ޗަމްޕާ ބްރަދަރސްގެ ފަރާތުން ދިވެހި ރައްޔިތުންނަށް ހަދިޔާ ކޮށްފައިވާ ކާށި މިއަދު މާލެ ސިޓީ ކައުންސިލުން ބަހަން ފަށައިފިއެވެ.

އެގޮތުން މާލެސިޓީ ކައުންސިލުގެ ޢާންމު ޚިދުމަތްތަކާއި ބެހޭބައި (ތައިސޭކޮށި / ބޮޑުތަކުރުފާނުމަގު) ގައި މިކަން މިހާރު ދަނީ ކުރަމުންނެވެ.

ޗަމްޕާ ބްރަދަރސްގެ ފަރާތުން ދިވެހި ރައްޔިތުންނަށް ކާށި ބެހުމަށް މާލެ ސިޓީ ކައުންސިލާއި ހަވާލު ކޮށްފައިވަނީ އިއްޔެއެވެ. މި ކާށި މިއަދުން ފެށިގެން ބަހާޏެ ކަމަށް ސިޓީ ކައުންސިލުން ވަނީ އިއްޔެ އިއުލާން ކޮށްފައެވެ.

އެގޮތުން ދިވެހި ހުރިހާ ރައްޔިތުންނަށް ކާށި ބަހަން ހަމަޖެހިފައިވާއިރު، މިއަދުން ފެށިގެން އާދިއްތަ ދުވަހުގެ ނިޔަލަށް ކާށި ބެހުމަށް ހަމަޖެހިފައިވަނީ އިސްލާމިކް މިނިސްޓްރީގެ ދަފްތަރުގައި ފަޤީރުންގެ ގޮތުގައި ރަޖިސްޓްރީވެފައިވާ ފަރާތްތަކަށެވެ.

ކާށި ބަލާ ދާއިރު، ފަޤީރުންގެ ލިސްޓުގައި ހިމެނޭ މީހެއްކަން އެނގޭނެ ފަދަ ލިޔުމެއް ގެންދިއުމަށް ސިޓީ ކައުންސިލުން ވަނީ އެދިފައެވެ.

މިއާއިއެކު ހޯމަ ދުވަހުން ފެށިގެން ކާށި ބެހުމަށް ހަމަޖެހިފައިވަނީ ދިވެހި ކޮންމެ ރައްޔިތަކަށެވެ. އަދި ކާށި ބަލާ ދާއިރު އައި.ޑީ ކާޑު ގެންދިއުމަށް ސިޓީ ކައުންސިލުން ވަނީ އެދިފައެވެ.        

ކާށި ބެހުން ކުރިއަށްދާނީ މާލެސިޓީ ކައުންސިލުގެ ޢާންމު ޚިދުމަތްތަކާއި ބެހޭބައި (ތައިސޭކޮށި / ބޮޑުތަކުރުފާނުމަގު)ގައި ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 09:30 ން 13:30 އަށް އަދި ރޭގަނޑު 21:30 ން 23:30 އަށެވެ.