ރައްޔިތުން މަޖިލީހުގެ ރައީސް މުޙައްމަދު ނަޝީދު ބޭނުންވަނީ އެމްޑީޕީއަށް ވެރިކަން ލިބުމުގެ ބަދަލުގައި އެމަނިކުފާނު ނޫން މީހަކަށް ވެރިކަން ލިބިއްޖެނަމަ އެ ޕާޓީ ފުނޑާލަން ކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ ޝަރީފް) ވިދާޅުވެއްޖެއެވެ.

އެގޮތުން މިއަދު ޝަރީފް ކުރެއްވި ޓްވީޓެއްގައި ވިދާޅުވެފައިވަނީ ރައީސް ނަޝީދު އަދި އެމަނިކުފާނުގެ ފިކުރެއްގެ ދިރުންވެސް މަސައްކަތް ކުރަނީ އެއްގޮތަކަށްވެސް އެމްޑީޕީއަށް ރަނގަޅު ގޮތެއް ހޯދާދެކަށްނޫން ކަމަށާއި މަސައްކަތް ކުރަނީ އެމްޑީޕީއަށް ވެރިކަން ގެއްލުވާލެވޭނެ ގޮތެއް ފެނޭތޯ ކަމަށެވެ.

ޝަރީފް ވަނީ ޖުމްހޫރީ ޕާޓީއާއި ގުޅިގެން ނަޝީދު އެކުރައްވާ މަސައްކަތަކީ އެމްޑީޕީގެ މެމްބަރުން ދެކެ ކޯފާ އިސް ކުރައްވައިގެން، ޕާޓީގެ ކިބައިން ބަދަލު ހިއްޕަވާ، ދެރަ ދޭން ކުރައްވާ މަސައްކަތެއްގެ ގޮތުގައި ސިފަ ކުރައްވާފައެވެ.

Advertisement

މިއާއިއެކު ޕްރައިމަރީގެ ބަލި ގަބޫލް ނުކުރައްވާ ޕާޓީ މެމްބަރުންގެ ނިންމުމަށް ގޮންޖައްސަވާ، ރައީސް ނަޝީދު އިދިކޮޅު ފަރާތްތަކާއި ގުޅިގެން ކުރައްވާ މަސައްކަތުން އެނގޭ އެއް ކަމަކީ އެމަނިކުފާނަކީ ޑިމޮކްރަސީ ގެ ހަމަތައް ގަބޫލް ނުކުރައްވާ ބެފުޅެއްކަމަށް ޝަރީފް ވަނީ ވިދާޅުވެފައެވެ.

އަދި ރައީސް ނަޝީދު މިހާރު އަމަލު ކުރައްވަމުން ދާ ގޮތުން ޑިމޮކްރަަސީ އޭ ކިޔާގެން ދައްކަވަމުން އައި ވާހަކަ ތަކަކީ ހަމަ އެކަނި ވެރިކަން ހޯއްދެވުމަށް ބޭނުން ކުރައްވާ އުކުޅެއްކަން މާބޮޑަށް ސާފު ވެއްޖެ ކަމަށްވެސް ޝަރީފް ވިދާޅުވިއެވެ.

މީގެ އިތުރުން ޝަރީފް ވިދާޅުވީ އިދިކޮޅު ޕާޓީތަކާއި ގުޅިގެން ކުރައްވަނީ އެމަނިކުފާނަށް މޮޅެއް ލިބޭ މަސައްކަތެއް ކަމަށާއި ރައީސް ނަޝީދަށް އެންމެ މުހިންމު ވަނީ އެމްޑީޕީއަށް ވެރިކަން ލިބުމުގެ ބަދަލުގައި ތިމާ ނޫން މީހަކަށް ވެރިކަން ލިބެންޏާ އެމްޑީޕީ ފުނޑާލުން ކަމަށެވެ.

މިކަމާއިމެދު ޕާޓީއަށް އިޚްލާސްތެރި މެމްބަރުން ފުންކޮށް ވިސްނާ އަޅަންޖެހޭ ފިޔަވަޅުތައް ލަސްނުކޮށް އަޅަން ޖެހޭނެ ކަމަށް ޝަރީފް ވަނީ އިލްތިމާސް ކުރައްވާފައެވެ.

ރިޔާސީ އިންތިޚާބަށް ޖޭޕީން ވަކިން ނިކުންނަން އިއުލާނު ކުރުމާއެކު ނަޝީދުގެ ފިކުރެއްގެ ދިރުމުން ވަނީ އެމަނިކުފާނަށް މަރުހަބާ ކިޔާފައެވެ. އަދި ޖޭޕީއާއި ފިކުރެއްގެ ދިރުން ގުޅިގެން ޖޮއިންޓް ޕާލަމެންޓްރީ ގުރޫޕެއް އެކުލަވާލާ ސަރުކާރު ޖަވާބުދާރީ ކުރުމަށް މަސައްކަތް ކުރާނެކަން ވެސް އިއުލާނުކޮށްފައިވެއެވެ.