މީގެ ތިން އަހަރު ކުރިން ވަޅި އަކުން ހަމަލާދީ ހުޅުމާލޭގައި މަރާލި ޓެކްސީ ޑްރައިވަރ އދ. މާމިގިލި، ގާސިމް ހަސަންގެ ވާރިސުން ސާބިތު ކޮށްފިއެވެ.

2019 ވަނަ އަހަރުގެ ޑިސެމްބަރު 04 ގައި ޓެކްސީ ޑްރައިވަރ ގާސިމް ހަސަންއަށް ވަޅިއަކުން ހަމަލާދީ މަރާލައިފާވަނީ ގާސިމްގެ ކާރުގެ ފަހަތު ސީޓްގައި އިން ޅ. ހިންނަވަރު, ބޮޑުހިޔާގެ, އަދުހަމް މުހައްމަދު ފޭރުމަށް ކުރި މަސައްކަތް ނާކާމިޔާބުވުމާއި ގުޅިގެންނެވެ. އަދުހަމް މި މައްސަލާގައި ހައްޔަރު ކޮށްފައިވަނީ އެއަހަރުގެ 15 ޑިސެމްބަރުގައެވެ.

މި މައްސަލައާއި ގުޅިގެން މި މަހު 19 ގައި ބޭއްވުނު އަޑުއެހުމުގައި އަދުހަމްގެ މައްޗަށް ކުށް ސާބިތުވެއްޖެ ކަމަށް ކްރިމިނަލް ކޯޓްއިން ވަނީ ކަނޑައަޅާފައެވެ.

މިއަށްފަހު ދެން އޮތީ ވާރިސުން ސާބިތު ކުރުމަށް ހެކިންގެ ހެކިބަސް ނެގުމެވެ. މިހާރު މި މަރުހަލާ ނިންމާ ގާސިމްގެ ފަސް ވާރިސުން ވަނީ ދެނެގަނެފައެވެ. އެގޮތުން ހެކިން ބުނި ގޮތުގައި ގާސިމް މަރުވިއިރު އޭނާގެ މައިންބަފައިންނާއި އަންހެނުން ދުނިޔޭގައި ނެތް ނަމަވެސް އޭނާގެ 5 ދަރިން ތިއްބެވެ.

ދެން އޮންނާނީ މި ވާރިސުންގެ ބަސްނަގައި ކުށުގެ އަދަބު ކަނޑައެޅުމެވެ. އެގޮތުން ވާރިސުންގެ ބަސް ނެގުމަށް ވީ އެންމެ އަވަހަކަށް އަޑުއެހުމެއް ތާވަލު ކުރާނެ ކަމަށް ގާޒީ އަލީ ނަދީމް މިއަދު ވިދާޅުވެފައިވެއެވެ.

މި މަހު 19 ގައި އަދުހަމްގެ މައްޗަށް ކުށް ސާބިތު ކުރުމަށް ބޭއްވުނު އަޑުއެހުމުގައި ގާޒީ އަލީ ނަދީމް ވިދާޅުވެފައިވަނީ ގާސިމް މަރާލި ސަރަހައްދުން ފެނުނު ވަޅިން އަދުހަމްގެ ޑީއެންއޭ ފެނިފައިވާތީ ވަޅި ހެރިކަމާއިމެދު އެއްވެސް ޝައްކެއް ނެތް މިންވަރަށް ޔަގީންވާ ކަމަށެވެ.

އަދި ވަޅީގެ ހަމަލާއާއިމެދު އެކި ފަހަރު އެކި ގޮތަށް ވާހަކަދެއްކި ނަމަވެސް ކޮންމެ ފަހަރަކުވެސް ވަޅި ހެރި ކަމަށް އަދުހަމް އެއްބަސްވެފައިވާކަމަށެވެ.

އަދުހަމް ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާއަށް އިއުތިރާފްވެ އެއަށްފަހު އޮތް ބައްދަލުވުމެއްގައި އޭނާ އެކަން ކުރީ މަސްތުގެ ހާލަތުގައިކަމަށާއި ގަސްތުގައި ނޫން ކަމަށް ބުނެފައެވެ.

މިކަމާއި ގުޅިގެން ގާޒީ ނަދީމް ވިދާޅުވެފައިވަނީ ކުށުގެ ވެށިން ފިލުމަށް އަދުހަމް ކުރި މަސައްކަތުންވެސް މިއީ ގަސްތުގައި ކޮށްފައިވާ ކަމެއްކަން ހާމަވާކަމަށާއި މީހުން ދިރިނޫޅޭ ހިސާބެއްގައި ހިނގި އެ ހާދިސާއަށް ފަހު ގާސިމަށް އެހީތެރިވުމަށް އަދުހަމް މަސައްކަތް ކުރި ނަމަ، އޭނާގެ ކިބައިގައި މެރުމުގެ ގަސްދު ނެތް ކަމަށް ބެލެވުނީސް ކަމަށެވެ.

އަދި މަސްތުގެ ހާލަތުގައި އަދުހަމް އެވަގުތު ހުރިއިރު އޭނާ ހުރީ ކުރި ޢަމަލުގެ ނަތީޖާ ނުވިސްނޭ ހާލަތުގައި ނޫންކަމަށްވެސް ޤާޒީ ވިދާޅުވެފައިވެއެވެ.

މިއާއިއެކު ގާޒީ ވަނީ ގާސިމްގެ މަރާއި ގުޅިގެން ހެދި މެޑިކޯ ލީގަލް ރިޕޯޓާއިމެދު އަދުހަމް ސުވާލު އުފައްދާފައިނުވާކަން ފާހަގަކުރައްވާފައިވެއެވެ.

އަދި ދިރިހުރުމުގެ ހައްގު ކޮންމެ މީހަކަށް ލިބިފައިވާކަން ފާހަގަ ކުރައްވާ ގާޒީ ވިދާޅުވެފައިވަނީ މި ހައްގު މީހެއްގެ ކިބައިން އަތުލެވޭނީ ކޯޓަކުން ކުރާ ހުކުމަކުން ކަމަށާއި ގާސިމްގެ ލޭ ހުއްދަ ކުރަންޖެހޭ ސަބަބެއް ނެތް ކަމަށެވެ. އެހެންކަމުން ގާސިމް މަރާލައިފާވަނީ ހައްގަކާއި ނުލާ ކަމަށެވެ.

"ގާސިމް ހަސަން މަރާލުމުގެ ގަސްދު އަދުހަމް މުހައްމަދުގެ ކިބައިގައި އޮތްކަން ސާބިތުވާ ކަމަށް ކަނޑައަޅަން." ގާޒީ ނަދީމް ވިދާޅުވެފައިވެއެވެ.