ހުޅުމާލެ 2 ވަނަ ފިޔަވަހީގައި ފަހި ދިރިއުޅުން ކޯޕަރޭޝަނުން އިންޑިއާގެ ޖޭއެމްސީއާ ހަވާލުކޮށްގެން ހިންގާ ހައުސިން މަޝްރޫއުގެ މަސައްކަތްކުރާ މުވައްޒަފުންނަށް މުސާރަނުދީ ގިނަ ދުވަސްވާ މައްސަލައިގައި އިންޑިއާ އެމްބަސީ ކައިރީ ކުރި މުޒާހަރާ ކަވަރުކުރަމުން ދިޔަ "ވޮއިސް" ގެ ނޫސްވެރިއަކަށް ފުލުހުން އިންޒާރުދީފި އެވެ. 

ޖޭއެމްސީގެ މަސައްކަތްތެރިން އިންޑިއާ އެމްބެސީ ކައިރިއަށް އެއްވެފައިވަނީ އެ މުވައްޒަފުންނަށް މުސާރަ ނުދޭ މައްސަލައިގައި އިންޑިއާ އެމްބަސީގެ އެހީތެރިކަން ހޯދުމަށެވެ.

އެހެން ނަމަވެސް އެކަމަށްޓަކައި އެ ސަރަހައްދަށް އެއްވި ފަރާތްތަކާއި އިންޑިއާ އެމްބެސަޑަރު ބައްދަލުކުރުމަށް ދެކޮޅު ހައްދަވާ، އެމްބަސީއަށް ވަނުމަށް ފުލުހުން ހުރަސްއެޅުމާއި ގުޅިގެން މަސައްކަތްތެރިން ވަނީ އިންޑިއާ އެމްބަސީ ކައިރީ މުޒާހަރާކޮށްފަ އެވެ. 

Advertisement

އެ މަންޒަރުތައް ވަކަރުކުރަމުން ދިޔަ ވޮއިސްގެ ޗީފް އެޑިޓާ ޝަފްރާޒު އަހުމަދަށް ފުލުހުން ވަނީ ހުރަސްއަޅާފަ އެވެ. 

އެގޮތުން މުޒާހަރާގެ މަންޒަރުތައް ރިކޯޑު ނުކުރުމަށާއި، އެ މަންޒަރުތައް ރިކޯޑުކުރާނަމަ ހައްޔަރުކުރާނެކަމުގެ އިންޒާރު ފުލުހުން ވަނީ ދީފައެވެ. އޭގެ އިތުރުން އެ ނޫސްވެރިޔާ ކޮއްޕާ ފުލުހުން ވަނީ ފަހަތައް ޖައްސާފައެވެ. 

ޝަފްރާޒުގެ މަސައްކަތަށް ހުރަސްއެޅި ފުލުސް އޮފިސަރުގެ ސާވިސް ނަންބަރު ކިޔާދިނުމަށް އެދުމުން ސާވިސް ނަންބަރު ދައްކަން ނުޖެހޭނެކަމަށް ފުލުހުން ވަނީ ބުނެފައެވެ. އެއީ ކަނޑައެޅިގެން ގާނޫނާއި ޚިލާފުކަމެކެވެ.

ފުލުހުން ޝަފްރާޒުގެ މަސައްކަތަށް ހުރަސްއަޅާފައިވަނީ މުޒާހަރާތައް ކަވަރުކުރުމުގެ ހުއްދަ ދީ މޯލްޑިވްސް ބްރޯޑްކާސްޓިން ކޮމިޝަނުން ދޫކޮށްފައިވާ އެކްރިޓެޑް ފާސް ބޭނުންކޮށްގެން މުޒާހަރާ ކަވަރުކުރަމުން ދަނިކޮށްކަން ފާހަގަކޮށްލެވެއެވެ. 

މިއީ ފުލުހުން ނޫސްވެރިއަކަށް ހުރަސްއެޅި ފުރަތަމަ ފަހަރެއް ނޫނެވެ. އިދިކޮޅުގެ މުޒާހަރާތައް ކަވަރުކުރަމުންދާ ނޫސްވެރިންނަށް ކެނޑިނޭޅި ފުލުހުން އިންޒާރުދޭ މައްސަލަތައް މިހާރުވެސް އެކި ކޮމިޝަންތަކަށް ހުށައަޅާފައިވާއިރު، ފުލުހުންގެ ފަރާތުން ނޫސްވެރިއަކަށް ލިބުނު އަނިޔާތަކަށް ފަރުވާ ހޯދުމަށް ރާއްޖެއިން ބޭރަށްވެސް ގެންދަން ޖެހުނެވެ. 

ފުލުހުންގެ ފަރާތުން ނޫސްވެރިންގެ މަސައްކަތަށް ހުރަސްއަޅާ، ނޫސްވެރިންނަށް އިންޒާރުދޭ މައްސަލަތައް ކަމާބެހޭ އިދާރާތަކަށް ހުށައެޅި ނަމަވެސް، އެ މައްސަލަތައް އެކަށީގެންވާ ގޮތެއްގައި ބަލާ ފިޔަވަޅު އަޅަމުން ނުދާކަން ފާހަގަކޮށްލެވެއެވެ.