މަޖިލީހުގެ ރައީސް މުޙައްމަދު ނަޝީދަށް ތާއީދުކުރައްވާ މެމްބަރުން މަޖިލީހުގައި ދައްކަވާ ވާހަކައާއި އެބޭފުޅުންގެ އަމަލާއި ދިމާނުވާކަން ފާހަގަކުރައްވާ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ބޮޑެތި ފާޑުކިޔުންތަކެއް އަމާޒުކުރައްވައިފި އެވެ.
މަޖިލީހުގައި މިހާރު ކުރިއަށްދާ އާންމު އިންތިޚާބާއި ބެހޭ ޤާނޫނަށް ހުށައަޅާފައިވާ އިސްލާހުގެ ބަހުސުގައި ވާހަކަދައްކަވަމުން ގަފޫރު ވިދާޅުވީ އެ އިސްލާހުގެ ސަބަބުން ނޫސްވެރިކަމުގެ ހައްޤަށް ހުރަސްއެޅޭކަމަށް ދެކެވޭ ވާހަކައަކީ ހަމައެކަނި ބަހުސުގެ ބޭނުމަށް މަޖިލީހުގައި ދައްކަމުންދާ ވާހަކައެއް ކަމަށެވެ.
އިސްލާހު ފާސްވެގެން އަންނައިރު ނޫސްވެރިންގެ ހައްގަކަށް ހުރަސް ނޭޅޭނެ ކަމަށާއި، އަދި އިންތިޚާބުތައް ކަވަރުކުރުމަށް ފުޅާ ދާއިރާއެއްގައި މަސައްކަތްކުރުމުގެ މަގު އޮންނާނީ ފަހިވެފައިކަމަށް އޭނާ ވިދާޅުވިއެވެ.
ޣަފޫރު ވިދާޅުވީ ފުލުހުންގެ ގާނޫނަށް ހުށައެޅި އިސްލާހާއި ގުޅިގެންވެސް މަޖިލީހުގައި ހަމަ އެފަދަ ބަހުސެއް ކުރިއަށް ގެންދިޔަ ކަމަށެވެ. އެގޮތުން އެ އިސްލާހުގެ ސަބަބުން ފުލުހަށް ވަންނައިރު ބެކްގްރައުންޑު ޗެކު ނުކުރާގޮތަށް ހެދުމަށް މަސައްކަތް ކުރާ ކަމަށާއި، އެފަދަ އެތައް ވާހަކައެއް މަޖިލީހުގައި ދެކެވުނުކަމަށް އޭނާ ވިދާޅުވިއެވެ.
އެހެން ނަމަވެސް އެ ގާނޫނު އިސްލާހުވެގެން ދިޔައިރު، އޮތީ ބެކް ގްރައުންޑު ޗެކު ނުކުރެވޭ ގޮތަށް ނޫން ކަމަށާއި، ތަޅުމުގައި ގިނަ ފަހަރަށް ސާރުކާރަށް ފާޑުކިޔާ މެމްބަރުން ދައްކަވަާ ވާހަކަތަކީ ހަގީގަތާއި ޚިލާފު ވާހަކަތަކެއްކަމަށް ގަފޫރު ވިދާޅުވިއެވެ.
ޣަފޫރު ދެން ވިދާޅުވީ މަޖިލީހުގައި ސަރުކާރާއި ދެކޮޅު މެމްބަރުން ދައްކާ ވާހަކައާއި ވޯޓަށްވުމުން އެބޭފުޅުން އަމަލުކުރައްވާ ގޮތާއި ދިމާނުވާ ވާހަކައެކެވެ.
ދުނިގޭ ގައުމުތަކުގެ ޕާލަމެންޓްތައް / ގާނޫނު ހަދާ މަޖިލިސްތައް ބައިވެރިވާ ކޮރަޕްޝަނާ ދެޅު ޖަމިއްޔާއެއް ކަމަށްވާ ގްލޯބަލް އޯގަނައިޒޭޝަން އޮފް ޕާލަމެންޓޭރިއަންސް އެގެއިންސްޓް ކޮރަޕްޝަން (ގޯޕެކް) ގައި ރާއްޖޭގެ ރައްޔިތުންގެ މަޖިލިސް ބައިވެރިވާން ރިޔާސަތުން ހުށައެޅުއްވި މައްސަލައަށް ވޯޓުދިން ދުވަހު ކަން ހިނގައިދިޔަ ގޮތުގެ މިސާލު ނަންގަވާ ޣަފޫރު ވިދާޅުވީ ކޮރަޕްޝަނާއި ދެކޮޅަށް މަޖިލީހުގައި ވަކާލާތު ކުރުމަށްފަހު ގޯޕެކުގައި ބައިވެރިވުމަށް ނަޝީދަށް ތާއީދުކުރައްވާ މެމްބަރުން ވޯޓުދީފައި ނުވާކަމަށެވެ.
ނަޝީދުގެ ފިކުރެއްގެ ދިރުން ޕީޖީ މެމްބަރުން
"މި މަޖިލީހުގައި ދައްކަވާ ވާހަކައަކީ ހަގީގަތަށް ބިނާކޮށް ގިނަ މެމްބަރުން ދައްކަވާ ވާހަކައެއް ނޫން. އަޅުގަނޑުމެންނަށް ފެނުނު މި މަޖިލީހަށް ގްލޯބަލް އޯގަނައިޒޭޝަން އޮފް ޕާލަމެންޓޭރިއަންސް އެގެއިންސްޓް ކޮރަޕްޝަން (ގޯޕެކް) ކަންތައް މަޖިލީހުގެ ރައީސްގެ މޭޒުން ހުށައެޅީމާ މިތަނުގައި ދެއްކި ވާހަކަ. އެކަން ކުރުމުގެ ނިޔަތުގައި ވަރަށް ގިނަ ބޭފުޅުން ވާހަކަފުޅު ދެއްކެވި. އެހެން ނަމަވެސް އެކަން ބަލައިގަންނަން ވޯޓަށް ދިން އިރުގައި ކޮން ބައެއްތޯ ވޯޓު ދިނީ؟ އެބޭފުޅުންގެ އެއްވެސް ބޭފުޅަކު (ފިކުރެއްގެ ދިރުން މެމްބަރުން) އެޔަކަށް ވޯޓެއް ނުދެއްވާ. އެންމެ ބޭފުޅަކު ނޭނގޭ ނުދޭކަމެއް. އެކަމަކު އަޅުގަނޑުމެންގެ 45 މެމްބަރުން ވޯޓުދީގެން އެއޮތީ އެކަން ބަލައިގަންނަން ފާސްކޮށްފަ"
ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ
ޣަފޫރުގެ ވާހަކަފުޅުގައި އިޝާރާތްކުރައްވާފައިވަނީ މަޖިލީހުގެ ރައީސް މުޙައްމަދު ނަޝީދަށް ތާއީދުކުރައްވާ "ފިކުރެއްގެ ދިރުން" މެމްބަރުންނަށެވެ.
އެގޮތުން ޣަފޫރު ވިދާޅުވީ ގޯޕެކްގައި މަޖިލީހުން ބައިވެރިވުމަށް ފާސްކުރީ ސަރުކާރު މެމްބަރުން ވޯޓުދީގެން ކަމަށެވެ. ނަޝީދުގެ މެމްބަރުން މަޖިލީހުގައި އެކި ގޮތްގޮތަށް ވާހަކަދެއްކެވުމަށްފަހު ވޯޓުގައި ބައިވެރިވެފައި ނުވާކަމަށާއި އެހެންކަމުން ދައްކާ ވާހަކައިގެ އިޚްލާސްތެރިކަން އޮތީ ކިހާ މިންވަރަކަށްކަން ރައްޔިތުންނަށް ސާފުވާކަމަށް ޣަފޫރު ވިދާޅުވި އެވެ.
ގޯޕެކްގައި ބައިވެރިވުމަށް ފާސްވެފައިވަނީ 45 މެމްބަރުންގެ ވޯޓާއި އެކުގައެވެ.
އެހެން ނަމަވެސް އެދުވަހުގެ ވޯޓުގައި ނަޝީދު ފަޅީގެ އެއްވެސް މެމްބަރަކު ބައިވެރިވެވަޑައިގެންފައެއް ނުވެއެވެ.
Advertisement
This content is created and paid for by advertisers and does not involve Voice Journalists
