މިއަހަރުގެ ރޯދަމަހު މާލެ ސަރަހައްދުގައި 32 މިސްކިތެއްގައި ދަމުނަމާދު ކުރާނެ ކަމަށް އިސްލާމިކް މިނިސްޓްރީއިން ބުނެފިއެވެ.

އެގޮތުން މިނިސްޓްރީއިން މިކަމާއި ގުޅިގެން ކުރި އިއުލާނުގައި ބުނެފައިވަނީ މިއަހަރުގެ ރަމަޟާން މަހުގެ ފަހު ދިހާގައި މާލޭގައި ދަމު ނަމާދު ކުރުމަށް ހަމަޖެހިފައިވަނީ 18 މިސްކިތެއްގައި ކަމަށެވެ.

އަދި ވިލިމާލޭގައި 3 މިސްކިތެއްގައި ދަމު ނަމާދު ކުރަން ހަމަ ޖެހިފައިވާއިރު ހުޅުމާލޭގައި މިކަން ކުރުމަށް ހަމަޖެހިފައިވަނީ 11 މިސްކިތުގައި ކަމަށެވެ.

Advertisement

ދަމު ނަމާދުގެ އިތުރުން އިއުތިކާފަށް ތިބުމަށް ހަމަޖެހިފައިވަނީ މާލޭގެ 7 މިސްކިތާއި، ވިލިމާލޭގެ މިސްކިތަކާއި، ހުޅުމާލޭގެ 6 މިސްކިތެއްގައި ކަމަށްވެސް މި އިއުލާނުގައި ބުނެފައިވެއެވެ.

ސުންނަތްކަން ގަދަވެގެންވާ މި ދެ އަޅުކަމަކީ ކޮންމެ އަހަރެއްގެ ރަމަޟާން މަހުވެސް މާލެއާއި ރާއްޖޭގެ އެކި ކަންކޮޅު ތަކުގައި ޖަމާއަތުގައި ކޮށް ގިނަ އަދަދެއްގެ މީހުން ބައިވެރިވާ އަޅުކަމެކެވެ.

މިއަހަރުގެ ރަމަޟާން މަހުގެ ފަހު ދިހައިގެ ފުރަތަމަ ރެއަކީ އަންނަ ހަފްތާގެ އަންގާރަ ދުވަހުގެ ރެއެވެ.