ތ. ވޭމަންޑޫ ޒުވާނުންގެ މަރުކަޒުގެ މަސައްކަތް ކުރިއަށް ނުދާތީ ތިމަރަފުށީ ދާއިރާގެ މެންބަރު އަބްދުالله ރިޔާޒް ކުރެއްވި ސުވާލަކީ އިޚްލާޞްތެރި ސުވާލެއް ނޫން ކަމަށާ، އެހެނެއް ކަމަކު އެއީ ސިޔާސީ ސުވާލެއް ކަމަށް، ޔޫތް މިނިސްޓަރު އަހްމަދު މަހްލޫފް ވިދާޅުވެއްޖެއެވެ. 

މިއަދުގެ ރައްޔިތުންގެ މަޖިލީހުގެ ޖަލްސާގައި ތިމަރަފުށީ ދާއިރާގެ މެންބަރު ރިޔާޒު ވަނީ ތ. ވޭމަންޑޫ ޒުވާނުންގެ މަރުކަޒު މަސައްކަތް ކުރިއަށް ނުދާތީ އެކަމާއި ގުޅިގެން މިނިސްޓަރު މަހުލޫފާއި ސުވާލު ކުރައްވާފައެވެ. 

އެ ސުވާލުގެ ޖަވާބުގައި މަހްލޫފް ވިދާޅުވީ، ޔޫތު މިނިސްޓްރީން ވަރަށް ގިނަ މަސައްކަތްތަކެއް މިހާރުވެސް ކުރަމުންދާ ކަމަށާ، މަސައްކަތްތައް ގިނަވެގެން ކޮންޓްރެކްޓަރުންނަށް ނުކަތާވަރުވެފައިވާ ކަމަށެވެ. އެގޮތުން ކޮންޓްރެކްޓަރުންނާއި ހަވާލު ކުރެވޭ މަސައްކަތްތައް ކުރިއަށް ނުދާތީ، އެކަން ކުރިއަށް ގެންދިޔުމަށް އެތަކެއް ފަހަރުމަތިން އަންގާ ކަމަށާ، ވޭމަންޑޫ ޒުވާނުންގެ މަރުކަޒުގެ މަސައްކަތް ކުރިއަށް ގެންދިޔުމަށް އެފަދައިން އެތައް ފަހަރަކު އެންގުނު ކަމަށް މަހްލޫފް ވިދާޅުވި އެވެ. 

އެހެންނަމަވެސް، އެކަން ކުރިއަށް ނުދާތީ، ކޮންޓްރެކްޓް ބާތިލްކޮށް އެ މަސައްކަތް މިހާރު ކައުންސިލާއި ހަވާލު ކުރެވިފައިވާ ކަމަށް އޭނާ ވިދާޅުވި އެވެ.

މެންބަރު އަބްދުالله ރިޔާޒް މަހުލޫފާއި ސުވާލު ކުރައްވަނީ-- ފޮޓޯ/ މަޖިލިސް 

މަހްލޫފް ގެ ޖަވާބާއި ގުޅިގެން ރިޔާޒް ވިދާޅުވީ އެއީ ވަރަށް ޒިންމާދާރުކަން ކުޑަ ޖަވާބެއް ކަމަށެވެ. 

ރިޔާޒްގެ ވާހަކަ އާއި ގުޅިގެން އެކަމަށް ފާޑުވިދާޅުވެ މަހްލޫފް ވިދާޅުވީ އޭނާގެ އެ ވާހަކަ އަކީ ސިޔާސީ ވާހަކައެއް ކަމަށާ، އެ ސުވާލުގައި އެއްވެސް އިޚްލާސްތެރިކަމެއް ނެތް ކަމަށެވެ. 

މަހްލޫފް ވިދާޅުވީ ޔޫތު މިނިސްޓްރީން މިވީ ހަތަރު އަހަރު ތެރޭގައި ކޮށްފައިވާ ކަންކަމަކީ މީގެ ކުރިން އެއްވެސް ސަރުކާރަކުން ކޮށްފައިވާ ކަންކަމާއި ނުބައްދަލު މަސައްކަތް ތަކެއް ކަމަށާ، އެކަން މެންބަރު ރިޔާޒަށްވެސް އެނގިލައްވާނެ ކަމަށެވެ.

ނަމަވެސް އެކިއެކި ސަބަބުތަކާއި ހުރެ ބައެއް ކަންކަން ނުވެ ހުރި ކަން ފާހަގަކުރައްވައި މަހްލޫފް ވިދާޅުވީ ވޭމަންޑޫ ޒުވާނުންގެ މަރުކަޒުގެ މަސައްކަތަކީ އެކަހަލަ ކަމެއް ކަމަށާ، އެކަން މިހާރު ރައްޔިތުން ބޭނުން ގޮތަކަށް ކުރުމަށް ކައުންސިލާއި ހަވާލު ކުރެވިފައިވާ ކަމަށެވެ.