ކްރިމިނަލް ކޯޓުން އިއްވި ޖަލު ހުކުން ތަންފީޒުކުރައްވަމުން ގެންދަވާ ވާދަވެރި ސިޔާސީ ލީޑަރު ކުރީގެ ރައީސް އަބްދުﷲ ޔާމީން އަބްދުލްގައްޔޫމު، މި ރޯދަމަހު ގެކޮޅަށް ބަދަލުކުރެއްވުމުގެ ފުރުޞަތު ވަރަށް ބޮޑުކަމަށް އެމަނިކުފާނުގެ ޤާނޫނީ ވަކީލުންގެ ޓީމުން ހާމަކޮށްފި އެވެ. 

ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން ރައީސް ޔާމީންގެ މައްޗަށް ދައުވާ އުފުލާފައިވާ މައްސަލައިގައި ޝަރީއަތުގެ ކުރިން ހުށަހަޅާ ހުށަހެޅުންތަކުގެ ގޮތުގައި ރައީސް ޔާމީން ހުށަހެޅުއްވި ގިނަ ހުށަހެޅުންތަކެއް ބަލައިނުގަތުމަށް ކްރިމިނަލް ކޯޓުން ނިންމި ނިންމުން ހައިކޯޓުގައި އިސްތިއުނާފުކޮށްފައިވާއިރު، މިއަދު އެ މަޢުލޫގައި ކުރިއަށް ގެންދިޔަ އަޑުއެހުމަށްފަހު ރައީސް ޔާމީންގެ އިސް ޤާނޫނީ ވަކީލު ޑރ މުޙައްމަދު ޖަމީލު އަހުމަދު މީޑިއާއަށް ދެއްވި އިންޓަވިއުއެއްގައި ވިދާޅުވީ ރައީސް ޔާމީން ގެކޮޅަށް ބަދަލުކުރުމުގެ މަސައްކަތް ކުރައްވަމުން ގެންދަވާ ކަމަށެވެ. 

އަދި މި ރޯދަމަހު އެމަނިކުފާނު ގެކޮޅަށް ބަދަލުކުރައްވާނެކަމުގެ އުންމީދު ވަރަށް ބޮޑުކަމަށް ޑރ ޖަމީލު ވިދާޅުވި އެވެ. 

Advertisement

ޑރ ޖަމީލު ވިދާޅުވީ ރައީސް ޔާމީންގެ ސަޕޯޓަރުން ހިތްވަރު އެލުވާނުލުމަށް އެމަނިކުފާނު އިލްތިމާސްކުރައްވާ ކަމަށެވެ. އެމަނިކުފާނުގެ މައްޗަށް ނުހައްގުން އަނިޔާކުރަމުން ދިޔަ ނަމަވެސް އެމަނިކުފާނުގެ އަޒުމަކަށް ކުޑަވެސް ބަދަލެއް ނާންނަކަމަށާއި އަދި އެމަނިކުފާނު ހުންނެވީ ސާބިތުކަންމަތީގައި ކަމަށް ޑރ ޖަމީލު ވިދާޅުވިއެވެ. 

އޭގެ އިތުރަށް ޑރ ޖަމީލު ވިދާޅުވީ ރައީސް ޔާމީން ޖަލުގައި ހުންނެވި ނަމަވެސް ސަރުކާރު ޖަވާބުދާރީ ކުރުވާ ރައްޔިތުންގެ އަޑު އުފުލުމަށް ކުރިއަށް ގެންދާ ހަރަކާތްތައް ވަރުގަދަކުރުމަށް އެމަނިކުފާނު އެދިވަޑައިގަންނަވާކަމަށެވެ. އަދި އެމަނިކުފާނުގެ ހައްގުގައި އަޑުއުފުއްލަވާ ދެއްވުމަށް ރައީސް ޔާމީން އެދިވަޑައިގަންނަވާކަމަށް ވެސް ޑރ ޖަމީލު ވިދާޅުވިއެވެ.