ވާރޭވެހި މާލޭގެ މަގުތަކުގައި ފެން ބޮޑުވުމާއި ގުޅިގެން އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ޕަންޕު ބޭނުންކޮށްގެން ފެން ހިއްކުމުގެ ފަށައިފިއެވެ.
އެެގޮތުން މިއަދު ހެނދުނު 08:31 ހާއިރު ފެން ހިއްކުމުގެ މަސައްކަތްފަށާފައިވާއިރު، މިހާތަނަށް މާލޭގެ ހަތަރު ސަރަހައްދެއްގައި (ވެސްޓްޕާރކް، އައިޖީއެމްއެޗް، ދިރާގު ހެޑް އޮފީސް އަދި އެކުވެނި) ޕަންޕު ބޭނުންކޮށްގެން ފެން ހިއްކުމުގެ މަސައްކަތް ދަނީ ކުރަމުން ކަމަށް އެމްއެންޑީއެފްއިން ވަނީ ބުނެފައެވެ.
މިއަދު މާލެއަށް ގުގުރުމާއިއެކު ބޯކޮށް ވާރޭ ވެހުމުގެ ސަބަބުން މަގުތަކުގައި ވަނީ އަދަޔާޚިލާފަށް ފެން ބޮޑުވެފައެވެ. ހާއްސަކޮށް މާފަންނު ސަރަހައްދުގައި ފެންބޮޑުވެފައިވާއިރު އެ ސަރަހައްދުގެ ފިހާރަތަކަށާއި ގެތަކަށް ފެން ވަދެ އާންމުން ވަނީ ދަތިތަކާއި ކުރިމަތިލާފައެވެ.
މާލެގެ މަގުތަކުގެ މައްސަލަތައް މާލެ ސިޓީގެ ދަށުގައި ވީނަމަވެސް ފެން ހިނދުމުގެ ނިޒާމުގެ ކަންކަން ކުރަނީ ހައުސިން މިނިސްޓްރީގެ ފަރާތުންނުނެވެ. އެ މިނިސްޓްރީން މި މައްސަލާގައި އެއްވެސް ވާހަކައެއް ދައްކާފައި ނުވާއިރު, މި ޕަންޕުތައް މާލެގައި ފެންބޮޑުވެ ގިނަ އިރުތަކެއްވީއިރުވެސް ބޭނުން ނުކުރާ މައްސަލާގައި މާލެ ސިޓީގެ މޭޔަރ ޑރ. މުޢިއްޒު ވަނީ ކަންބޮޑުވުން ފާޅުކުރައްވާފައެވެ.
މިއާއިއެކު ވާރެ ހުއްޓާލިތާ ގިނަ އިރުތަކެއް ވެފައިވީ ނަމަވެސް ފެން ނުހިނދުމުގެ ސަބަބުން ގިނަ ބަޔަކު އަންނަނީ ސޯޝަލް މީޑީއާގައި ކަންބޮޑުވުން ފާޅުކުރަމުންނެވެ.
Advertisement
This content is created and paid for by advertisers and does not involve Voice Journalists
