މިވަގުތު ސަރުކާރުގެ ވަޒީރުންގެ ގޮތުގައި ތިއްބެވި ބައެއް ބޭފުޅުން އަމިއްލަފުޅަށް އިސްތިއުފާ ނުދެއްވައިފިނަމަ ނޯ ކޮންފިޑެންސް ވޯޓް ނަގާނެ ކަމުގެ އިޝާރާތެއް ރައްޔިތުން މަޖްލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ކުރައްވާފިއެވެ.

ކުރިއަށް އޮތް ރިޔާސީ އިންތިޚާބުގައި ވާދަކުރުމަށް ޖުމްހޫރީ ޕާޓީއިން ނިންމާ، އެޕާޓީގެ ލީޑަރު ޤާސިމް އިބްރާހިމް ވަނީ ޕާޓީގެ ކެނޑިޑޭޓެއްގެ ގޮތުގައި ނިކުންނެވުމަށް ނިންމާފައެވެ. މިކަމާއި ގުޅިގެން އިންތިޚާބަށް ތައްޔާރު ވުމަށް ކެންޕެއިން ކުރުމުގެ ހަރަކާތްތަކުގައި ސަރުކާރުގައި ވަޒީރުގެ މަގާމް އަދާ ކުރައްވާ ޖޭޕީގެ މެމްބަރުންވެސް އަންނަނީ ބައިވެރި ވަމުންނެވެ. މިގޮތުން ފިޝަރީޒް މިނިސްޓަރ ޑރ. ހުސައިން އާއި ޓްރާންސްޕޯޓް މިނިސްޓަރ ނަހުލާ ފާހަކޮށްލެވެއެވެ.

މިކަމާއި ގުޅިގެން މެމްބަރު ރާއީ މިއަދު ކުރެއްވި ޓްވީޓެއްގައި ވިދާޅުވީ މިވަގުތު ސަރުކާރުގެ ވަޒީރުންގެ ގޮތުގައި ތިއްބެވި ބައެއް ބޭފުޅުން ރީތި ގޮތުގައި އަމިއްލަފުޅަށް އިސްތިއުފާ ނުދެއްވައިފިނަމަ، މިވަގުތަށް މަޖްލިސްގެ މެޖޯރިޓީ އޮވެމެ، ނޯ ކޮންފިޑެންސް ވޯޓް ނެގުމަކީ ނުހަނު މުހިއްމު ކަމެއް ކަމަށެވެ.

ރާއީ ވަނީ މީގެ ކުރިންވެސް މަޖްލީހުގެ ތަޅުމުގައި ސަރުކާރުގެ މަޤާމުތަކުގައި ތިއްބެވި ޖޭޕީ މެމްބަރުން ޖެހޭނީ އިސްތިއުފާ ދޭންކަމަށް ވިދާޅުވެފައެވެ.

އެގޮތުން ރާއީ ވިދާޅުވެފައިވަނީ މިއަދުން މިއަދަށް ޖޭޕީގެ ސްލޮޓްގައި ސަރުކާރުގެ މަޤާމުތަކުގައި ތިއްބެވި ބޭފުޅުން އިސްތިއުފާ ދެއްވަން ޖެހޭ ކަމަށެވެ. އަދި އިސްތިއުފާ ނުދެއްވައިފިނަމަ ސަރުކާރުގެ ތެރެއިން އެކަން ކުރައްވާނެ ކަމަށް ރާއީ އިންޒާރު ދެއްވިއެވެ.

"މި ހުރިހާ ދުވަހު ސަރުކާރުން ބޮޑު ޕޯޝަނެއް ޖޭޕީއަށް ދީގެން މި ތިބެނީ މިތާ ތިބި މެމްބަރުން އެކަމާ ދެކޮޅަށް އެއްޗެކޭ ނުބުނެ. މިއަދު ރައީސް އަށް ދޯކާދީފައި އެގޮތަކަށް އެކަމެއް ނުކުރެވޭނެ. އަޅުގަނޑުމެން އެކަން ކުރިއަކަށް ނުދޭނަން." ރާއީ ވިދާޅުވެފައިވެއެވެ.