ވ. ތިނަދޫ ގޮނޑުދޮށް ހިމާޔަތް ކޮށް ބ.ހިތާދޫ ބަނދަރު ތަރައްޤީ ކުރަން އެމްޓީސީސީއަށް ހަވާލުކޮށްފި އެވެ. 

މި މަޝްރޫއު ތަކުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޗީފް އޮޕަރޭޓިންގ އޮފިސަރ އަލްފާޟިލް ޝާހިދު ހުސެއިން މޫސާ އެވެ. އަދި ޕްލޭނިން މިނިސްޓްރީގެ ފަރާތުން ސޮއިކުރެއްވީ ޕާމަނަންޓް ސެކްރެޓަރީ ޒީނިޔާ ހަމީދެވެ.

ވ. ތިނަދޫ ބަނދަރު ފުޅާކޮށް ބޮޑު ކުރުމުގެ މަޝްރޫޢުގެ ދަށުން 12،800 ކިއުބިކް މީޓަރުގެ ސަރަހައްދެއްގެ އައު ހާބަ ބޭސިން ފުންކުރުމާއި، 860 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި، 77 މީޓަރުގެ ބޭރުތޮށި ލުމާއި، 482 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 66 މީޓަރުގެ އެއްގަމުތޮށި ލުމާއި، މޫރިން ބޯއީސް ހަރުކުރުން ހިމެނެއެވެ.

Advertisement

އަދި މީގެ އިތުރުން 10 މީޓަރު ދިގު 9 މީޓަރު ފުޅާ ރޭމްޕެއް އެޅުމާއި، 16 މީޓަރު ދިގު 2 މީޓަރު ފުޅާ ކޮންކްރީޓް ބްރިޖެއް އެޅުމާއި، 1،847.11 އަކަމީޓަރުގެ ސަރަހައްދެއްގައި ހާބަ ޕޭވްމަންޓް ހެދުމާއި 291 މީޓަރުގެ ސަރަހައްދެއްގައި ކާބް ހަރުކުރުމުގެ މަސައްކަތް ހިމެނެއެވެ. 

360 ދުވަހުގެ ތެރޭގައި ނިންމާގޮތަށް ހަވާލުކުރި މި މަޝްރޫއުގެ އަގަކީ 43.8 މިލިއަން ރުފިޔާ އެވެ.

ބ. ހިތާދޫ ގޮނޑުދޮށް ހިމާޔަތް ކުރުމުގެ މަޝްރޫޢުގެ ދަށުން، 7،800 ކިއުބިކް މީޓަރުގެ ސަރަހައްދަކަށް ވެލިއަޅައިގެން ގޮނޑުދޮށް ހެދުމާއި، 610 މީޓަރުގެ ސަރަހައްދެއްގައި ޖިއޯބޭގް ރިވެޓްމެންޓް ޖެހުމާއި، 230 މީޓަރުގެ ސަރަހައްދެއްގައި ގްރޮއިން ޖެހުން ހިމެނެއެވެ. މި މަސައްކަތް ފެށުމަށް ހަމަޖެހިފައިވަނީ އީއައިއޭ ހެދުމަށް ފަހުގައެވެ. 

16.96 މިލިއަން ރުފިޔާގެ މި މަޝްރޫއު ހަވާލުކޮށްފައި ވަނީ 180 ދުވަހުގެ ތެރޭގައި ނިންމާގޮތަށެވެ.