ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ޖަލުގައި އޮންނަވާއިރު އެމަނިކުފާނަށް ރޯދަ މަހެއް، ހައްޖު މަހެއް އަދި ޢީދެއްވެސް ނާންނާނެ ކަމަށް ރައްޔިތުންގެ މަޖިލިހުގެ ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅު ވެއްޖެ އެވެ.  

ޢީސާ މިފަދައިން ވިދާޅުވެފައި ވަނީ، ރޯދަ މަހުގެ ތެރޭގައި ރައީސް ޔާމީން ގެއަށް ބަދަލު ކޮށްދިނުމަށް އެދުނު އެދުން ގަބޫލުނުކޮށް މި މަހުގައިވެސް އެމަނިކުފާނު ޖަލުގައި އޮންނަވަން ޖެހިވަޑައިގެންނެވުމުން އެކަމާއި ކަންބޮޑުވުން ފާޅުކުރައްވައި ރައްޔިތުންގެ މަޖިލީހުގެ މިއަދުގެ ޖަލްސާގައި ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް (ސެމްބެ) ދެއްކެވި ވާހަކަފުޅާއި ގުޅިގެންނެވެ.

ސެމްބެ ވިދާޅުވީ، ރައްޔިތުންނަށް އުފާވެރިކަން ގެނެސްދިން ރައީސަކު ރޯދަ މަހު އަނިޔާވެރި ކަމާއެކު ޖަލުގައި ބާއްވާފައިވާ ކަމަށާ، އެފަދައިން ސަރުކާރުން ކަންކުރުމުން ސަރުކާރުގައި އެއްވެސް ކަހަލަ އިހްސާންތެރި ކަމެއް ވެސް އަދި އިންސާނިއްޔަތު ކަމެއް ވެސް ނެތްކަން ސާފު ވެގެން ދާ ކަމަށެވެ.

Advertisement

ސެމްބެގެ ވާހަކަތަކަށް ރައްދު ދެއްވައި އީސަ ވިދާޅުވީ ހުކުމަކާ ނުލައި ކުށެއްގެ ތުހުމަތެއް ނެތި މަގުމަތިން ހިފައި ހައްޔަރުކޮށްގެން ޔާމީންގެ ވެރިކަމުގެ ފަސް އަހަރުގެ ތެރެއިން ތިން އަހަރުގެ ރޯދަ މަހު އޭނާ ހޭދަ ކުރެއްވީ ޖަލުގައި ކަމަށެވެ. އަދި ޖަލުގައި އޮތް އިރު، ދައުވާއެއް ވެސް ނުކޮށް ތަހުގީގެއް ވެސް ނުހިންގާ ކަމަށް އީސަ ވިދާޅުވިއެވެ.

މިއާއެކު އީސަ ވިދާޅުވީ ރައީސް ޔާމީނަކީ ވައްކަންކޮށްގެން ޖަލަށް ލާފައިވާ ބޭފުޅެއް ކަމަށާ، އެމަނިކުފާނަށް ރޯދަމަހެއް ހައްޖު މަހެއް ނާންނާނެ ކަމަށެވެ. 

"ހުކުމްކޮށްފައި ވައްކަންކޮށްގެން، ދައުލަތުގެ މުދަލުން ވައްކަންކޮށްގެން ކޯޓަށް ސާބިތުވެގެން ޖަލަށްލާފައި އެ އޮތީ. އޭނާ އަށް (ރައީސް ޔާމީންއަށް) ރަމަޟާން މަހެއް، ހައްޖު މަހެއް، އީދު މަހެއް އެތާ އޮންނައިރު ނާންނާނެ." އީސަ ވިދާޅުވިއެވެ. 

އީސަ ވިދާޅުވީ ކިތަންމެ ދެރަވެ އަސަރު ކުރިޔަސް ރައީސް ޔާމީނަކީ ކޯޓުގައި ކުށް ސާބިތުވެފައިވާ ކުށްވެރިއެއް ކަމަށާއި ރޯދަ މަހާއި ހައްޖު މަހެއް ކުށްވެރިންނަށް ނާންނާނެ ކަމަށެވެ. އަދި ރޯދަމަހާއި ހައްޖު މަހަށް ކުށްވެރިން ގެއަށް ބަދަލުކޮށް ހަދަން ގާނޫނުގައި ނޯންނާނެ ކަމަށްވެސް އޭނާ ވިދާޅުވި އެވެ.

އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ދައުލަތުން ރައީސް ޔާމީންގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ އެމަނިކުފާނަށް 11 އަހަރުގެ ޖަލު ހުކުމެއް އިއްވާފައިވަނީ ނިމިދިޔަ ޑިސެމްބަރު މަހުގެ 25 ގައެވެ.