މިއަހަރުގެ ފިޠުރު ޒަކާތުގެ ގޮތުގައި ދައްކަންޖެހޭ އަދަދުތަކާއި ޒަކާތް ދެއްކޭނެ ގޮތްތައް އިސްލާމިކް މިނިސްޓްރީއިން އިއުލާންކޮށްފިއެވެ.

އިސްލާމިކް މިނިސްޓްރީއިން މިއަދު ނެރުނު އިއުލާނެއްގައި ބުނެފައިވަނީ މިއަހަރުގެ ފިޠުރު ޒަކާތް ބަލައިގަތުމަށް ހަމަޖެހިފައިވަނީ 01 ރަމަޟާން (23 މާރޗް) އިން ފެށިގެން 27 ރަމަޟާން (18 އޭޕްރީލް) އާއި ހަމައަށް ތިރީގައިވާ ޓޭބަލްގައި ބަޔާންކޮށްފައިވާ ގޮތަށް ކަމަށެވެ.

ބަނޑޭރި ޕޭ ތެރެއިން ރަމަޟާން މަހުގެ އެންމެ ފަހު ދުވަހާ ހަމައަށް ފިޠުރު ޒަކާތް ދެއްކޭނެ ކަމަށް މިނިސްޓްރީއިން ފާހަގަކޮށްފައިވެއެވެ.

ފިޠުރު ޒަކާތް ބަލައިގަތުމަށް ހަމަޖެެހިފައިވަނީ މިނިސްޓްރީއިން ކަނޑައަޅާފއިވާ ގޮވާމުގެ ބާވަތްތަކުގެ 2.4 ކިލޯއަށްވާ ފައިސާއިންނެވެ.

ބާވަތްތަކާއި ފައިސާގެ އަދަދުތައް:

-އާދައިގެ ހަނޑޫ: 12 ރުފިޔާ

-ތައިލެންޑް ހުދު ހަނޑޫ: 84 ރުފިޔާ

-ރަތް ހަނޑޫ: 99 ރުފިޔާ

-އާދައިގެ ބާސްމަތީ ހަނޑޫ: 84 ރުފިޔާ

-މޮޅު ބާސްމަތީ ހަނޑޫ: 100 ރުފިޔާ

-އެންމެ މޮޅު ބާސްމަތީ ހަނޑޫ: 125 ރުފިޔާ

-އާދައިގެ ފުށް: 12 ރުފިޔާ

-އާޓާ ފުށް: 75 ރުފިޔާ

މީގެ އިތުރުން އުމުރުން ދުވަސްވެފައިވާ ފަރާތްތަކަށާއި، އޮންލައިންކޮށް ޒަކާތް ދެއްކުމަށް އަހުލުވެރިނޫން ފަރާތްތަކަށް ޚާއްސަކޮށް 26 މާރިޗު އިން ފެށިގެން އިސްލާމިކް މިނިސްޓްރީގެ ހޯލުގައި ޒަކާތް ބަލައިގަންނާނެ އިންތިޒާމް ހަމަޖައްސާފައިވާ ކަމަށް އިއުލާނުގައި ބުނެފައިވެއެވެ.

އެގޮތުން މިނިސްޓްރީއިން ޒަކާތް ބަލައިގަންނަން ހަމަޖެހިފައިވަނީ ރަސްމީ ކޮންމެ ދުވަހަކު ހެނދުނު 10:00 ން 13:00 އާއިހަމައަށެވެ.

މިއާއިއެކު މާލެ ސިޓީ ފިޔަވައި ރަށްރަށުގައި ފިޠުރު ޒަކާތް ބަލައިގަތުމުގެ އިންތިޒާމް ހަމަޖައްސާނީ އެރަށެއްގެ ރަށު ނުވަތަ ސިޓީ ކައުންސިލަކުން ކަމަށް އިއުލާން ކޮށްފައިވެއެވެ.