މި ޙާލަތުގައި އެންމެ ރަނގަޅު ވާނީ ސަރުކާރުގެ އެކި މަޤާމުތަކުގައި ތިއްބެވި ސަރުކާރާއި ދެކޮޅު ފަރާތްތައް އިސްތިއުފާދެއްވުން ކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެ އެވެ. 

ޝަރީފު މިފަދައިން ވިދާޅުވެފައިވަނީ އެމްޑީޕީގެ ރައީސް މުޙައްމަދު ނަޝީދުގެ "ފިކުރެއްގެ ދިރުން" ގޮތްޕަށް ނިސްބަތްވާ ބައެއް ފަރާތްތައް މަގާމުން ވަކިކުރުމާއި، ޖުމްހޫރީ ޕާޓީގެ ލީޑަރު ޤަސިމް އިބްރާހިމް ރިޔާސީ ރޭހުގައި ވާދަކުރައްވަން ނިންމެވުމާއި ގުޅިގެން ޖޭޕީގެ ސްލޮޓުތައް ހުސްކުރުމަށް ރައީސް ޞާލިހަށް ތާއީދުކުރައްވާ މެމްބަރުން ގޮވާލައްވަމުންދާ ދަނޑިވަޅެއްގައި ކުރެއްވި ޓްވީޓެއްގަ އެވެ. 

ޝަރީފު ވިދާޅުވީ މިއީ އެބޭފުޅަކު އިޚްތިޔާރު ކުރާނެ ފަޅި އަވަހަށް ނަންގަވަންވީ ވަގުތު ކަމަށެވެ. ކުރިއަށް އޮތް ފަހްތާއެއްހާ ދުވަހުގެ ތެރޭގައި މަންޒަރު ވަރަށް ސާފުވާނެ ކަމަށާއި، ސަރުކާރާއި އެއްކޮށް ތިއްބެވި ބޭފުޅުންނާއި ސަރުކާރާއި ދެކޮޅު ބޭފުޅުން ހާމަވެގެންދާނެ ކަމަށް އޭނާ ވިދާޅުވި އެވެ. 

ސަރުކާރާއި ދެކޮޅު ފަރާތްތައް ސަރުކާރުގެ ވުޒާރާތަކުންނާއި ކުންފުނިތަކުން ވަކިކުރަމުންދާއިރު ޝަރީފު ވިދާޅުވެފައިވަނީ މި ހާލަތުގައި އެންމެ ރަނގަޅުވާނީ ސަރުކާރާއި ދެކޮޅު ބޭފުޅުން އަމިއްލަފުޅަށް ސަރުކާރުގެ މަގާމުތަކުން އިސްތިއުފާދެއްވުން ކަމަށެވެ. 

ޝަރީފު ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއެކު ތިއްބެވި ބަޔަކާއެކު މަސައްކަތްޕުޅު ކުރައްވައިގެން ކުރިއަށް އޮތް ރިޔާސީ އިންތިޚާބު ބޮޑުތަނުން ކާމިޔާބު ކުރައްވާނެ ކަމަށެވެ. 

ޖުމްހޫރީ ޕާޓީގެ ލީޑަރު ޤާސިމް އިބްރާހިމް ރިޔާސީ އިންތިޚާބުގައި ވާދަކުރައްވަން ނިންމެވުމާއި ގުޅިގެން ސަރުކާރުގެ މަތީ ފަޑީގައި ތިއްބެވި އެ ޕާޓީގެ ބައެއް މެމްބަރުން ގެންދަނީ ޖޭޕީން އިސްތިއުފާދެއްވަމުން ނެވެ. 

އެހެންކަމުން، ޝަރީފު އެ ވިދާޅވިފަދައިން ކުރިއަށް އޮތް ހަފްތާއެއްގެ ތެރޭގައި ސަރުކާރުގައި ތިއްބެވި އެހެން ސިޔާސަތުތަކުގެ ބޭފުޅުން މަގާމުތަކުން ވަކިވާނެކަމަށް ބެލެވެއެވެ.