ނ މަނަދޫ ގެއެއްގެ ކޮޓަރިއެއްގައި މަރުވެފައި އޮތް އަންހެން މީހާ ހިނަވާގެއަށް ގެންގޮސްފައިވާ ކަމަށާއި، މޫނު ދެއްކުމަށް ހަމަޖެހިފައި ވަނީ އާއިލާގެ މީހުންނަށް އެކަނި ކަމަށް މަނަދޫ ކައުންސިލުން ބުނެފިއެވެ.

ނ. މަނަދޫ، އަންނާރުމާގޭ ނަޢީމާ މޫސާ، 62، މަރުވެފައި އޮއްވާ ފެނިފައި ވަނީ އިއްޔެ އިރުއޮއްސުނު ވަގުތުގައެވެ.

އެކަމާ ގުޅިގެން "ވޮއިސް" އަށް މައުލޫމާތު ދެއްވަމުން މަނަދޫ ކައުންސިލްގެ ރައީސް އަބްދުއްރަހްމާން ސަބީހު ވިދާޅުވީ، މަރުވެފައިވާ މީހާގެ ހަށިގަނޑު ފުލުހުންގެ ބެލުމުގެ ދަށުން ހިނަވާގެއަށް ގެންގޮސްފައިވާ ކަމަށެވެ. ސަބީހު ވިދާޅުވީ ކަށުނަމާދު ކުރާނެ އިރެއް ނޭނގޭ ކަމަށާއި އަދި އިތުރަށް ހަށިގަނޑާމެދު ކަންތައް ކުރާނެ ގޮތެއްވެސް އެނގިނުލައްވާ ކަަމަށެވެ.

މަނަދޫ ކައުންސިލް މެމްބަރު އަހުމަދު ރިމްޒާދު ވިދާޅުވި ގޮތުގައި، ހަޑިގަނޑު ހިނަވާގެއަށް ގެންގޮސްފައި ވަނީ މިއަދު ހެދނުދު 6:45 ހާއިރުއެވެ. ރިމްޒާދު ވިދާޅުވީ ހިނެވުމުގެ ކަންތައްތައް އަދި ނުފަށާ ކަމަށާއި ހިނަވައި ކަށުނަމާދު ކުރާނީ، ފުލުހުން ހަށިގަނޑު ކައުންސިލާ ހަވާލު ކުރުމުން ކަމަށެވެ.

މަރު ތަހުގީގު ކުރުމަށްޓަކައި ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމެންޓްގެ ޓީމެއް މިހާރު ދަނީ މަނަދޫގައި ހަރަކާތްތެރި ވަމުންނެވެ. 

ފުލުހުންނަށް އޭނާގެ އާއިލާއިން ކުރި ރިޕޯޓާއި ގުޅިގެން އެއަންހެންމީހާ ދިރިއުޅެމުންދިޔަ ގެޔަށް ފުލުހުން ގޮސް އެގޭ ކޮޓަރީގެ ދޮރު ވައްޓާލައިގެން ފުލުހުން ވަނީ ވަދެފައެވެ. އަދި އޭރު އެއަންހެން މީހާ އެކޮޓަރީގެ ބިންމަތީގައި މަރުވެފައި އޮއްވައި ވަނީ ފެނިފައެވެ. 

އެމަރާއި ގުޅިގެން ޝައްކު ކުރެވޭ ކަންތައްތަކެއް ފެނިގެން ފުލުހުން މިހާރު ވަނީ ހުއްދަނެތި އެރަށަށް އަރައިފޭބުން މަނާކޮށްފައެވެ. އޭގެ އިތުރުން ރަށަށް އަންނަ ފަރާތްތަކުންވެސް ފުލުހުންނަށް އެންގުމަށް ފަހު ރަށަށް އެރުމަށް ވަނީ އަންގައިފައެވެ.