ދައުލަތަށް މިހާތަނަށް 7.2 ބިލިއަން ރުފިޔާ އާންމުދަނީގެ ގޮތުގައި ލިބިފައިވާ ކަމަށާއި 9.2 ބިލިއަން ރުފިޔާ ޚަރަދު ކޮށްފައިވާ ކަމަށް ތަފާސް ހިސާބުތަކުން ދައްކައިފިއެވެ.

އެގޮތުން ފިނޭންސް މިނިސްޓްރީއިން އާންމު ކޮށްފައިވާ ތަފާސް ހިސާބުތަކުން ދައްކާ ގޮތުގައި މިއަހަރުގެ 16 މާރިޗުގެ ނިޔަލަށް ދައުލަތަށް ލިބިފައިވާ ޖުމްލަ 7.2 ބިލިއަން އާންމުދަނީގެ ތެރެއިން 5.7 ބިލިއަން ރުފިޔާ ލިބިފައިވަނީ ޓެކްސް އާންމުދަނީގެ ގޮތުގައެވެ.

މިދިޔަ އަހަރުގެ މި ތާރީހަށް ލިބިފައިވަނީ 5.7 ބިލިއަން ޖުމްލަ އާންމުދަނީ އަދި 4.4 ބިލިއަން ޓެކްސް އާންމުދަނީއެވެ.

Advertisement

ޓެކްސް އާންމުދަނީގެ ތެރެއިން އިމްޕޯޓް ޑިއުޓީގެ ގޮތުގައި މިއަހަރު 690 މިލިއަން ރުފިޔާ ލިބިފައިވާއިރު، ބިޒިނަސް އެންޑް ޕްރޮޕަޓީ ޓެކްސްގެ ގޮތުގައި ލިބިފައިވަނީ 1.6 ބިލިއަން ރުފިޔާއެވެ.

މިއާއިއެކު ޖީއެސްޓީގެ ގޮތުގައި 3 ބިލިއަން ރުފިޔާ އަދި ގްރީން ޓެކްސްގެ ގޮތުގައި 212 މިލިއަން ރުފިޔާ ލިބިފައިވެއެވެ.

ޓެކްސް ނޫން އާންމުދަނީގެ ގޮތުގައި މިއަހަރު 1.4 ބިލިއަން ރުފިޔާ ލިބިފައިވާއިރު އެހީގެ ގޮތުގައި 16 މިލިއަން ރުފިޔާ ދައުލަތަށް ލިބިފައިވެއެވެ.

މީގެ އިތުރުން މި އަހަރުގެ 16 މާރިޗަށް 9.2 ބިލިއަން ރުފިޔާ ދައުލަތުން ޚަރަދު ކޮށްފައިވާއިރު މީގެ ތެރެއިން ރިކަރަންޓް ޚަރަދުގެ ގޮތުގައި ހޭދަކޮށްފައިވަނީ 6.2 ބިލިއަން ރުފިޔާއެވެ. މީގެ ތެރޭގައި މުސާރައާއި އިނާޔަތަށް 2 ބލިއަން ރުފިޔާ އަދި އިދާރީ ހިންގުމަށް 4 ބިލިއަން ރުފިޔާ ހިމެނެއެވެ.

ކެޕިޓަލް ޚަރަދުގެ ގޮތުގައި ބޭނުން ކޮށްފައިވަނީ 3 ބިލިއަން ރުފިޔާއެވެ.

މިދިޔަ އަހަރު ރިކަރަޏްޓަށް ޚަރަދު ކޮށްފައިވަނީ 4.9 ބިލިއަން ރުފިޔާ އަދި ކެޕިޓަލް ޚަރަދަށް 2.3 ބިލިއަން ރުފިޔާއެވެ.