަ ރިންގު ރޯޑުގެ އިތުރުން މަޖީދީ މަގާއި ޖުމްހޫރީ މައިދާން އެފަދައިން ޒީނަތްތެރި ކުރާނެ ގޮތުގެ ޕްލޭނު ހަދާ ޑިސައިންވެސް ނިމިފައިވާކަމަށް ޑރ މުއިއްޒު ވިދާޅުވިއެވެ. އަދި އެ މަސައްކަތް މިހާރު އޮތީ ޕްރޮކިއުމަންޓު ސްޓޭޖުގައިކަން ފާހަގަކުރެއްވި އެވެ.
މާލޭ ސިޓީގެ މޭޔަރު ޑރ މުޙައްމަދު މުއިއްޒު
އެކަން ފާހަގަކުރައްވާ ޑރ މުއިއްޒު ވިދާޅުވީ އެންމެ ފުރަތަމަ މާލޭ ސިޓީ ކައުންސިލުން ޕްލޭން ކުރީ ރޯދައަށް މަގުތައް ޒީނަތްތެރި ކުރުމަށް ކަމަށެވެ. އެހެން ނަމަވެސް ރޯދައަށް އެކަން ވެދާނެކަމަށް ދެކިވަޑައިނުގަންނަވާ ކަމަށާއި، ޔަގީނުންވެސް ކުޑަ އީދަށް މަގުތައް ޒީނަތްތެރި ކުރެވޭނެކަމަށް ޑރ މުއިއްޒު ވިދާޅުވި އެވެ.
ކުޑަ އީދަށް މާލޭ ސިޓީ ކައުންސުލުން މަގުތައް ޒީނަތްތެރިކޮށްފިނަމަ އެއީ ސިޓީ ކައުންސިލުން އިސްނަގައިގެން އެފަދައިން ހިންގި ފުރަތަމަ ހަރަކާތަށް ވެގެންދާނެ އެވެ.
Advertisement
This content is created and paid for by advertisers and does not involve Voice Journalists
