މިއަދު މާލެއަށް ބޯކޮށް ވާރޭވެހި ފެންބޮޑުވުމާއި ގުޅިގެން 3 ގެއަކަށް ގެއްލުން ލިބިގެން ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އަށް ރިޕޯޓް ކޮށްފައިވާ ކަމަށް އެ އޮތޯރިޓީއިން ބުނެފިއެވެ.
އެމްޑީއެމްއޭ އިން މިހެން ބުނެފައިވަނީ މާލޭގައި މިއަދު ފެންބޮޑުވުމާއި ގުޅިގެން އެހީވުމަށް ކުރެވުނު މަސައްކަތުގެ އަދާހަމަ ހާމަކުރަމުންނެވެ.
އެގޮތުން ބައެއް ގޭގެއަށް ގެއްލުން ލިބެމުންދާކަމުގެ ރިޕޯޓު ލިބުމާއިއެކު އެމެޖަންސީ އޮޕަރޭޝަންސް ގެ މަސައްކަތް ފަށާފައިވާ ކަމަށް އެމްޑީއެމްއޭއިން މައުލޫމާތު ދެއެވެ.
މިއާއިއެކު ފެން ބޮޑުވާ ސަރަހައްދުތަކުގައި ވެލިބަސްތާ ޖެހުމަށާއި އާންމު ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމަށްޓަކައި މާލެ ސިޓީ ކައުންސިލްއަށް އެ މައުލޫމާތު ފޯރުކޮށްދެވިފައިވާ ކަމަށް އެމްޑީއޭއިން ބުނެފައިވެއެވެ. އަދި ވެލި ބަސްތާ ޖެހުމަށް ބޭނުންވާ ގޯނި ވެސް ވާނީ މާލޭ ސިޓީ ކައުންސިލްއަށް ފޯރުކޮށްދީފައި ކަމަށް ބުނެފައިވެއެވެ.
މީގެ އިތުރުން ފެންބޮޑުވުމުގެ ސަބަބުން ގޭތެރެއަށް ނަޖިސް ބޭރުވުމާއި، ބައެއް ފަރުނީޗަރާއި ހިފާގެންގުޅޭ ތަކެއްޗަށް ގެއްލުން ލިބިގެން ރިޕޯޓްކުރި 3 ގޭގެ ހާލަތުބަލާ ގެއްލުންތައް ދެނެގަތުމުގެ މަސައްކަތް ކުރެވިފައިވާ ކަމަށް ވެސް އެމްޑިއެމްއޭ އިން ބުނެފައިވެއެވެ.
މިއަދު މާލެއަށް ގުގުރުމާއިއެކު ބޯކޮށް ވާރޭ ވެހުމުގެ ސަބަބުން މަގުތަކުގައި ވަނީ އަދަޔާޚިލާފަށް ފެން ބޮޑުވެފައެވެ. ހާއްސަކޮށް މާފަންނު ސަރަހައްދުގައި ފެންބޮޑުވެފައިވާއިރު އެ ސަރަހައްދުގެ ފިހާރަތަކަށާއި ގެތަކަށް ފެން ވަދެ އާންމުން ވަނީ ދަތިތަކާއި ކުރިމަތިލާފައެވެ.
މިކަން ހައްލުކުރުމަށްޓަކައި އެމްއެންޑީއެފްއިން ޕަންޕު ބޭނުންކޮށްގެން ފެން ހިންދުމުގެ މަސައްކަތް ހެނދުނުއްސުރެ އަންނަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
