ބަންގްލަދޭޝްގެ މިނިވަން ދުވަސް ފާހަގަކުރުމާއި ގުޅިގެން އެގައުމުގެ ފޮރިން އެފެއާޒް މިނިސްޓަރ އަބުލް ކަލާމް އަބްދުލް މޯމެން އަށް، ދިވެހިރާއްޖޭގެ ފޮރިން އެފެއާޒް މިނިސްޓަރ، އަބްދުالله ޝާހިދު ޝުކުރުގެ މެސެޖެއް ފޮނުއްވައިފިއެވެ.
މިނިސްޓަރގެ މެސެޖްގައި ވަނީ އެގައުމުގެ 52 ވަނަ މިނިވަން ދުވަހުގެ އުފާވެރި މުނާސަބާތް ފާހަގަ ކުރުމާއި ގުޅިގެން އެގައުމުގެ ފޮރިން މިނިސްޓަރ އަދި ސަރުކާރަށާއި އެ ގައުމުގެ ރައްޔިތުންނަށް ސަލާމާއި ހެޔޮ އެދުންތައް ފޯރުކޮށްދެއްވާފައެވެ.
އެގޮތުން މިއަހަރު ސެޕްޓެމްބަރ މަހުގައި ރާއްޖެއާއި ބަންގްލަދޭޝްގެ ގުޅުމަށް 45 އަހަރު ފުރޭނެ ކަން ފާހަގަކުރައްވާ މިނިސްޓަރ ވިދާޅުވީ، ފަހަކަށް އައިސް ދެ ގައުމުގެ ދެމެދުގައި ހިނގަމުން އަންނަ ބައްދަލުވުންތަކުގެ ސަބަބުން، ރާއްޖެ-ބަންގްލަދޭޝް ގުޅުން އާ އުސްމިންތަކަކަށް ގޮސްފައިވާކަމާއިމެދު އުފާ ކުރާ ކަމަށެވެ.
މިއާއިއެކު ގިނަ އަހަރުތަކަކަށް ދިގު ދެމިގެން ގޮސްފައިވާ އެކުވެރިކަމާއި އެއްބާރުލުމުގެ ގުޅުން އިތުރަށް ބަދަހި ކުރުމަށް މަސައްކަތް ކުރާނެ ކަމުގެ ޔަޤީންކަން މިނިސްޓަރ ޝާހިދު ވަނީ އަރުވާފައެވެ.
މެސެޖް ނިންމާލަމުން މިނިސްޓަރ ވަނީ އެ ޔަގީންކަން ގަބޫލް ކުރެއްވުމަށް ބަންގްލަދޭޝްގެ މިނިސްޓަރ ގެ އަރިހުން އެދިފައެވެ.
Advertisement
This content is created and paid for by advertisers and does not involve Voice Journalists
