ރައްޔިތުންނަށް ހިލޭ ބޭސްފަރުވާކޮށްދިނުމަށް އެކުލަވާލާފައިވާ އާސަންދަ ހެލްތު އިންޝިއުރަންސް ސްކީމަށް މިއަހަރުގެ ފުރަތަމަ 3 މަސްތެރޭ 600 މިލިއަން ރުފިޔާ ޚަރަދުކޮށްފައިވާކަން ތަފާސް ހިސާބުތަކުން ހާމަވެއްޖެ އެވެ. 

ފިނޭންސް މިނިސްޓްރީގެ ތަފާސް ހިސާބުތައް ދައްކާގޮތުގައި މިއަހަރަށް އާސަންދަ ސްކީމަށް ކަނޑައަޅާފައިވާ އެއް ބިލިއަން ފިރޔާގެ ތެރެއިން 600 މިލިއަން ރުފިޔާ ވަނީ ޚަރަދުކޮށްފަ އެވެ. މިއީ އާސަންދަ ބަޖެޓުގެ 60 އިންސައްތަ އެވެ. 

މިނިސްޓްރީގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރުގެ މި މުއްދަތުގައި އާސަންދައަށް ހޭދަވެފައިވަނީ 345 މިލިއަން ރުފިޔާއެވެ. އެހެންކަމުން، މިއަހަރުގެ މިހާތަނަށް އާސަންދައަށް ކުރި ޚަރަދު ވަނީ ދެ ގުނައަށް އިތުރުވެގެން ގޮސްފައެވެ. 

މިދިޔަ އަހަރު އާސަންދައަށް 730 މިލިއަން ރުފިޔާގެ ބަޖެޓެއް ކަނޑައަޅާފައިވާއިރު އާސަންދައަށް ސަރުކާރުން ވަނީ 800 މިލިއަން ރުފިޔާ އިތުރަށް ޚަރަދުކޮށްފަ އެވެ. 

މިދިޔަ އަހަރު އާސަންދައަށް ބޮޑު ޚަރަދެއްކޮށްފައިވާނީ ރާއްޖެއިން ބޭރުން ބޭސްފަރުވާ ހޯދުމަށެވެ. 

ރާއްޖޭގެ ރައްޔިތުންގެ އިޖުތިމާއީ ސިއްހީ އިންޝުއަރެންސް ނިޒާމަކީ ރާއްޖޭގެ އިތުރުން އިންޑިއާ އާއި ސްރީލަންކާ އަދި މެލޭޝިއާ އިންވެސް ލިބެމުން އަންނަ ހިދުމަތެކެވެ.

މިއަހަރުގެ ފުރަތަމަ 3 މަހު އާސަންދަ ބަޖެޓުގެ 60 އިންސައްތަ ހޭދަކޮށްފައިވާއިރު، މިއަހަރުވެސް އާސަންދައަށް ބަޖެޓުން ބޭރުން ބޮޑެތި ޚަރަދުތަކެއް ކުރަން ޖެހޭނެކަމަށް ބެލެވެއެވެ.