މިއަދު މާލެއަށް ގުގުރުމާއިއެކު ބޯކޮށް ވާރޭ ވެހުމުގެ ސަބަބުން މަގުތަކުން ފެން ނުހިނދުނީ މިކަން ކުރުމަށް ބަހައްޓާފައިވާ ޕަމްޕްތައް މަސައްކަތް ނުކުރާތީ ނޫން ކަމަށާއި ފެންބޮޑުވުން ހައްލު ކުރެވޭނީ މިހާރު ހުރި ޕަމްޕްތައް ބޮޑުކޮށްގެން ކަމަށް އެ ނިޒާމު ބަލަހައްޓާ ކުންފުނި، އެމްޑަބްލިއެސްއެސްސީއިން މިއަދު ބުނެފިއެވެ.

މާލެއަށް މިއަދު ކުރި ވިއްސާރާގައި އަދަޔާޚިލާފަށް ވަނީ ފެންބޮޑުވެފައެވެ. ހާއްސަކޮށް މާފަންނު ސަރަހައްދުގައި ފެންބޮޑުވެފައިވާއިރު އެ ސަރަހައްދުގެ ފިހާރަތަކަށާއި ގެތަކަށް ފެން ވަދެ އާންމުން ވަނީ ދަތިތަކާއި ކުރިމަތިލާފައެވެ.

މިކަމާއި ގުޅިގެން އެމްޑަބްލިއެސްސީގެ މެނޭޖިން ޑިރެކްޓަރު ހަސަން ޝާހް މީޑީއާ އަށް ވިދާޅުވީ މާލޭ ފެންބޮޑުވީ ޕަމްޕްތައް މަސައްކަތް ނުކޮށްގެން ނޫން ކަމަށާއި އެންމެ ޕަމްޕެއް ނޫނީ ހުރިހާ އެއްޗެއް ވެސް ބަރާބަރަށް މަސައްކަތް ކުރަމުން އަންނަ ކަމަށެވެ.

Advertisement

މިއާއިއެކު މަސައްކަތް ނުކުރާ ޕަމްޕަކީ އަމީނީ މަގު ހަދަމުން ދާތީ ނުޖެއްސި ހުރި ޕަމްޕެއް ކަމަށް ވެސް ޝާހު ވިދާޅުވި އެވެ. މިއީ ސިނަމާލޭ ފްލެޓް ސަރަހައްދުގައި ހުންނަ ޕަންޕެކެވެ.

ޝާހު ވިދާޅުވި ގޮތުގައި މާލޭގައި މިހާރު އެހާ ބޮޑަށް ފެންބޮޑުވަނީ، މޭޔަރު މުއިއްޒު ހައުސިން މިނިސްޓަރަކަށް ހުންނެވި ދުވަސްވަރު ގާއިމްކޮށްފައިވާ ފެން ހިންދާ ނިޒާމަކީ މާލޭގެ ކެޕޭސިޓީއަށް ވުރެ ކުޑަ ނިޒާމަކަށް ވާތީ ކަމަށެވެ.

އެގޮތުން މި ނިޒާމު ޑިޒައިންކޮށްފައި ހުރީ މާލޭގެ ގޭގޭ ފުރާޅުން މަގުމައްޗަށް އެޅޭ ފެން ޖަމާވާނޭ ކަމަށް ބަލައިގެންނޫން ކަމަށާއި މިހާރު ހުރި 9 ކިލޯވޮޓްގެ ޕަމްޕްތައް 13 ކިލޯ ވޮޓަށް ބަދަލުކޮށްގެން ނޫނީ މާލެއަށް އޮބި ނޯންނާނެ ކަމަށް ޝާހު ވިދާޅުވިއެވެ.

މިހާރު ގާއިމްކޮށްފައިވާ ނިޒާމަކީ ފެންގަނޑު ބޮޑުވާތީ 2-3 ގަޑިއިރު ތެރޭ ފެންގަނޑު ހިންދާލާ ގޮތަށް ގާއިމްކޮށްފައިވާ ނިޒާމެކެވެ.

މީގެ އިތުރުން ކާނުތައް ރަނގަޅަށް ސާފު ނުކުރެވުމަކީ ވެސް މައްސަލައެއް ކަމަށް ފާހަގަކުރައްވާ ޝާހު ވިދާޅުވީ އެކަމުގެ ސަބަބުން ޕަމްޕްތަކާ ހަމަޔަށް ފެންގަނޑު ނައިސް ބްލޮކްވެފައި ހުންނަ ކަމަށެވެ.

"މީގައި މުޅިން ހައްލު ގެންނަންޏާ ކާނު ސާފުކުރުން ވެސް ރަނގަޅަށް އެބަ ގެންދަން ޖެހޭ. މީގެ ކުރިން ވެސް އެމްއެންޑީއެފްއިން ޖައްސާ މައްސަލައެއް އެއީ ކާނުތައް ތެރޭ ފިލާބުރިބުރި ކަހަލަ އެއްޗިހި ހުރެގެން ޕަމްޕްތަކާ ހަމައަށް ފެންނުގޮސް ބްލޮކްވެފައި ހުންނަ ވާހަކަ،" ޝާހް ވިދާޅުވި އެވެ.

ފެން ހިންދާ ނިޒާމު ބެލެހެއްޓުމަށް ހަދާފައިވާ އެގްރިމަންޓް މިދިޔަ ނޮވެމްބަރު މަހު ހަމަވެފައިވުމުން އެ އެއްބަސްވުން ޑިސެމްބަރަށް އިތުރު ކުރުމަށް ފަހު އާ އެއްބަސްވުމެއް ހެދުމަށް މިހާރު މަޝްވަރާ ކުރަމުން އަންނަ ކަމަށް ވެސް ޝާހު ވިދާޅުވި އެވެ.

އޭނާ ވިދާޅުވި ގޮތުގައި ޕަމްޕްތައް ބޮޑު ކުރެވޭނީ ސަރުކާރުން އެކަން އެ ކުންފުންޏާ ހަވާލުކުރީމައެވެ. މީގެ ކުރިންވެސް ޕަމްޕްތައް ބޮޑުކުރަން ޖެހޭކަން އެ ކުންފުނިން ފާހަގަކޮށްފައިވާ ކަމަށް ޝާހު ވިދާޅުވިއެވެ.

ހައުސިން މިނިސްޓްރީއާ އެކު ހަދާފައިވާ އެއްބަސްވުމެއްގެ ދަށުން މާލޭގެ ސްޓޯމް ޑްރެއިނޭޖް ނިޒާމް ބަލަހައްޓަނީ އެމްޑަބްލިއުއެސްސީންނެވެ.