ޖަމްޢިއްޔަތުލްސަލަފާއިމެދު ނޫސް މީޑީޔާތަކުން ފަތުރަމުންދާ ދޮގު ޚަބަރުތަކަށް މާފަށް އެދުމަށް އެ ޖަމްއިއްޔާއިން އެދެފިއެވެ.

ޖަމްޢިއްޔަތުލްސަލަފުން ނެރުން ނޫސް ބަޔާނެއްގައި ބުނެފައިވަނީ ޖުމްހޫރީ ޕާޓީގެ އެދިލެއްވުމަކަށް 20 މާރިޗު ވީދުވަހު ޖަމްޢިއްޔަތުލްސަލަފު އޮފީހުގައި ޕާޓީގެ ލީޑަރ ޤާސިމް އިބްރާހިމް އާއި އެޕާޓީގެ ބައެއް އިސްވެރިންނާ މުސްތަޝާރުންނާއިއެކު ބޭއްވި ބައްދަލުވުން ފިޔަވައި އިތުރު އެހެން ބައްދަލުވުމެއް މިއަދާ ހަމައަށް އެބޭފުޅުންނާއިއެކު ބޭއްވިފައިނުވާކަމަށެވެ.

އެހެންކަމުން މިއާ ޚިލާފަށް ތަފާތު ނޫސް މީޑިއާތަކުގައި ފަތުރަމުންދާ ޚަބަރުތަކަކީ ޒިންމާދާރު ކަމެއްނެތި، ފަތުރަމުންދާ ހަޤީޤަތެއް ނެތް ދޮގު ޙަބަރުތަކެއް ކަމަށެވެ.

Advertisement

މިއާއިއެކު އެ ޖަމްއިއްޔާއިން ވަނީ ޖަމްޢިއްޔަތުލްސަލަފަށް ނިސްބަތްކޮށް ދޮގު ހަބަރު ފެތުރި މީޑިޔާތަކުން އެކަމަށް މާފަށް އެދި ތެދު ހަޤީޤަތް ރައްޔިތުންނަށް ހާމަކޮށް ދިނުމަށް އިލްތިމާސްކޮށްފައެވެ.

އަދި ދޮގު ތެދު ބެލުމެއްނެތި ލިބޭހައި ޚަބަރެއް ނުފެތުރުމަށާއި، ޒިންމާދާރުކަމާއިއެކު ކަންކަމުގެ މައުލޫމާތު ފެތުރުމަށް ހާއްސަކޮށް ނޫސްވެރިންނަށް ނަސޭހަތްތެރިވެފައެވެ.

ސަލަފުން މިފަދަ ނޫސް ބަޔާނެއް ނެރެފައި މިވަނީ ސަލަފުން ގާސިމްއާ ސީރިއްޔާތުގައި ބައްދަލުކުރިކަމަށާއި އެ ޖަމުއިއްޔާއިން ގާސިމްއަށް ތާއީދު ނުކުރަނީ ޖޭޕީ ރައީސް ނަޝީދާއި އެކު އޮތީމައިކަމަށް ބުނެ ރާއްޖޭގެ ބައެއް މީޑިއާތަކުގައި ޚަބަރު ފެތުރުމާއި ގުޅިގެންނެވެ.

މިޑިއާތަކުގައި ބުނެފައިވަނީ ގާސިމްގެ އެދިލެއްވުމުގެ މަތިން ދެވަނަ ފަހަރަށް ސިއްރިއްޔާތުގައި ސަލަފުން ޖޭޕީއާ ބައްދަލުކޮށް މިފަދަ މަޝްވަރާތަކެއް ކޮށްފައިވާކަމަށާއި އެ ބައްދަލުކުރެއްވުމުގައި ޖޭޕީގެ ސަރުކާރު ހިންގުމުގައި ރައީސް ނަޝީދުގެ އެއްވެސް ހިއްސާއެއް ނޯންނާނެކަމުގެ ޔަގީންކަން ގާސިމް ސަލަފަށް ދެއްވިކަމަށެވެ.