ނ މަނަދޫ ގެއެއްގެ ކޮޓަރިއެއްގައި މަރުވެފައި އޮއްވާ ފެނުނު، އެރަށު އަންނާރުމާގޭ، ނައީމާ މޫސާ (62)ގެ މަރާގުޅޭ މައުލޫމާތެއް އެއްވެސް މައުލޫމާތެއް ލިބިފައި ވާނަމަ އެކަން ހިއްސާކޮށްދިނުމަށް ދިވެހި ފުލުހުންގެ ހިދުމަތުން އެދެފިއެވެ.
ނައީމާ ދިރިއުޅޭ ގޭގައި އޭނާ މަރުވެފައި އޮއްވާ ފެނުނީ މިދިޔަ ހުކުރު ދުވަހުގެ އިރު އޮއްސުނު ވަގުތުގައެވެ.
އެކަމާ ގުޅިގެން ފުލުހުން ބުނީ، ނައީމާގެ ހަބަރެއް ނުވެގެން އާއިލާއިން ފުލުހުންނަށް ކުރި ރިޕޯޓަކާ ގުޅިގެން، ނައީމާ ދިރިއުޅޭ ގެއަށް ފުލުހުން ވަދެ ބެލިއިރު، އޭނާ ދިރިއުޅޭ ކޮޓަރީގެ ތަޅުންގަނޑުމަތީގައި މަރުވެފައި އޮއްވާ ފެނުނު ކަމަށާއި ހަށިގަނޑަށް އަނިޔާތަކެއް ލިބިފައިވާ ކަމަށެވެ.
އެ މަރާ ގުޅިގެން ތުހުމަތު ކުރެވޭ ކަންތައްތަކެއް ފުލުހުންނަށް ވަނީ ފާހަގަ ކުރެވިފައެވެ. އެހެންކަމުން މި މައްސަލައިގެ ތަހުގީގު ކުރިއަށް ގެންދަނީ ފުލުހުންގެ ހޮމިސައިޑް އިންވެސްޓިގޭޝަންސްގެ ފަރާތުންނެވެ.
"އެގޮތުން، ދިވެހި ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމެންޓްގެ ހާއްސަ ތަހުގީގު ޓީމަކާއި ފޮރެންސިކް ތަހުގީގު ޓީމެއްގެ އިތުރުން ފޮރެންސިކް ޕެތޮލޮޖިސްޓެއް ނ. މަނަދޫގައި މިހާރު ދަނީ ހަރަކާތްތެރި ވަމުން" ފުލުހުން ބުންޏެވެ.
މީގެ އިތުރުން ފުލުހުން ބުނީ، ނައީމާ ވަޅުލާފައި ވަނީ، ހަށިގަނޑު ބަލައި ތަހުލީލުތަކަށް ބޭނުންވާ ސާމްޕަލް ނެގުމަށްފަހު، އިތުރަށް ޕޯސްޓްމޯޓަމް ހަދަން ޖެހޭ ސަބަބެއް ނެތް ކަމަށް ފޮރެންސިކް ޕެތޮލޮޖިސްޓް ނިންމުމުން ކަމަށެވެ.
ނައީމާގެ ހަށިގަނޑު ވަޅުލާފަވައި ވަނީ އިއްޔެ ހަވީރު 5:20 ގައެވެ.
Advertisement
This content is created and paid for by advertisers and does not involve Voice Journalists
