ރިޔާސީ އިންތިޚާބުގެ ފުރަތަމަ ބުރުން، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދިވެހި ރާއްޖޭގެ ވެރިކަމަށް ގެންނާނަނެ ކަމަށް އެމްޑީއޭގެ ރައީސް އަޙްމަދު ސިޔާމް މުޙައްމަދު (ސަން ސިޔާމް) ވިދާޅުވެއްޖެއެވެ.

ސިޔާމް މިހެން ވިދާޅުވެފައިވަނީ އިއްޔެ މުލިއާ ގޭގައި ރައީސް ޞާލިހު އާއި ބައްދަލު ކުރެއްވުމަށް ފަހު ނޫސްވެރިންނާ ވާހަކަދައްކަވަމުންނެވެ.

އެގޮތުން ސިޔާމް ވިދާޅުވެފައިވަނީ ފާއިތުވި 25 އަހަރުގެ ތެރޭ އޭނާއަށް ފެނިވަޑައިގަތް ވެރިކަންތަކުގެ ތެރެއިން އެންމެ އަދުލުވެރި އަމާން ވެރިކަމެއް ކުރެއްވީ ރައީސް ޞާލިިހުގެ ސަރުކާރުން ކަމަށެވެ.

Advertisement

އަދި ކޮވިޑް-19 ގެ ބަލިމަޑު ކަމުގެ ތެރޭގައިވެސް މުޅި ދުނިޔޭގެ ހުރިހާ ޤައުމަކުން ފާހަގަކުރާ ރަނގަޅު މިސާލެއްގެ ގޮތުގައި ރާއްޖޭގެ އިޤްތިސާދު ކޮޅަށް ޖެހުމުގައި މި ސަރުކާރުން ނަމޫނާ ދެއްކެވިކަމަށް ސިޔާމް ވަނީ ވިދާޅުވެފައެވެ.

މިއާއިއެކު އެމަނިކުފާނަކީ ހިތްތިރީ، ރަނަގަޅަށް މަސައްކަތްކުރެއްވި ރައީސެއް ކަމަށް ފާހަގަކުރައްވާ އެމްޑީއޭގެ ކައުންސިލުންނާއި އެޕާޓީގެ ގިނަ މެމްބަރުން މިހާރު ދެކެނީ ރައީސް ޞާލު އާއިއެކު ކޯލިޝަން ހެދުމައިގެން ކުރިއަށް ގެންދަން ކަމަށް ސިޔާމް ވިދާޅުވިއެވެ.

އަދި މި ކޯލިޝަނާއިއެކު ކުރިއަށް ދިޔުމުގައި ކާމިޔާބު ވާނެ ކަމާމެދު ޝައްކުނުކުރައްވާ ކަމަށްވެސް ސިޔާމް ވަނީ ވިދާޅުވެފައެވެ.

"އަޅުގަނޑުމެން އިރާދަކުރެއްވިއްޔާ ހަަމަ ފުރަތަމަ ބުރުން، ރައީސް އިބްރާހީމް މުހައްމަދު ޞާލިހު ދިވެހި ރާއްޖޭގެ ވެރިކަމަށް ގެންނާނަން. އެ ކަމުގެ ޔަގީންކަން އަަޅުގަނޑުމެންނަށް އެބައޮތް" ސިޔާމް ވިދާޅުވެފައިވެއެވެ.

މުލިއާ ގޭގައި ބެއްވުނު މި ބައްދަލުވުމުގައި ސިޔާމްގެ އިތުރުން އަދާލަތު ޕާޓީގެ ރައީސް އިމްރާން އަބްދުالله އާއި އެމްޑީޕީގެ ޗެއާޕާސަން ފައްޔާޒް އިސްމާޢީލް އަދި އެމްޑީޕީގެ ޕާލިމަންޓަރީ ގްރޫޕުގެ ލީޑަރު މުހައްމަދު އަސްލަމް ވެސް ބައިވެރިވެފައިވެއެވެ.