"މައުމޫނީ ނިޒާމް" ހިނގުމަށްޓަކައި ވެރިކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ބަހައްޓަންވީ ކީއްވެތޯއާއި އެކަމަށް ކުރީގެ ރައީސް މައުމޫން އަބްދުލްޤައްޔޫމް މާ ރަނގަޅު ވާނެ ކަމަށް އެމްޑީޕީގެ ފުރަތަމަ ރައީސް އިބްރާހީމް އިސްމާޢީލް (އިބްރާ) ވިދާޅުވެއްޖެއެވެ.

އެމްޑީޕީ ދެބައިވެ، ޕާޓީގައި އެތައް ޒަމާނެއް ވަންދެން އުޅުނު މީހުންވެސް ޕާޓީއާއި ފެޔަށް ޖެހި، ޕާޓީގެ ތެރޭގައި ގިނަގުނަ ހަމަނުޖެހުންތަކެއް އުފެދިފައިވާ މި ދަނޑިވަޅުގައި އެކަންކަމަށް އަލި އަޅުވާލައި އިބުރާ ކުރެއްވި ޓްވީޓެއްގައި ވިދާޅުވީ، އެމްޑީޕީގައި ތިބި ސިޔާސީ މުފައްކިރުން ޕާޓީއާ ދުރަށްދަނީ އެމީހުންގެ ވިސްނުމުގެ ބޭނުން ކުރަން ޕާޓީގެ އިސް ސަފުން ބޭނުން ނުވާތީ ކަމަށެވެ. އެގޮތުން ޕާޓީގެ "ލީޑަރޝިޕުން" އަބަދުވެސް ދެކެނީ ލީޑަރޝިޕް ކޮންމެގޮތަކަށް ޢަމަލުކުރިޔަސް މެންބަރުންގެ ވޯޓް ލިބޭނޭކަމަށް ކަމުގައި އިބްރާ ވިދާޅުވިއެވެ.

އެހެންކަމުން ޕާޓީގެ ލީޑާޝިޕުން މަސައްކަތް ކުރަނީ އެހެންޕާޓީތައް ރުއްސަން ކަމަށާ އޭގެ ނަތީޖާއެއްގެ ގޮތުން އެމްޑީޕީއަށް ގެއްލެނީ އެޕާޓީގެ ޙަޤީޤީ މެންބަރުން ކަމަށް އިބްރާ ވިދާޅުވިއެވެ.

އިބްރާގެ އެވާހަކަ އާއި ގުޅިގެން މީހަކު ކުރި ކޮމެންޓެއްގައި ވަނީ އެފަދައިން ކަންކަން ހިނގަންފެށީ އެމްޑީޕީގެ ޗެއާޕާސަން ކަމަށް އިބުރާގެ ކޮއްކޮ އަދި އިކޮނަމިކް މިނިސްޓަރު ފައްޔާޟް އިސްމާއިލް އިންތިހާބުވެވަޑައިގެންނެވި ފަހުން ކަމަށް ބުނެފައެވެ. 

އެވާހަކަ އަށް ރައްދު ދެއްވައި އިބުރާ ވިދާޅުވީ މިއީ މިއަދުގެ ކަމެއް ނޫން ކަމަށާއި އެމްޑީޕީ ވެރިކަމަށް އަންނަ ކޮންމެ ފަހަރަކުވެސް މެދުވެރިވަނީ މި ޙާލަތު ކަމަށެވެ.

"2008 ގައި ރައީސް ނަޝީދު އިންތިޚާބުވި ހިސާބުން ޕާޓީ އުފަންކުރުމުގައި މިނިވަން ވިސްނުން ގެންގުޅުނު ހުރިހާ މީހުން އެކަހެރި ކުރި. 2012 އިން 2018 އަށް އެމީހުން މުހިންމުވި. 2018 އިން ފެށިގެން އަނެއްކާވެސް އެކަހެރި." އިބްރާ ވިދާޅުވިއެވެ.

އެމްޑީޕީގެ ޗެއަރޕާސަންގެ މަޤާމަަށް ފައްޔާޟް އިންތިޚާބު ވިތާ މާ ގިނަ ދުވަހެއް ނުވާކަން ފާހަގަ ކުރައްވައި އިބުރާ އިތުރަށް ވިދާޅުވީ، ފައްޔާޟް އެ މަގާމުގައި ހުންނެވި ނަމަވެސް އޭނާއަކީ ޕާޓީގެ ސިޔާސީ ކަންތައްތައް ނިންމަވަންޖެހޭ ފަރާތްނޫން ކަމަށެވެ. އަދި ޕާޓީގެ ސިޔާސީބައި ހިންގަން އޮންނަނީ ޕާޓީގެ ރައީސާއި އިސްލީޑަރަށް ކަމަށްވެސް އިބްރާ ވަނީ ވިދާޅުވެފައެވެ.

މީގެ އިތުރުން، އިބުރާގެ ޓުވީޓަށް ކޮމެންޓު ކުރި އެހެން މީހަކަށް ރައްދު ދެއްވަމުން އޭނާ ވަނީ ކޮންމެ ޕާޓީއަކުން ވެރިކަން ހިންގިޔަސް، އެބަޔަކު ޤަބޫލުކުރާ މެނިފެސްޓޯއެއް ހިންގޭތޯ މަސައްކަތްކުރަންވާނެ ކަމަށެވެ. 

"މައުމޫނީ ނިޒާމް ހިންގަން ކޮންމެހެން އިބޫ ބަހައްޓަނީ ކީއްކުރަން. މައުމޫނު މާ ރަނގަޅުވާނެނުން އެކަމަށް." އިބްރާ ވިދާޅުވެފައިވެއެވެ.

މިމޭރުމުން ވާހަކަ ދައްކަވަމުން އިބުރާ އިތުރަށް ވިދާޅުވީ، އެމްޑީޕީގެ އަސާސްތައް ހިފަހައްޓާނެ ބަޔަކު ޕާޓީގެ އިސްސަފުގައި ނެތްތާ ކިތަންމެ ދުވަހެއް ވެފައިވާ ކަމަށާ، އެފަދަ ޖާގައެއްވެސް ޕާޓީގައި ނެތުމުން އެމީހުން ތިބީ އެއްކައިރީގައި މަންޒަރުބަލަން ކަމަށެވެ.