ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހުގެ މޮޓޯކޭޓަށް އިދިކޮޅު މުޒާހަރާގެ ބައިވެރިން ހުރަސްއަޅަން ފުރުސަތު ލިބި، އެމަނިކުފާނުގެ ސެކިއުރިޓީ ބްރީޗްވި މައްސަލައިގައި ޑިފެންސް މިނިސްޓަރު މަޖިލީހަށް ހާޒިރުކޮށް މަޤާމުން ވަކިކުރުމަށް ގޮވާލާ ހުށައެޅި ކުއްލި މައްސަލަ ބޭރުކޮށްލައިފި އެވެ.
އެ މައްސަލަ މަޖިލީހަށް ހުށައެޅުއްވީ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ލަތީފެވެ.
އެ މައްސަލަ ހުށައަޅުއްވަމުން މެމްބަރު ހުސެއިން ވިދާޅުވީ އިދިކޮޅުން ޕީޕީއެމް މައި އޮފީސް ކުރިމަތީ މުޒާހަރާ ކުރަމުންދަނިކޮށް ކުއްލިއަކަށް ރައީސުލްޖުމްހޫރިއްޔާ ދަތުރުކުރައްވަމުން ގެންދެވި މޮޓޯކޭޓު މުޒާހަރާތެރެއަށް ވަނުމަކީ ނޭނގި ކުރެވުނު ކަމެއްކަމަށް ޤަބޫލުފުޅު ނުކުރައްވާކަމަށެވެ. އަދި އެއީ ރޭވިގެން ހިންގާފައިވާ ކަމެއްކަމަށް ޤަބޫލުފުޅު ކުރައްވާ ކަމަށެވެ.
ރޭ ހިނގި އެ ހާދިސާއިން ރައީސުލްޖުމްހޫރިއްޔާގެ ސަލާމަތާއި ގުޅޭ ކަންކަން ބެލެހެއްޓުމަށް މޯލްޑިވްސް ނެޝަނަލް ޑިފެންސް ފޯސް ފެއިލުވެފައިވާ މިންވަރު ފެނިގެންދާ ކަމަށާއި، އެކަމުގެ ފުރިހަމަ ޒިންމާ ޑިފެންސް މިނިސްޓަރު މާރިޔާ އަހުމަދު ދީދީ ނަންގަވަން ޖެހޭކަމަށް މެމްބަރު ހުސެއިންގެ ކުއްލި މައްސަލައިގައި ބަޔާންކޮށްފައި ވެއެވެ.
އެހެން ފަރާތެއްގެ ބޮލުގައި އިލްޒާމެއް އެޅުވުމަށް ރައީސުލްޖުމްހޫރިއްޔާގެ ސަލާމަތާއި ގުޅުންހުރި ކަންކަން ކޮމްޕްރޮމައިސްކުރުމަކީ ކުރަން ހެޔޮވާވަރުގެ ކަމެއް ނޫންކަން ފާހަގަކޮށް އެ ކުއްލި މައްސަލައިގައި ވަނީ މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް ބޮމުގެ ހަމަލާއެއް ދިން މައްސަލައިގައިވެސް ޑިފެންސް މިނިސްޓަރު މާރިޔާ ދީދީގެ އިހުމާލު އޮތްކަން ފާހަގަކުރައްވާފަ އެވެ.
މެމްބަރު ހުސެއިން ވިދާޅުވީ ދައުލަތުގެ އިސްވެރިންގެ ސަލާމަތާއި ރައްކާތެރިކަން ކަށަވަރު ނުކުރެވުމަކީ ޑިފެންސް މިނިސްޓަރު މަޤާމުން ވަކިކުރަންޖެހޭވަރުގެ ސީރިއެސް މައްސަލައަކަށް ވާތީ މިހާރުން މިހާރަށް ޑިފެންސް މިނިސްޓަރުގެ މަޤާމުން މާރިޔާ ވަކިކުރުމަށާއި ގަސްދުގައި ރައީސުލްޖުމްޙޫރިއްޔާ ދަތުރުކުރެއްވި މޮޓޯކޭޓުގެ ސެކިއުރިޓީ ބްރީޗްކުރި މައްސަލަ ތަޙުގީގުކުރުމަށް ގޮވާލައްވާ ކަމަށެވެ.
އެ މައްސަލަ ބަލައިގަތުމަށް ވޯޓުދެއްވީ އެންމެ 6 މެމްބަރުންނެވެ. މައްސަަލަ ބަލައިނުގަތުމަށް 17 މެމްބަރުން ވަނީ ވޯޓުދެއްވާފަ އެވެ. އެއާއެކު ރައީސުލްޖުމްޙޫރިއްޔާގެ ސެކިއުރިޓީއާއި ގުޅުންހުރި އެ މައްސަލަ ވަނީ މަޖިލީހުން ބޭރުކޮށްލާފަ އެވެ.
Advertisement
This content is created and paid for by advertisers and does not involve Voice Journalists
