މި އަހަރަގެ ސެޕްޓެމްބަރު މަހުގެ 9 ގައި ބޭއްވޭ ރިޔާސީ އިންތިޚާބު މޮނިޓަރ ކުރުމަށް ބޭރުގެ އޮބްޒާވަރުންނަށް އިލެކްޝަން ކޮމިޝަން (އީސީ) އިން ހުޅުވާލައިފިއެވެ.

އެގޮތުން އެ ކޮމިޝަނުން ވަނީ މިކަމަށް ޝައުޤުވެރިވާ ބައިނަލްއަޤްވާމީ އެސޯސިއޭޝަންތަކާއި ޖަމްއިއްޔާތަކާއި އެހެނިހެން ބޭރު ފަރާތްތަކަށް 25 މާރިޗް އިން 25 ޖުލައި ގެ ނިޔަލަށް ހުޅުވާލައި މިއަދު އިއުލާނެއް ނެރެފައެވެ.

އީސީއިން ކޮށްފައިވާ އިއުލާނުގައިވަނީ މިކަމަށް ހުށަހަޅާ ފަރާތްތަކަކީ 18 އަހަރުން މަތީގެ ފަރާތްތަކަށް ވާން ޖެހޭނެ ކަމަށާއި ބައިނަލްއަގްވާމީ އެސޯސިއޭޝަން ނުވަތަ ޖަމްއިއްޔާތަކުގެ އެކްރެޑިޓް ކޮށްފައިވާ މަންދޫބުންނަށް ވާން ޖެހޭނެ ކަަމަށެވެ.

މިއާއިއެކު އެފަރާތްތަކަކީ އިންތިޚާބަށް ކުރިމަތިލާ އެއްވެސް ކެނޑިޑޭޓަކަށް ނުވަތަ ސިޔާސީ ޕާޓީއަކަށް ސަޕޯޓް ކުރާ ނުވަތަ ކެމްޕެއިން ކޮށްދިނުން ފަދަ ހަރަކާތެއްގައި ބައިވެރިވެފައިވާ ފަރާތަކަށް ވެގެން ނުވާނެކަމަށް އީސީއިން ބުނެފައިވެއެވެ.

އަދި މިފަރާތްތަކުން އަަމަލު ކުރަންވާނީ އިންތިޚާބުގެ އާންމު ގާނޫނުގެ 40 ވަނަ މާއްދާއާއި 41 ވަނަ މާއްދާގެ މަތިންކަމަށާއި ރިޔާސީ އިންތިޚާބު 2023 ގެ ރެގިއުލޭޝަންގައި ބަޔާން ކޮށްފައިވާ ސުލޫކީ މިންގަނޑުތަކާއި އެއްގޮތްވާ ގޮތުގެ މަތިން ކަމަށެވެ.

މީގެ އިތުރުން ރާއްޖެއަށް އައުމާއި ރާއްޖެއިން ފުރުމާއި ދޭތެރޭ ކުރަން ޖެހޭ ހުރިހާ ޚަރަދުތަކަކާއި ވިސާ އަދި އިންޝުއަރެންސްގެ ޚަރަދުތައް ވެސް ކުރަންޖެހޭނީ އެފަރާތެއް އަމިއްލަ އަށް ނުވަތަ އެފަރާތެއް ތަމްސީލު ކޮށްދޭ ފަރާތުން ކަމަށް އީސީއިން ބުނެފައިވެއެވެ.

އަދި ކޮމިޝަނުން ހަމައެކަނި ހަަމަ ޖައްސައި ރާވާނީ އެ ފަރާތްތައް އެކްރެޑިޓް ކުރުމަށް މަޖްބޫރުވާ ތަމްރީނު ނުވަތަ ކުރު ސެޝަންތައް ކަމަށް ވެސް ބުނެފައިވެއެވެ. އަދި އެކްރެޑިޓް ކުރުމަށްފަހު މޮނީޓަރުންގެ ފާސް ދެވިގެން ދާނެ ކަމަށް އެ ކޮމިޝަނުން ފާހަގަކޮށްފައިވެއެވެ.

މިއާއިއެކު ރާއްޖެ ތެރޭގައި ދަތުރުފަތުރު ކުރަން ބޭނުންވާނަމަ، ނުވަތަ އެހެނިހެން ފަރާތްތަކާއި ސިޔާސީ ޕާޓީތަކާއި ބައްދަލު ކުރަން ބޭނުންވާނަމަ، އެކަމުގެ އިންތިޒާމްތައް ހަމަޖައްސަން ޖެހޭނީ އަމިއްލައަށް ކަމަށާއި މަތީގައި އަންގާފައިވާ ގާނޫނީ އުސޫލުތަކާއި ސުލޫކީ މިންގަނޑު ތަކާއި އެއްގޮތަށް ކަމަށް އީސީއިން ބުނެފައިވެއެވެ.