އިންފްލޭޝަން ބޮޑުވަމުންދާ ދަނޑިވަޅެއްގައި މުސާރައާއި އެލަވެންސް ބޮޑުކުރުމަކީ އެ މައްސަލައަށް އޮތް ޙައްލު ނޫން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ފިނޭންސް މިނިސްޓަރު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމު ކުރެއްވި ސުވާލަށް ޖަވާބުދެއްވަމުންނެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ފިނޭންސް މިނިސްޓަރަށް ސުވާލުކުރަން ލިބިލެއްވި ފުރުސަތުގައި މެމްބަރު ސަލީމު ވަނީ ސަރުކާރުގެ ހުރިހާ މުވައްޒަފުނަށް ރޯދަ އެލަވެންސް ދެވިއްޖެތޯ އައްސަވާފަ އެވެ. އަދި އިންފްލޭޝަން ބޮޑުވަމުންދާ މި ދުވަސްވަރުގައި އެލަވަންސް ބޮޑުކުރުމާއި ގުޅިގެން މިނިސްޓަރުގެ ވިސްނުންފުޅަކީ ކޮބައިތޯ ސަލީމު އެއްސެވިއެވެ.
ސަލީމުގެ އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ސަރުކާރުން ރޯދަ އެލަވެންސް ދޭންޖެހޭ ހުރިހާ ފަރާތްތަކަށް އެ އެލަވެންސް ދީފައިވާ ކަމަށެވެ.
އެހެން ނަމަވެސް އިންފްލޭޝަން ބޮޑުވާއިރު، ނުވަތަ ތަކެތީގެ އަގުތައް އުފުލެމުންދާއިރު، އެލަވަންސް ބޮޑު ކުރުމަކީ އެކަމުގެ ޙައްލުކަމަށް ދެކިވަޑައިނުގަންނަވާ ކަމަށް މިނިސްޓަރު ވިދާޅުވި އެވެ.
"އިންފްލޭޝަން ކޮންޓްރޯލުކުރުމަށްޓަކައި އިންފްލޭޝަން މަތިވާ މިންވަރަކުން ސެލަރީ ނުވަތަ އިނާޔަތްތައް ބޮޑުކުރުމަކީ އަދި އެންމެ ރަނގަޅު ގޮތަކަށް ނުވެދާނެ. ޑިމާންޑު ޕުލް އިންފްލޭޝަނަކަށް އަންނަނީ. މުސާރަތައް ބޮޑުވާ ވަރަކަށް ޕާޗޭސިން ޕަވާ ބޮޑުވާވަރަކަށް އަނެއްކާވެސް އޭގެ ޑިމާންޑު ކްރިއޭޓުވާނެ"
ފިނޭންސް މިނިސްޓަރު އިބްރާހިމް އަމީރު
މިނިސްޓަރު އިތުރަށް ވިދާޅުވީ މަސައްކަތް ކުރަންވީ އިންފްލޭޝަން ކުޑަ ކުރުމަށް ކަމަށެވެ. އަދި ތަކެތީގެ އަގުތައް ބޮޑު ވިޔަނުދީ ހިފެހެއްޓުމަށް ކަމަށެވެ.
އެހެން ނޫންކަމަށްވާނަމަ އިންފްލޭޝަންގެ މައްސަލައަށް މުސާރަތައް ނުވަތަ އެލަވަންސްތައް ބޮޑުކޮށްގެން ޙައްލު ނުލިބޭނެކަމަށް މިނިސްޓަރު ވިދާޅުވިއެވެ.
މިނިސްޓަރު މިފަދައިން ވިދާޅުވެފައިވާއިރު ތަކެތީގެ އަގުތައް ބޮޑުވަމުންދާތީ މިއަހަރުގެ ރޯދަ އެލަވެންސް ބޮޑުކޮށްދިނުމަށް ގޮވާލާ މަޖިލީހަށް ހުށައެޅި ގަރާރު ވަނީ ބޭރުކޮށްލާފަ އެވެ.
Advertisement
This content is created and paid for by advertisers and does not involve Voice Journalists
