އޮންލައިންކޮށް ކުރިއަށް ގެންދެވެން އޮތް ޝަރީއަތަކަށް ޕީޕީއެމްގެ ރައީސް އަދި އެ ޕާޓީގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު ހާޒިރުކޮށްގެން ކުރިއަށް ގެންދިޔައީ އެމަނިކުފާނަށް ކޮންމެވެސް ގޮތަކުން ތަކުލީފެއް ޖެއްސުމަށްކަމަށް އިދިކޮޅުން ބުނެފިއެވެ.
ރ. ފުއްގިރި މައްސަލައިގެ އިސްތިއުނާފީ އަޑުއެހުމަކަށް ރައީސް ޔާމީން ވަނީ މިއަދު ހައިކޯޓަށް ހާޒިރުކޮށްފަ އެވެ. އެމަނިކުފާނު ކޯޓަށް ހާޒިރުކޮށްގެން އަޑުއެހުން ކުރިއަށް ގެންގޮސްފައިވާއިރު، އެމަނިކުފާނު މިވަގުތު ހުންނެވީ ވ. އާރަށުގެ މުއާމަލާތާއި ގުޅިގެން އެމަނިކުފާނުގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރުމަހުގެ 25 ގައި ކްރިމިނަލް ކޯޓުން އިއްވި ޖަލު ހުކުމް ތަންފީޒުކުރެއްވުމަށް މާފުށީ ޖަލުގައެވެ.
އެހެންކަމުން މިއަދުގެ ޝަރީއަތަށް އެމަނިކުފާނު ވަޑައިގެންނެވީ ކަނޑު ދަތުރެއް ކުރައްވާފައެވެ. އަދި ކޯޓުގައި އަޑުއެހުން ތާވަލުކޮށްފައިވާ ގަޑިއަށް މޯލްޑިވްސް ކަރެކްޝަނަލް ސާވިސްއަށް އެމަނިކުފާނު ކޯޓަށް ގެނެސްދެވިފައި ނުވާތީ އަޑުއެހުން ފެށުނީވެސް ލަހުންކަން ފާހަގަކޮށްލެވެއެވެ. ގާތްގަނޑަކަށް 45 މިނެޓުގެ އަޑުއެހުމަކަށްފަހު އެމަނިކުފާނު ވަނީ އަނބުރާ ޖަލަށް ވަޑައިގަންނަވާފަ އެވެ.
މިއަދުގެ އަޑުއެހުމަށްފަހު އިދިކޮޅު ކޯލިޝަންގެ ލީޑަޝިޕްގެ ފަރާތުން މިވަގުތު އެ ކޯލިޝަން ހިންގެވުމާއި ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުﷲ މީޑިއާއަށް ދެއްވި އިންޓަވިއުއެއްގައި ވިދާޅުވީ އޮންލައިންކޮށް ކުރިއަށް ގެންދެވެން އޮތް ޝަރީއަތަކަށް ރައީސް ޔާމީން ހާޒިރުކުރީ އެމަނިކުފާނަށް ތަކުލީފެއް ޖެއްސުމަށްކަމަށެވެ.
އެއީ ސަރުކާރުން ބޭނުންވެގެން ކުރާ ކަމެއްކަމަށާއި، ސަރުކާރުގެ މަޤަސަދަކީ ކޮންމެވެސް ގޮތަކުން ރައީސް ޔާމިނަށް ޖެއްސުންކޮށް އަނިޔާވެރިވުންކަމަށް އަބްދުއްރަހީމް ވިދާޅުވި އެވެ.
"މި ބޭނުންވަނީ ކޮންމެ ގޮތަކުންވެސް ރައީސް ޔާމިނަށް ތަކުލީފެއް ޖައްސަން. ރައީސް ޔާމިނަށް އުނދަގޫވާގޮތަށް ކޮންމެ ކަމެއްވެސް ކުރަން. މީގެކުރިން އެބަހުރި ތި ވިދާޅުވިހެން ރައީސް ޔާމީންގެ ޝަރީއަތްތައް އޮންލައިންކޮށް ގެންގޮސްފަ. މީ ރަމަޟާން މަހެއް، މި މަހުގައި މާ ރަނގަޅުވިސްކަންނޭގެ އޮންލައިންކޮށް ގެންދިޔަނަމަ. އެހެން ނަމަވެސް ރައީސް ޔާމީނަށް ރަމަޟާންމަހެއް ވީމަ ބޮޑަށް އުނދަގޫވާނީ ކޯޓަށް ހާޒިރުކޮށްގެން ކުރިއަށް ގެންދިއުމަށްކަމަށް ބަލާފައި އެކަންތައް އެގޮތަށް ކުރީކަމަށް އަޅުގަނޑުމެންނަށް ބެލުމުގެ ފުރުސަތު އެބޮތް"
ޕީއެންސީގެ ރައީސް އަބްދުއްރަހީމް އަބްދުﷲ
އެކަން ފާހަގަކުރައްވާ އަބްދުއްރަހީމް ވަނީ ފުލުފުލުގައި ރައީސް ޔާމީންގެ މައްސަލަތައް ބަލަމުންދާއިރު، އަދި އެމަނިކުފާނުގެ ފަރާތްޕުޅުން އިސްތިއުނާފުކޮށްފައިވާ މައްސަލަތައް ވެސް ކޯޓުގައި ތާވަލުކުރަމުންދާއިރު، އެމަނިކުފާނަށް ތަކުލީފަކަށް ނުވާނެހެން، އަދި އެމަނިކުފާނުގެ ސިއްހީ ހާލުކޮޅަށްވެސް ބެއްލެވުމަށްފަހު ފަސޭހަފުޅުވާނެ ގޮތަކަށް ކޯޓުން އަޑުއެހުންތައް ހަމަޖައްސައިދިނުމަށް އެދިވަޑައިގަންނަވާފަ އެވެ.
އަބްދުއްރަހީމް މިފަދައިން ވިދާޅުވެފައިވާއިރު، މިއަދު ހައިކޯޓުގައި އޮތް އަޑުއެހުމުގައި ރައީސް ޔާމީންގެ ފަރާތްޕުޅުން ވެސް ވަނީ ދެން އެ މައްސަލައިގައި ބާއްވާ އަޑުއެހުންތައް އޮންލައިންކޮށް ކުރިއަށް ގެންގޮސްދިނުމަށް އެދިވަޑައިގެންފަ އެވެ.
ރައީސް ޔާމީންގެ ފަރާތްޕުޅުން އެފަދައިން އެދިވަޑައިގެންފައިވާނީ އެމަނިކުފާނު ސިއްހީ ހާލުކޮޅު ހުރިގޮތުން ކަނޑު ދަތުރުކުރުމާއި، ކޯޓުގައި ގިނައިރު ވަންދެން އިންނެވުމަށް ދަތިފުޅުވާތީ އެވެ.
މިއަދު ކުރިއަށް ގެންދިޔަ އަޑުއެހުމުގައި ރައީސް ޔާމީންގެ ފަރާތްޕުޅުން ވަނީ އިސްތިއުނާފު ނިމެންދެން މިހާރު ކްރިމިނަލް ކޯޓުގައި ކުރިއަށްދާ ފުއްގިރި މައްސަލަވެސް މަޑުޖައްސާލުމަށް އެދިވަޑައިގެންފައެވެ. އެ މައްސަލަ މަޑުޖައްސާލުމަށް ދައުލަތުންވެސް އިއުތިރާޒުކޮށްފައެއް ނުވެއެވެ.
އެހެންކަމުން ދެން އެންމެ އަވަހަށް ބާއްވާ އަޑުއެހުމެއްގައި އެކަމާއިމެދު ގޮތެއް ނިންމާނެކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
