އެސްޓީއޯގެ މެނޭޖިންގ ޑިރެކްޓަރގެ މަގާމަށް އަބްދުالله ސައީދު ހަމަޖެއްސުމަށް ޕްރައިވެޓައިޒޭޝަން އެންޑް ކޯޕަރޭޝަން ބޯޑް (ޕީސީބީ) އަށް ސަރުކާރުން ފޮނުވައިފިއެވެ.
އެގޮތުން މި މަގާމަށް ސައީދު އައްޔަންކުުރުމަށް ފުރިހަަމަ ކުރަންޖެހޭ އިޖުރާއަތުތައް އަންނަނީ ފުރިހަމަ ކުރަމުން ކަމަށް ޕީސީބީ އިން މައުލޫމާތުދެއެވެ.
މޯލްޑިވްސް ސްޓޭޓް ޝިޕިން (އެމްއެސްއެސް) ގެ މެނޭޖިންގ ޑިރެކްޓަރގެ މަގާމުގައި ހުންނެވި ސައީދު އެސްޓީއޯގެ އެމްޑީގެ މަގާމަށް އައްޔަންކުރަން ނިންމައިފައިވަނީ ކުރިން އެ މަގާމުގައި ހުންނެވި ހުސައިން އަމްރު މަގާމުން ވަކި ކުރުމާއި ގުޅިގެންނެވެ.
އަބްދުالله ސައީދަކީ ރައީސް ނަޝީދުގެ ވެރިކަމުގައި ރައީސް އޮފީހުގެ ކެބިނެޓް ސެކްރެޓަރީގެ މަގާމް އަދާ ކުރެއްވި ބޭފުޅެކެވެ.
އެއަށްފަހު 2011 ވަނަ އަހަރު ސައީދު އެ މަގާމުން އިސްތިއުފާ ދިނުމުން ސިންގަޕޫރުގައި ހުންނަ މޯލްޑިވްސް ނޭޝަނަލް ޝިޕިންގ ލިމިޓެޑް (އެމްއެންސީއެލް) ގެ އޮފީހުގެ ޑިރެކްޓަރ ގެ މަގާމު ހަވާލުކުރެވުނެވެ.
އަދި ކުރިން ސިންގަޕޫރުގައި ހުރި މޯލްޑިވްސް ނޭޝަނަލް އޮއިލް ކޮންޕެނީ (އެމްއެންއޯސީ) ގެ އޮފީހުގެ ޗެއާމަންގެ މަގާމްވެސް ސައީދު އަދާކޮށްފައިވެއެވެ.
މިދިޔަ ހޯމަ ދުވަހު އަމްރު އެސްޓީއޯގެ އެމްޑީގެ މަގާމުން ވަކިކުރަން ނިންމީ ސަރުކާރު ކުންފުނިތަކުގެ ހިންގުމަށް އަބަދުވެސް ބަދަލުތައް ގެންނަ އުސޫލުން ކަމަށް ރައީސް އޮފީހުން ބުނެފައިވެއެވެ.
މިދިޔަ ޖެނުއަރީ މަހު ބޭއްވުނު އެމްޑީޕީގެ ރިޔާސީ ޕްރައިމަރީގައި އަމްރު ހުންނެވީ ރައީސް ޞާލިހު އާއި ދެކޮޅަށް ރައީސް ނަޝީދުގެ ފެކްޝަން އާއި އެކުގައެވެ.
ޕްރައިމަރީ ނާކާމިޔާބުވުމަށްފަހު ރައީސް ނަޝީދު ހުޅުވި "ފިކުރެއްގެ ދިރުން" ގޮފީގެ މަސައްކަތުގައިވެސް އަމްރު ދަނީ އިިސް ދައުރެއް އަދާކުރަމުންނެވެ.
Advertisement
This content is created and paid for by advertisers and does not involve Voice Journalists
